Joani 16

1Chinayileji yumiyi nalondi akabuli kuyidimbwisha. 2Akayihaŋa mumashikola; eŋa, mpinji yakenza yakela muntu wakayijaha, wakatoŋojoka nindi wudi nakukalakela Nzambi mudimu. 3Akela yumiyi nanochu chabula kwilukawu Tata hela ami. 4Nayileji yumiyi kulonda neyi mpinji yawu yinenzi mwakaanukaŋa nenu nayilejelumu dehi.

Hatachi hinayilejelaŋa yumiyuku, muloŋa nadiŋi nenu; 5katataka hinukuya kudi yena wantemesheli. Kwosi mwinenu wumu wukuŋihula nindi, Wukuya kudihuku? 6Chinayileji mazu awa, munyichima yenu mudi kwakuneŋa hohu. 7Hela chochu, nukuyileja mwalala nami, chinukufumahu chikuyiwahilenu; neyi nukubula kufumahu, Nkwashi hakwinza kudenuku; ilaŋa neyi nukuya, nakamutemesha enzi kudenu. 8Niyena chakenzayi, wakakonkolola antu ampata yamunu mwishina nansaŋu yanshidi, nansaŋu yakuloŋa, ninansaŋu yakusompesha. 9Wakayikonkolola hansaŋu yanshidi nanichi chabulaŋawu kuŋitiya; 10hansaŋu yakuloŋa nanichi chinukuya kudi Tata, himwakanmona cheŋuku; 11hansaŋu yakusompesha nanichi chaneliyi mwanta wampata yamunu mwishina anamusompeshi dehi.

12Nichidi nayuma yayivulu yakuyileja, ilaŋa katataka himukuyitweshaku. 13Ilaŋa chakenzayi Spiritu wansaŋu yalala, wakayileja mwahita nsaŋu yalala yejima. Hakahoshaŋa yakumucnima windi yomwenuku, wakahoshaŋa mwatiyaloŋayi mwejima, wakashimunaŋahu dehi yuma yakenza.

14Yena wakanlemesha, wakatambula yuma yamami, wakayishimwinamu enu. 15Yuma yaTata yejima yamami; dichi chineli nami wakatambula yuma yamami, wakayishimwinamu enu.

16Mukuhita kapinji kanti himukunmonaku; mwakahita kapinji kakwawu kanti mwakanmona. 17Dichi atumbanji twindi amu hiyakudihula nawu, Chanatulejiyi nindi, Mukuhita kapinji kanti himukunmonaku, mwakahita kapinji kakwawu kanti mwakanmona; cheŋi nindi, muloŋa nukuya kudi Tata; chaya mudihi? 18Dichi hiyakudihula nawu, Chanatulejiyi nindi, Mukuhita kapinji kanti; chaya mudihi? Etu hituneluki mwanatulejiyuku. 19Yesu neluki dehi chakukeŋa kumwihulawu; hakuyila nindi, Mudi nakudihujola nsaŋu yamazu inahoshi nami mukuhita kapinji kanti himukunmonaku, mwakahita kapinji kakwawu kanti mwakanmona; tahindi? 20Chalala chalala, nukuyileja nami, mukudila, mukululuta, hakwila antu ampata yamunu mwishina akuzaŋalala. Enu mukuneŋa, ilaŋa kuneŋa kwenu kwakabalumuka muzaŋalu. 21Mumbanda waneŋaŋa hafunyishaŋayi, muloŋa mpinji yindi yinamuwani dehi; hakwila neyi navwali dehi mwanindi, hakwanuka nawa cheŋi ihuŋuku, nakuzaŋalala namuntu navwaliki mumpata yamunu mwishina. 22Dichi enu mudi nakuneŋa katataka, ilaŋa nakayimona cheŋi, mwakazaŋalala munyichima yenu, nimuzaŋalu wenu kwosi wakayitambulawuku. 23Dena ifuku odu himwakaŋihula cheŋi chumaku. Chalala chalala, nukuyileja nami, neyi hadi chuma chimwakamulomba Tata, wakayinkachu mwijina dami. 24Kanda mulombaŋahu dehi chuma mwijina damuku. Lombenu mutambuli, kulonda muzaŋalu wenu wuwanini.

25Nahoshi nenu mwenimu nayishimu, ilaŋa mpinji yakenza hinakahosha nenu nayishimuku, nakayileja Tata chalumbuluka. 26Dena ifuku odu mwakalomba mwijina dami; hinukuyila nami yami nakayilombela kudi Tataku, 27muloŋa yomweni Tata wayikeŋa nanichi chimunankeŋami, nanichi chimunetiyi nenu ami nafumini kudi Tata. 28Nafumini kudi Tata, nenzi mumpata yamunu mwishina; cheŋi nawa nukufuma mumpata yamunu mwishina, nukuya kudi Tata.

29Atumbanji twindi hiyakwila nawu, Ichi dinu hiwukuhosha chalumbuluka, hiwudi nakuhosha nayishimuku. 30Ichi dinu tuneluki dehi netu eyi weluka yuma yejima, hichikweti kukwihula chuma kudi muntuku. Dichi tunetiyi netu wafumini kudi Nzambi. 31Yesu hakuyakula nindi, Ichi dinu munetiyi, tahindi? 32Talenu, mpinji yikwinza, eŋa yinenzi dehi, yakuyipalaŋeshawu wejima wenu, muntu nakwindi, muntu nakwindi, mukunshiya kanka wami; ilaŋa hinidi kanka wamuku, nidi naTata. 33Chinahoshi nenu mwenimu, nalondi nami mumoni kuwunda mudami. Mukumona lukadi mumpata yamunu mwishina, ilaŋa tiyenu kuwaha, ami nemiki mpata yamunu mwishina mushindu.

Currently Selected:

Joani 16: MW62

Highlight

Copy