Luka 5

1Kyasia vandu vakasiṛa Yesu, amu vaaranye firero fa Iṛuva. Nae aselele kulya mbaai ya nruva ilya ya Genesareti. 2Kalolia-fo ngalava ivili tikee alya mbaai. Na vareya makunga veemoolokaa vasangye mireyo yawo. 3Kasaama ngalaveń ilya imwi, nayo ikee ya Simon. Kantereva aiserise kinnya na kulya nruveń. Kakaa rembo kalosha vandu akee ifo ngalaveń. 4Ammaa ilosha kaia Simon: Serisa ngalava yafo na kulya karikari ka nruva mwolote-fo mireyo yanu mureye makunga! 5Simon kamwaṛua kamwia: Nndumi, kio ki tindelala rembo barań tiireiyaanta iwara kindo. Kake kiimba kya kirero kyafo kwanshiia noolotaa mireyo yakwa mureń. 6Neeli vatana kuro, vakawara makunga meengi na mireyo yawo ikaranduka. 7Vakasinia vaaroe vawo vakee ngalaveń ilya ingi vashe ivaelekia yomua. Nawo vakasha vakaishuṛa ngalava tilya ivili makunga tikaemio̱ kufui tooloke nruveń. 8Ili Simon Petiro alolia ifi, kawa na si marendeń a Yesu kamwia: Uka kwakwa, Nndumi, fulya niń nkee nndu nrekwa. 9Fulya ataṛaaka nnu ye na valya woose vakee nae kiimba kya wiingi lwa makunga alya vawara. 10Na vana valya va Sebedayo wo Yakobo na Yohane vakee vaaroe va Simon nawo vaka-taṛaaka kuro da. Yesu kaia Simon: Manya kuteeṛee! Kuuka alli kuvaa mureya vandu. 11Vakawiiṛa ngalava alya mbaai vakabunawo findo foose vakasoṛa Yesu.

12Ili eekee muṛiń umwi wa miri ilya, ifo eeifoo nndu aworwa ni ivave deń. Nae ili andelolia Yesu, kawa si na kisangu kantereva eenumbuaa: Nndumi, kwankunda kumakii ishishiisa. 13Nae kasaaṛa uko lwamwi kambaana eereraa: Mfurie, va nsha! Lia eni ivave lyamwi likamwuka. 14Kavvavasa ataie nndu. Kamwia: Enda kundekworusa kulya kwa nkohani ulya. Kuniingie na kindo kyafo kya iniinga Iṛuva kiimba kya ishiiswa lyafo, sheeli kyavavaswa mMose, kive nkyo mirambuye ifo kwawo. 15Kake mboni tamwi tikaengeṛia ikwana. Na vandu vakakusandia matoroto meengi veemwaranyaa na ikiṛwa saka tawo. 16Kake ye muni kaiwukana kaenda kundo kutayo vandu. Katerevia-fo Iṛuva.

17Kyasia nkonu umwi eekee ilosha vandu, na Vafarisayo na valosha mavavaso veekee rembo io vaukie kimuṛin kyoose kya Galilaya na Yudaya na Yerusalemu. Na finya ya Nndumi iikee nae kamakii ikiṛa vandu. 18Lia eni vakasha na-wo vaseṛo varie nndu na kiraa atoṛokombie meengo. Vakaraya mwaanya wa imwata numba vanrwaa io akai. 19Ili vatuṛa mwaanya wa imwata numba kiimba kya wiingi lwa vandu, vakasaama mmbeewu vakauta-fo matufari kiindi alya eealiee vakamwolota na-wo andu emwi na kiraa alya Yesu akai. 20Nae ili andelolia sheeli vankusurie, kanumbua: Iwe nndu, kwamma itio̱ mareko afo. 21Kyasia vaaria va mitisine na Vafarisayo vakabooka yuṛana wo veni na veni vakanumbua: Ni nndu ki uu akee irera firero fa irama Iṛuva? Ni i amakii itia vandu mareko awo kitaare ni Iṛuva muni? 22Na Yesu kamanya makusaṛo awo kaaṛua kavaia: Nkiki mukee ikusaṛa ifo mirimiń yanu? 23Nkingaki kikee kyaangu? Ni inumbua: Kwantio̱ mareko afo ana ni inumbua: Kwimboo kwende? 24Na alli mumanyaa, sheeli Mwana wa nndu awore finya kunu isangeń ya itia vandu mareko awo. Kaia nndu ulya atoṛokombie meengo: Kwimboo kukurike kiraa kyafo, kwende kyeń kwafo! 25Lia eni kasalala mbele yawo kaimboo kiraa kilya akilaye. Kaenda kyeń kwamwi eeitikisaa Iṛuva. 26Vakariika woose vakaitikisa Iṛuva. Vakawarwa wweṛei veenumbuaa: Nnu tallolia findo fitaishiwa vvandu.

27Numa ya ifo kasomuka kaenda. Kalolia nndu nsaṅiṛia kyaalo, irina lyamwi lLevi, akee rembo andu a isaṅiṛia kyaalo. Kamwia: Shisoṛa! 28Nae kaburaya-wo foose kakwimboo kansoṛa. 29Na Levi kansongosia imutu inini numba kwamwi. Na mamwiingi wa vasaṅiṛia kyaalo na vandu vengi vakasha vakakaa-fo rembo shoongeń. 30Kyasia Vafarisayo na vaaria va mitisine vakaṅuṅuria vanalosho vamwi vakanumbua: Nki ili mukee ilya na inwa andu emwi na vasaṅiṛia kyaalo iwo na varekwa? 31Na Yesu kaaṛua kavaia: Valya vatalole vaṛuyaa mwaanga ndi kita iwo valole tubu. 32Nansha ivaanga vasumani ndi, kake warekwa, amu vailashike nrimiń.

33Nawo vakamwia: Nki ili vanalosho va Yohane vakootoya keengi na itereva, na vanalosho va Vafarisayo nawo da, na vanalosho vafo valee na inwa? 34Yesu kavaia: A mumakii ikabiṛia valya vavaange waliń vakootoye, na muni wali akee nawo? 35Kake mikonu ishaa, ili vautwaa muni wali, Uyo kyeeri kyo vakootoyaa. 36Kavakabia na sumu: Eefo nndu aminyaa kirami kya nseto mwiya kakifumia nseto nkuu ndi. Kakifumia-wo aranduaa na ulya mwiya, na kirami kilya kya nseto mwiya kiviaa nsetoń ito nkuu ndi. 37Ana eefo nndu amakii irwaa mfinyo mwiya mbolokoń shikuu ndi. Karwaa-fo, mfinyo to mwiya urandaa mboloko to. Nato wirikaa na mboloko tikashaa. 38Kake mfinyo mwiya kyawara urawa mbolokoń shiiya. 39Ana eefo nndu annwa mfinyo nkuu akunde lingi ito mwiya ndi. Amu anumbuaa: Ulya nkuu nto nnuru.

Currently Selected:

Luka 5: RWK72

Highlight

Copy