Joani 15
15
1Ami yami muvinyu walala, Tata yami diyi ndimi. 2Nyitayi yejima yamudami yabulaŋa kusoŋa nyikabu, wayikunkulaŋaku; niyejima yasoŋaŋa nyikabu wayitookeshaŋa, kulonda yisoŋi nyikabu yayivulu. 3Enu munatooki dehi namazu inahoshi nanenu. 4Shakamenu mudami, ninami nishakami mudenu. Chakaŋanyaŋa mutayi kusoŋa nyikabu inka wawu chiŋa wushakama mumuvinyu, chochimu ninenu nawa mukukaŋanya chiŋa mushakama mudami. 5Yami muvinyu, enu munyitayi; muntu washakamaŋa mudami ninami mudi yena, diyi wasoŋaŋa nyikabu yasweja kuvula; muloŋa chakadi ami himukutwesha kwila hela chuma chimuku. 6Neyi muntu nabuli kushakama mudami, akumunata neyi mutavi, wukuuma; akuyikuŋula nakuyinatila mukesi, yikusukuma. 7Neyi mukushakama mudami, nimazu ami ashakama mudenu, mukulomba chonsu chimukukeŋa, akuyililachu. 8Chuma chakumulemesha nachu Tata yami, chochakusoŋa nyikabu yayivulu; himukwikala atumbanji twami. 9Mwanankeŋuwu kudi Tata, dimu nawa munayikeŋenu; shakamenu mukukeŋa kwami. 10Neyi mukuhembaŋa munayilejaŋa mukusnakama mukukeŋa kwami; neyi chinahembaŋami mwanlejaŋawu kudi Tata yami, nashakamaŋa mukukeŋa kwindi. 11Chinayileji yumiyi nalondi muzaŋalu wami wikali mudenu, nimuzaŋalu wenu wuwanini.
12Nayileji nami mukeŋaŋani, neyi chinayikeŋi dehi ami. 13Hikudi kukeŋa kwabadika kwenikuku, kwakutulayi muntu wumi windi hanyijimba yawamabwambu jindi. 14Neyi mukwila munukuyileja mukwi kala amabwambu jami. 15Hinukuyitena nawa cheŋi nami muyanduŋuku; muloŋa nduŋu helukaŋa mwelaŋayi nkaka yinduku. Ilaŋa nayiteni dehi nami mudi amabwambu, muloŋa nayileji dehi yuma yejima yinatiyili kudi Tata yami. 16Hiyenu mwantondeli amuku, ami yami natondelenu, nayikunjiki mudimu wakuya nakusoŋa nyikabu, ninyikabu yenu yakashakami yayiwenyi, kulonda ayinki chonsu chimukulomba Tata mwijina dami. 17Nukuyileja mwenimu kulonda mukeŋaŋani.
18Neyi akuyihela kudi antu ampata yamunu mwishina, muneluki nenu asambila dehi kunhelami, enu achidi kanda ayiheli. 19Neyi enu mwadiŋi ampata yamunu mwishina, akwampata yamunu mwishina adi kukeŋa antu awu. Enu himudi ampata yamunu mwishinaku, ilaŋa ami nayitondeli mukachi kawantu ampata yamunu mwishina; dihu hanafumi kuyihela kudi antu ampata yamunu mwishina. 20Anukenu mazu inayileja nami, Nduŋu habadikaŋa nkaka yinduku. Chankabishiluwu ami, ninenu nawa akayikabisha. Neyi ahembeli mazu ami, akahemba mazu enu nawa. 21Ilaŋa yuma yejimiyi akayilila hansaŋu yejina dami, muloŋa anabuli kwiluka yena wantemesheli. 22Neyi nabulili kwinza nakuhosha nawu, hiyadi kwikala nanshiduku. Hakwilichi hiyakweti mwakuleyela nanshidi yawuku. 23Muntu wukuhelami, naheli niTata yami nawa. 24Neyi nabulili kwila mukachi kawu nyidimu yabulili kukoŋahu dehi muntu wacheŋi, hiyadi kwikala nanshiduku. Hakwilichi anamoni nakuhela kumu ninami niTata yami. 25Chumichi chinalondi kulumbulula mazu asonekeluwu munshimbi jawu eliluwu nawu, Ananheli chakadi muloŋa. 26Ilaŋa chakenzayi Nkwashi nakayitemeshela wakudi Tata, yowu Spiritu wansaŋu yalala, wukufuma kudi Tata, diyi wakela chinsahu chami. 27Ninenu nawa mwakela ayinsahu nanichi chimunekali nanami kufumisha kutachi.
Currently Selected:
Joani 15: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
