Joani 14

1Bayi mwakama munyichima yenuku. Mwamukuhwelelaŋa Nzambi, nkuhwelelenu ninami nawa. 2Mwitala daTata yami mwakushakama mwekala mwamuvulu; neyi himwadiŋi chochochuku nadi kuyileja. Nukuya nakuyiloŋeshela mwakushakama. 3Chineli nami nukuya nakuyiloŋeshela mwakushakama, ami aweni nakenza cheŋi nakuyitambula; kulonda kunakekalami, diku mwakekali ninenu nawa. 4Njila yakunukuyami mwayiluka dehi. 5Tomasi hakumwila nindi, Mwanta, hitweluka kuwukuyaku; indi njila tukuyiluka ŋahi? 6Yesu hakumwila nindi, Ami yami njila, yami walala, yami wumi. Kwosi muntu niwumu wukwinza kudi Tata chiŋa hadami. 7Neyi mwaŋilukili, mutenowu mwadi kwiluka niTata yami nawa; kufumisha kulelu munamwiluki, munamumoni dehi.

8Fwilipu hakumwila nindi, Mwanta, tuleji Tata; dimu tunakeŋi hohu. 9Yesu hakumwila nindi, Eyi Fwilipu, munashakami nenu mwejimimu, wubuli kuŋiluka? Muntu nanmonami namoni Tata. Wunelilidi neyi, Tuleji Tata? 10Chinekalami mudi Tata, niTata mudami, eyi kwitiyamu nehi? Awa mazu nayilejaŋa, himazu akumuchima wamami awenuku, Tata washakama mudami diyi wudi nakukalakala nyidimu yindi. 11Ŋitiyenu nenu nekala mudi Tata niTata wekala mudami; hela neyi omu nehi, ŋitiyilenu kwanyidimu yayeni.

12Chalala chalala, nukuyileja nami, muntu wukunkuhwelela, nyidimu yinukukoŋa niyena wakayikoŋa; wakakoŋa niyakubadika iyi, nanichi chinukuya kudi Tata. 13Chonsu chimukulomba mwijina dami nukuchila, kulonda Tata amulemesheli mudi Mwana. 14Neyi mukulomba chuma mwijina dami nukuchila.

15Neyi mwankeŋa, mukuhembaŋa munayilejaŋa. 16Ami nakamulomba Tata, wakayinka Nkwashi mukwawu akekali nanenu nyaka yejima. 17Yowu Spiritu wansaŋu yalala, abulaŋa kutwesha kutambulawu kudi antu ampata yamunu mwishina; muloŋa abulaŋa kumumona, hela kumwiluka hiyamwilukaku; ilaŋa enu mwamwiluka muloŋa washakama nanenu, wakekala mudenu.

18Hinakayishiya neyi anshonaku; nakenza kudenu. 19Kunashali kapinji kantesha hohu, antu ampata yamunu mwishina hiyakanmona nawa cheŋuku; ilaŋa enu mwakanmona; chinahandaŋami, dichi chimwakahandaŋa ninenu. 20Ifuku odu mwakeluka nenu ami nekala mudi Tata yami, ninenu mwekala mudami ninami mudenu. 21Muntu wukweti mazu inayilejaŋa nakuyihemba, diyi wankeŋa; ninowu wankeŋa akumukeŋa kudi Tata yami, ninami nukumukeŋa, nukudimwekeshaŋa kudi yena. 22Yuda wacheŋi, hiIsakarotuku, hakumwihula nindi, Eyi Mwanta, ichi chiwukudimwekesha kudetu, wubuli kudi mwekesha kudi antu ampata yamunu mwishina, chikufuma hanka? 23Yesu hakumwakula nindi, Muntu wankeŋa wukuhemba mazu ami; Tata yami wukumukeŋa, ninetu tukwinza kudi yena tukushakama nindi. 24Muntu wabula kunkeŋa hahembaŋa mazu amuku; nimazu imukutiya hiyamuku, aTata wantemesheli.

25Nasambilaŋahu dehi kuyileja mazu awa hohanu nichidi kushakama nanenu. 26Ilaŋa Nkwashi, diyi Spiritu Wajila, akatemeshawu kudi Tata mwijina dami, diyi wakayileja yuma yejima, wakayanukisha yinayileji yejima. 27Kuwunda nayishiyih; kuwunda kunawundaŋami nayinki. Hinayinki neyi chahanaŋawu antu ampata yamunu mwishinaku. Bayi mwakama munyichima yenuku, bayi mutiya hela womaku. 28Munatiyi chinayili nami nukuya kwacheŋi, nakenza kudenu. Neyi mwankeŋa, mutenowu munazaŋalali nanichi chinukuya kudi Tata, muloŋa Tata wambadikami. 29Nayilejaŋahu dehi hohanu hichichidi kanda chinzi, kulonda chichakenza mwaketiyi. 30Hinukuhosha cheŋi nanenu mazu amavuluku; muloŋa mwanta wayulaŋa mpata yamunu mwishina hakwinza; niyena hakweti chuma mudamuku. 31Ami nelaŋa mwanlejeli Tata, kulonda antu ampata yamunu mwishina akeluki nawu nakeŋa Tata. Nyamukenu tuyenu kwacheŋi.

Currently Selected:

Joani 14: MW62

Highlight

Copy