Marko 12

Enkitanyaanyukoto e nkurma oo lng'anayio o laisiaayiak oitaakaki

(Mat 21.33-46; Lk 20.9-19)

1 # Isa 5.1,2 Neiteru Yesu airorie ninche too nkitanyaanyukot ajoki, “Etuuno oltung'ani enkurma oo sabibu, neitaman enkikarrata, neturu engumoto naironyieki lng'anayio, neshetu oltalet oodo, neitaaki laturok enkurma enye, nelo enkop nalakua. 2Ore pee ebau enkata enye, neirriwaki lelo aturok osinka, meishoo ematua oo lng'anayio le ina kurma. 3Neibung lelo aturok ilo sinka near, nearaa meeta toki. 4Neitoki ake airriwaki likae sinka, nebor ilo elukunya, neinyal aasul. 5Neirriwaki ake likae, near ilo metua; neiko sii neijia kulikae kumok, neosh kulikae near kulikae metuata. 6Neaku eton apa eeta likae obo, laa oinoti lenye kirotet; neirriwaki aitabayie ninye, nejo, ‘Keyanyit oinoti lai.’ 7Kake etiakinote lelo aturok ooitaakaki enkurma, ‘Ele doi olajung'oni; wootu, mataar metua pee eaku enaang enjung'ore.’ 8Neibung ninche ninye near metua, nenang'aki auluo ina kurma oo sabibu. 9Kaa kenya eitaas olopeny ina kurma oo sabibu? Kelotu kenya aidaikie lelo aturok neisho ninye kulikae enkurma oo sabibu. 10#Olk 118.22,23Keitu doi isumusumu ele kigeroto ojo,

‘Ilo soit otanyaita ilashetak otaa osoit kitok lo lmairroto;

11Olaitoriani otaasa ena, naa ene nking'asia too nkonyek ang’?”

12Neing'oru ninche eneiko pee eibung Yesu, kake etureita olorere, amu etayioloito aajo ninche eipirta ina kitanyaanyukoto; neaku eshomo aaing'uaa.

Enkikilikuanata naipirta elaata e kodi

(Mat 22.15-22; Lk 20.20-26)

13Neirriwakini Yesu ematua oo Ilfarisayo o ematua oo le ncholiek e Herode, pee epuonu aarresh too rorei lenyena. 14Nepuonu enetii nejoki, “Olaiteng'enani, kiyiolo aajo ira iyie, asipani, nimishilaa hoo iyie likae tung'ani; amu mishilaa enkitoo oo ltung'ana, kake enkoitoi ake e Nkai iutaa too sipat. Keishiaakino te nikincho Kaisari kodi, anaa aimeishiaakino? 15Aikilak, ana aimikilak?” Kake ore amu etayiolo Yesu esunkuroisho enye, nejoki, “Kainyoo pee kitemiteme? Eyakaki empisai, maing'ura.” 16Neyakini. Nejoki ninche, “Ai ng'ae ele osirakino ena pisai naa ae ng'ae eigero?” Nejokini, “Kaisari.” 17Nejoki Yesu ninche, “Enchoo Kaisari ine Kaisari, ninchosho Enkai ine Nkai.” Neing'asiakino ninche Yesu oleng.

Eetuoki sii aaikilikuanishore Yesu too mbaa e mpiunoto

(Mat 22.23-33; Lk 20.27-40)

18 # Iat 23.8 Nepuonu Sadukayo enetii Yesu, lelo taa oojo eji meetae empiunoto; neikilikuan aajoki; 19#Enkig 25.5“Olaiteng'enani, eigeroko Musa iyiook nchere te neye oltung'ani alashe olikae, neing'uaa enkitok meeta enkerai, neyam olalashe ina kitok, pee eiki olalashe nkera. 20Eetae apa lalashera oopishana; neyam olbotor enkitok, ore pee eye neitu eing'uaa nkera. 21Neyam oliaare, neye neitu eiu nkera; naa neijia eikuna oliokuni; 22neaku eitu eing'uaa nkera pokira oopishana. Ore te nkiting'oto neye ina kitok. 23Amaa kenya te mpiunoto oo lootuata, keaku ene ng'ae ina kitok? Amu eyama naa pokira oopishana?” 24Nejoki Yesu ninche, “Eijojo mme nji taa doi etiu pee ipong'oriri, mme ilkigerot miyiololo nimiyiololo sii engolon e Nkai? 25Amu te nepiu kenya lelo too lootuata, meyamisho nemeyami, kake ketiu anaa lmalaika te keper. 26#Ena 3.6Naa amaa doi enkitopiunoto oo lootuata, keitu isumusumu too nkitanapat e Musa, te noshi wueji neimaki osanag oyupuyup, pee ejoki Enkai ninye. ‘Ara nanu Enkai e Abraham, o Enkai e Isaak o Enkai e Yakobo?’ 27Mme Enkai oo lootuata ninye, kake enoo looishu, itapong'ori oleng.”

