Marko 10

Eiteng'enishe Yesu inaipirta eoro o lee o enkitok enye

(Mat 19.1-12; Lk 16.18)

1Nedumunye Yesu teina alo, nelotu olkerenket le Yudea te lido kekun le Yordan, neiturrurrokino ninye aaitoki iltung'ana kumok enetii ninye; neitoki ake aiteng'en ninche anaa enatamoo apake.

2Nepuonu Ilfarisayo enetii ninye neikilikuan, ejo pee etem aajoki, “Keishiaakino te neiturraa oltung'ani enkitok enye?” 3Newaliki Yesu ajoki, “Kaa eitanapa intae Musa?” 4#Enkig 24.1-4; Mat 5.31Nejoki, “Eishorua Musa meigeroki oltung'ani enkitok enye empalai naiturrarie, nearaa.” 5Kake etiaaka Yesu ninche, “Te nkaraki engolon oo ltauja linyi pee etisiraka intae ina kitanapata. 6#Enk 1.27; 5.2Kake ore ebaiki enkiterunoto e nkop, eitobira Enkai olee o eng'oruoi. 7#Enk 2.24Te nkaraki ena pee eing'uaa olee menye o ng'otonye, neibung'are enkitok enye, 8neaku ninche pokira are osesen obo, Metaa meekure era are kake etaa osesen obo. 9Ore naa inaaitutumo Enkai mincho ake erish oltung'ani.”

10Ore ti aji neitoki ake lkipaareta lenyena aaikilikuan ena bae. 11#Mat 5.32; 1 Ilkor 7.10,11Nejoki ninye ninche, “Ore ake oloiturraa enkitok enye neyam ae, keloloito. 12Naa te neiturraa enkitok olmoruo lenye, nelo meyama likae, keloloito.”

Etamayiana Yesu inkera kutiti

(Mat 19.13-15; Lk 18.15-17)

13Neyakini Yesu nkera kutiti pee etum aiteleiki nkaik, nebuaaki lkipaareta lenyena lelo tung'ana ooriku. 14Ore pee edol Yesu ina, negoro, nejoki lkipaareta lenyena, “Enchoo nkera epuonu enatii emimitiki; amu enoo nkera naatiu anaa kuna enkitoria e Nkai. 15#Mat 18.3Kesipa ajoki intae, ore olemeng'amu enkitoria e Nkai anaa enang'amu enkerai kiti, nemejing katukul.” 16Nemuataki inkera inkaik amayian, neiteleiki nkaik nemayian ninche.

Oltung'ani karsis

(Mat 19.16-30; Lk 18.18-30)

17Ore te nkoitoi epuku Yesu alo, nekuetiki oltung'ani negilaki kung, neikilikuan ajoki, “Olaiteng'enani supat, kaji aiko pee ajung enkishui nemeish?”

18Nejoki Yesu, “Kaji etiu pee kijo nanu supat? Meetae hoo obo supat, Enkai ake esupat. 19#Ena 20.13; Enkig 5.17; Ena 20.14; Enkig 5.18; Ena 20.15; Enkig 5.19; Ena 20.16; Enkig 5.20; Ena 20.12; Enkig 5.16Iyiolo iyie nkitanapat, inchere, ‘Miar metua, miloloito, mipurrisho, minteeniki likae elejare, minkonyisho to losek, iyanyita minyi o ng'utunyi.’ ”

20Nejoki ninye, “Olaiteng'enani, aibung'a kuna pooki ebaiki apa ara enkerai.” 21Neing'or Yesu ninye akurraki nkonyek nenyorru, nejoki, “Nabo ake nikitong'orikia; shomo, timira iniata pooki nincho laisinak, naa itum olchumati te keper; nikilotu taa asuj.” 22Neidisie enkomom enye teina bae, nelo eisinanuo; amu keeta imasaa kumok.

23Neing'or Yesu nkaloli pooki, nejoki lkipaareta lenyena, “Kegol atiu aja to lkarsis pee ejing enkitoria e Nkai!” 24Neing'asia lkipaareta too rorei lenyena. Kake eigilie Yesu ajoki, “Nakera, kegol atiu aja pee ejing oltung'ani enkitoria e Nkai! 25Entames nalelek te neim enaudoto o ltidu alang olkarsis ejing enkitoria e Nkai.” 26Neing'asia lkipaareta lenyena oleng, nejoki ninche ninye, “Ae ng'ae naa kenya oidim atajeu?” 27Neing'or Yesu ninche nejoki, “Meidimayu too ltung'ana, kake mme neijia etiu te Nkai; amu keidimayu mbaa pooki te Nkai.” 28Neiteru Petero ajoki ninye, “Kitung'uaitie iyiook pooki toki aasuj iyie.”

