Marko 11

Etijing'a Yesu Yerusalem te nkisisa

(Mat 21.1-11; Lk 19.28-40; Yhn 12.12-19)

1Ore pee etaaniki ninche embata e Yerusalem, aabaiki Betfage o Betania, to Ldoinyo loo Loirienito, neirriwaa Yesu lkipaareta aare lenyena, 2nejoki, “Enchom enda ang naipirare intae, ore ake pee ijing'ijing'i nitumutumu olkurrarru oena, leitu ae kata eked likae tung'ani. Entalaku entereu ene. 3Ore te nejoki intae oltung'ani, ‘Kainyoo pee inkoko inji?’ Entejo, ‘Olkitok oatayie enkolat naa keshuku nabo kata.’ ” 4Nepuo ninche, neinepu olkurrarru eena te kishomi ti auluo enkoitoi nalala e nkanasa, nelaku ninche. 5Nejoki lelo ooitashe teine, “Kainyoo pee igirara aalaku olkurrarru?” 6Neliki ina natiaaka Yesu, neisho ninche meshomo. 7Nerewaki Yesu ilo kurrarru, neirotoki lkilani lenye, neked atonie. 8Neisalaash ilkumok lenye lkilani te nkoitoi nalala, neisalaash kulikae ilng'osil ooata mbenek ootudung'utuo too nkurman. 9#Olk 118.25,26Ore lelo ooituruk o loosujita nebuaku aajo, “Hosana! Emayiana ilo olotu te nkarna o Laitoriani! 10Emayiana enkitoria nalotu e papa lang Daudi! Hosana te shumata naisul!”

11Nejing Yesu Yerusalem, nelo atua enkaji e Nkai, ore pee eshil pooki toki, nemuto, neipang alo Betania o lelo pokira tomon o aare.

Etediaa Yesu olnga'aboli

12Ore te nkolong nasujita ina, pee eshukunye Yesu te Betania, netir esumash. 13Ore pee edol te nelakua olng'aboli oata mbenek, nelo ejo ebaiki netumie toki. Nejo abaiki, mbenek ake eeta, amu mme enkata oo lng'abolo. 14Nejoki ilo ng'aboli, “Metaa mikingil likae anyayie lng'anayio ntarasi.” Nening lkipaareta lenyena.

Etooro Yesu enkaji e Nkai

(Mat 21.12-17; Lk 19.45-48; Yhn 2.13-22)

15Nepuonu Yerusalem. Nejing Yesuenkaji e Nkai neiteru aaraa lelo oomirisho o looinyang'isho te nkaji e Nkai, neibeleleng'oo imisai oo laibelekenyak loo mpisai o lorikan le lelo omir inturkuluoni; 16nemit meitoki oltung'ani anap toki aitudung enkaji e Nkai. 17#Isa 56.7; Yer 7.11Neiteng'enisho, nejoki ninche, “Keitu eigeri aajo, ‘Keaku enkaji ai ene sayiare too loreren pooki?” Kake intaa intae enkapune oo laisimak. 18Nening ilapolosak kituaak o laiteng'enak loo nkitanapat ina neing'oru enkoitoi pee ear Yesu; kake etureita ninye, amu eing'asiayie enkikoo enye ilo orora pooki. 19Ore pee ebau enteipa neipang teina anasa.

Enkiteng'ena o lng'aboli otoyio

(Mat 21.20-22)

20Ore epuoito te nkakenya, nedol olang'ole ng'aboli etoyio o metabaiki intona. 21Nedamu Petero nejoki Yesu, “Olaiteng'enani, ng'ura ajo etoyio olang'ole ng'aboli litediaa!”

22Newaliki Yesu ajoki, “Eruko Enkai. 23#Mat 17.20; 1 Ilkor 13.2Esipa ajoki intae, ore ake olojoki ele doinyo, ‘Tadotunye tanang'akinoyu enaiposha’, nemeing'ash to ltau lenye, kake neiruk ina najo nchere keaku, neaku te ninye anaa enatejo. 24Metaa ajoki intae, ore embae ake pooki ninkilikuanunu te nkomono, eruko nchere itumutumu neaku ina. 25#Mat 6.14,15Naa ore nkatitin pooki nintasheshe aaomon, entapalakinoto pee epalaki sii ninche intae Papa linyi otii keper nkitarruorrot inyi. 26(Kake ti nimipalakinono, nemepalaki sii ninye Papa linyi otii keper intae nkitarruorrot inyi.)”

Eikilikuanaki Yesu enenotie engolon nataasishore

(Mat 21.22-27; Lk 20.1-8)

27Neitoki ake aapuonu Yerusalem. Ore eloolo Yesu te nkaji e Nkai, nepuonu aayiaya ninye ilapolosak kituaak o lasirak o lpayiani. 28Nejoki ninche ninye, “Kaa golon ena niaasie iyie kuna baa, naa ae ng'ae likinchoo ena golon niasie?” 29Nejoki Yesu ninche, “Kaikilikuan intae embae nabo; entawalikiaki pee, aliki intae engolon naasie kuna baa. 30Amaa apa enkibatisare e Yohana ae keper eing'uaa anaa ei ltung'ana? Entawalikiaki.” 31Neishankarra aajo maate, “Ti nikijo, ‘Keper eing'uaa,’ naa kejoki iyiook, ‘Oo naa pee eitu irukuruku?’ 32Kake ti nikijo, ‘Ltung'ana eing'uaa?’ ” Neureyu iltung'ana, amu etonyorraitie pooki inchere oloiboni le Nkai o dede Yohana. 33Neaku etawalikitia Yesu aajoki, “Mikiyiolo.” Nejoki Yesu ninche, “Maliki sii nanu intae eneing'uaa enkitoria naasie kuna baa.”

Currently Selected:

Marko 11: BIBLIAPRO

Highlight

Copy