Enkitanapata kitok te pooki

(Mat 22.34-40; Lk 10.25-28)

28Nelotu obo loo laiteng'enak loo nkitanapat nening eishankarra, ore pee ening ajo etawalikia Yesu aitobiraki, neikilikuan ninye ajoki, “Kaa kitanapata naituruk?” 29#Enkig 6.4,5Newaliki Yesu ajoki, “Ena naituruk, ‘Toning'o iyie Siraeli; Enkai ang Olaitoriani; obo Olaitoriani; 30naa tonyorra Olaitoriani Enkai ino to ltau lino pooki, o te nkishui ino pooki, o te ng'eno ino pooki, o te ngolon ino pooki.’ 31#Ilaw 19.18Naa ena eniare, ‘Tonyorra ole latia ino anaa eninyor kewan.’ Meetae ae kitanapata kitok nalang nena.” 32#Enkig 4.35Nejoki ilo aiteng'enani loo nkitanapat, “Itisipa, Olaiteng'enani; itisipa nchere nabo Enkai, nemeetae likae leme ninye; 33#Hos 6.6naa ti ninyorru ninye to ltau lino pooki o te ng'eno ino pooki, o te ngolon ino pooki, ninyorru sii ole latia ino anaa eninyor kewan, nelang nena kishorunot pooki naapeji elulung'a nelang ilasarri ake pooki.” 34#Lk 10.25-28Ore pee edol Yesu ajo etawalikia te ng'eno, nejoki, “Milakuaniki iyie enkitoria e Nkai.” Ore ebaiki ina kata, metii oltung'ani onyaaka aitieu aikilikuana Yesu ae bae.

Embae naikilikuanua Yesu tialo Mesia

(Mat 22.41-46; Lk 20.41-44)

35Ore eiteng'enisho Yesu te nkaji e Nkai, nejo, “Kaji etiu pee ejo laiteng'enak loo nkitanapat Kristo eji olayioni le Daudi? 36#Olk 110.1Netejo Daudi openy, etuutaka Enkiyang'et Sinyati, nchere, ‘Etiaka Olaitoriani, Olaitoriani lai, Totona te nkaina ai e tatene, o matipika lmang'ati linono abori nkejek inono.’ 37Eipoto Daudi openy ajo Olaitoriani; kaji eitoki aakunye enkerai enye?” Neinining ilo orora kitok ninye te ng'ida.

Eisikong'a Yesu ilaiteng'enak loo nkitanapat

(Mat 23.1-36; Lk 20.45-47)

38Ore eiteng'enisho Yesu nejo, “Entodol ake ate too laiteng'enak loo nkitanapat, oonyor aaishopo lkilani adoru neyieu neirorokini too neemirishoreki, 39nenyor ilorikan le nkitoo too nkajijik e nkomono o wuejitin e nkitoo too mashoi, 40nedaare nkajijik oo nkolia neitaakuno eitoodor enkomono. Keyooki lelo aatum enkiguana kitok.”

Enkishorunoto naishorua enkoliai

(Lk 21.1-4)

41Neton Yesu aishiaakinore eneitadoikini mpisai e nkaji e Nkai, nejur olorere epik mpisai ilo sanduku. Nepik iltung'ana kumok karsisi te nkumoi. 42Nelotu enkoliai aisinani, nepik isuyan are naabaya olking'otore obo. 43Neipotu Yesu lkipaareta lenyena enetii, nejoki, “Esipa, ajoki intae, etipika ena oliai aisinani nkumok alang lelo kulikae pooki ootipika ilo sanduku. 44Amu etipika pooki te nkumoi naata; kake ore ninye to sina lenye netipika entoki duoo pooki naata, entoki duoo pooki naishuyie.”

Currently Selected:

Marko 12: BIBLIAPRO

Highlight

Copy