Marko 13

Etolimuo Yesu nchere keyookini aar ina aji e Nkai

(Mat 24.1-2; Lk 21.5-6)

1Ore ina kata epuku Yesu te nkaji e Nkai, nejoki obo loo lkipaareta lenyena ninye, “Olaiteng'enani, ng'ura eneba kulo soito le nking'asia o kuna ajijik e nking'asia!” 2Nejoki Yesu ninye, “Idol kuna kituaa ajijik sapuki? Meing'uari tene osoit obo oiteleikino olikae lemesulakini enkop.”

Enkiterunoto oo ntabo

(Mat 24.3-14; Lk 21.7-19)

3Ore etonita Yesu to Ldoinyo loo Loirienito eipirare enkaji e Nkai, neikilikuan Petero o Yakobo o Andrea too nkurrat aajoki, 4“Toliki iyiook, kanu ebau kuna baa, naa kalo olmonekie oitodolu enkata nataanu kuna baa pee eitabari?” 5Neiteru Yesu ajoki, “Enteng'enuoto meitapong'oo intae oltung'ani. 6Kepuonu lkumok te nkarna ai, ejo, ‘Nanu ilo!’ Neitapong'oo lkumok. 7Naa te nining'ining'i njoreitin o lmarenke loo njoreitin, eming'aing'ae; amu meeta nchere pee metiu neijia; kake eton eng'or ina kiting'oto. 8Amu kedumakino olorere olikae orere, nedumakino enkitoria enkae kitoria; netumi olokirikiri le nkop too wuejitin kumok, netumi lameitin; naa ena enkiterunoto oo sinaitin.

9 # Mat 10.17-20; Lk 12.11,12 “Kake entodol ate. Amu keitarasakini intae nkiguanat; neari intae too nkajijik enye e ntumo; nintasheshe te dukuya ilaitoriak o laiguanak te nkaraki nanu, pee iakuku shakeni te dukuya ninche. 10Nemeeta nchere pee meng'asi aalikioo ele rorei supat too loreren pooki. 11Naa ore pee erikuni intae enkiguana aaitarasaa, eming'aing'ae te dukuya aajo aikijo aa; kake ina naishori intae teina saa entejo, amu mme intae ooiro, kake Enkiyang'et Sinyati. 12Naa keitarasaa olalashe olalashe lenye metari metua, neitarasaa menye enkerai enye, nedumakino nkera iloomenye, neitarasaa metari metuata. 13#Mat 10.22Naa keibayuni intae iltung'ana pooki te nkaraki enkarna ai. Kake ore olong'iri ometabaiki enkiting'oto naa keitajeuni.

Osina kitok oleng

(Mat 24.15-28; Lk 21.20-24)

14 # Dan 9.27; 11.31; 12.11; 1 Mak 1.54; 6.7 “Kake ore pee idolidolo ina taboi nayau emutata eitashe te wueji nemeishiaakino (tayiolo taa ake oloisuma ena), esikaki ildoinyo ilootii Yudea. 15#Lk 17.31Ore olotii shumata enkaji nemedou ajing aji ashoroo ae toki.

16“Ore olotii enkurma nemeshuko ang ajo ashoroo olkila lenye. 17Wooi nena tuaan o naaitanakisho te nena olong'i! 18Entasaisho pee mebau nena te nkata e nkirobi. 19#Dan 12.1; Emb 7.14Amu ore te nena olong'i kepuonu isinaitin leitu ae kata etumi anaa apa pee eitayu Enkai enkop o te nne, nemeitokini ae kata aatum intarasi. 20Te neme Olaitoriani oitodorropa nena olong'i, anaata meetae hoo oltung'ani obo opok. Kake ore te nkaraki ilgelunot lenyena ootegelua ninye, neitodorropa ninye nena olong'i. 21Ore ina kata te nejoki intae oltung'ani, ‘Ng'ura, nele Kristo otii ende!’ Anaa ‘Ng'ura, nelido otii ende!’ Emiruk. 22Keinyototo loo Kristo le lejare o loibonok le lejare neitoduaaya lmonek o mbaa e nking'asia, ejo maitapong'oi, te naa keidimayu, ebaiki lelo ootegeluaki. 23Kake entodol ate; aidipa atoliki intae mbaa pooki te dukuya.

Elotunoto e Nkerai e Tung'ani

(Mat 24.29-31; Lk 21.25-28)

24 # Isa 13.10; Yoe 2.10,31; 3.15; Emb 6.12; Isa 13.10; Esek 32.7 “Kake ore te nena olong'i, etulusoitie lelo sinaitin, nemisimisu enkolong, nemeitoki olapa awang'u 25#Isa 34.4; Emb 6.13; Yoe 2.10nesulunye ilakir te keper, neikirikirieki engolon o loing'ang'e. 26#Dan 7.13; Emb 1.7Nedoluni ina kata Enkerai e Tung'ani elotu too nkatampo te ngolon sapuk o te nkitoo. 27Neirriwaa teina kata ilmalaika, meiturrurro lelo gelunot lenyena aaitung'uaa ilubot pokira ong'uan, neitung'uaa ineeiting'ie enkop o neeiting'ie keper.

Entuutarie ate olng'aboli

(Mat 24.32-35; Lk 21.29-33)

28“Enteng'ena ate te nkitanyaanyukoto o lng'aboli; laa ore ake pee enanau ilng'osil neiturumisho mbenek, niyiolouu aajo etinyikua erishata oladalu. 29Neijia naa etiu, ti nidolidolo nena baa etabautua, niyiolouu aajo etataana ninye, auluo etii. 30Esipa ajoki intae, meishari ena ishoi eitu eitabari kuna baa pooki. 31Keishari keper o enkop, kake meishari irorei laainei.

Meyioloi ina olong aashu ina saa

(Mat 24.36-44)

32 # Mat 24.36 “Kake ore ina olong o ina saa, meetae hoo obo oyiolo, aimeyiolo ninche lmalaika le keper, nemeyiolo Enkerai e Tung'ani, Papa ake oyiolo. 33Entodol ate, entashololoto; amu miyiololo aajo kanu ebau ina kata. 34#Lk 12.36-38Etiu anaa oltung'ani oshomo elototo, ore elo ti ang, neing'ueiki ilaisiaayiak, neisho ake oltung'ani eramatare enye, neitanap olorrip kishomi metashololoyu. 35Entashololoto naa amu miyiololo aajo kanu elotu olopeny enkaji, anaa ae te nteipa, anaa ae te nasirie 36pee melotu ake neluamisho neinepu intae irurara. 37Naa ore ina najoki intae, neijia ajoki pooki: entashololoto.”

Currently Selected:

Marko 13: BIBLIAPRO

Highlight

Copy