29Nejo Yesu, “Esipa ajoki intae, meetae hoo obo otung'uayie enkaji anaa lalashera anaa nkanashera anaa ng'otonye anaa menye anaa nkera anaa nkurman, te nkaraki nanu o te nkaraki kulo omon supati, 30lemetum inkatitin iip taata te na kata, aa nkajijik o lalashera o nkanashera o noo ng'otonye o nkera o nkurman te nebo oloisilisili, naa ore te ina kata nalotu netum enkishui nemeish. 31#Mat 20.16; Lk 13.30Kake etii ilkumok ooiturukutuo ooyooki aaku ile siadi, neaku ilooisiadutua ile dukuya.”

Eigila ake Yesu ene uni alimu keeya o empiunoto enye

(Mat 20.17-19; Lk 18.31-34)

32Ore etii Yesu o lkipaareta lenyena enkoitoi, eilep aapuo Yerusalem eiturukito Yesu te dukuya ninche; neing'asia ninche, ore iloosujita netureishote. Neitoki ake arik lelo tomon o aare neiteru aliki nena naapuo aatum ninye. 33Nejoki, “Yerusalem kilep aapuo; naa keitarasakini Enkerai e Tung'ani ilapolosak kituaak o laiteng'enak loo nkitanapat, nedung'oki ninche ninye enkiguana e keeya, neitarasaki Iloreren; 34nesukeny ninche ninye, nenotaki, neosh aaitame near metua ore pee eishari nkolong'i uni nepiu.”

Embae natoomonutuo Yakobo o Yohana

(Mat 20.20-28)

35Neisho Yakobo o Yohana, ilayiok le Sebedayo, nepuonu enetii Yesu, nejoki, “Olaiteng'enani, kiyieu nintaas iyiook embae ake pooki nikiomon iyie.” 36Nejoki ninye ninche, “Kainyoo iyieuu naitaas intae?” 37Nejoki ninche, ninye, “Inchoo iyiook metotona obo lang te nkaina ino e tatene neton olikae te ne kedianye, te nkitoo ino.”

38 # Lk 12.50 Kake etiaaka Yesu ninche, “Miyiololo intae ina niomonunu. Indimidimi sa aatook enkikompe naok nanu, aashu meibatisai intae te nkibatisa naaibatisai nanu?” 39Nejoki, “Ee kindim.” Nejoki Yesu ninche, “Iokioko taa ninye enkikompe naok nanu, neibatisae intae te nkibatisa naaibatisai nanu; 40kake ore entonata te nkaina ai e tatene aashu te ne kedianye, mme nanu oishoru, kake ene lelo laa ninche eitobirakaki.” 41Ore pee ening lelo pokira tomon ina, neiteru aagorokino Yakobo o Yohana. 42#Lk 22.25,26Neipotu Yesu ninche enetii nejoki, “Iyiololo aajo ore lelo ooitaa ate ilaitoriak loo Loreren neitoreisho te ng'olon, negilu iltung'ana lenye kituaak ninche. 43#Mat 23.11; Mk 9.35; Lk 22.26Kake mme neijia etiu te intae, kake ore olinyi oyieu neaku kitok neaku olaisiaayiani linyi, 44ore oloyieu neituruk neaku osinka le pooki. 45Amu eitu elotu Enkerai e Tung'ani meisiaai kake keewuo aisiaaisho, neishoru enkishui enye metaa elakunoto oo lkumok.”

Eishiunye Yesu olmodooni oji Bartimayo

(Mat 20.29-34; Lk 18.35-43)

46Nepuonu Yeriko; ore epuo aaing'uaa Yeriko eiriamariyie Yesu lkipaareta lenyena o lorora kitok, netii olmodooni oomonisho oji Bartimayo ole Timayo, oton te mbata e nkoitoi. 47Ore pee ening eji Yesu le Nasaret ilo neiteru abuak eishiraki ajo, “Yesu, olayioni le Daudi, ing'urrieki!” 48Nebuaaki ilkumok aajoki metigirayu; kake etabuaa oleng ajo, “Olayioni le Daudi, ing'urrieki nanu!” 49Neitashe Yesu nejo, “Empoto.” Neipoti ilo tung'ani modooni aajoki, “Intagoluoyu; inyo amu kimpot ninye.” 50Nenang'aa olkila lenye, neipid nelo enetii Yesu. 51Neng'amaa Yesu ajoki, “Kaa iyieu naaitaas?” Nejoki ilo modooni, “Lo kitok kayieu nadolishoyu.” 52Nejoki Yesu, “Shomo, kinchiunye enkirukoto ino.” Nedolishoyu ina kata ake neirukurukore Yesu te nkoitoi.

Currently Selected:

Marko 10: BIBLIAPRO

Highlight

Copy