Luka 6

1Kyasia ili lya nkonu umwi wa Sabato kaira manremiń a ngano. Na vanalosho vamwi vakamushua fyaa vakafisisa vakalya. 2Kyasia kiindi kya Vafarisayo vakanumbua: Nki ili mukee itana kindo kitasumani nkonu wa Sabato? 3Yesu kaaṛua kavaia: Nta mwansoma se, kasa Davidi andetana lia eeworwaa nsoto ye na valya ariani nawo? 4Sheeli andeaka ifo numba ya Iṛuva kaimboo mikate ilya ya myorusie? Kailya kaniinga na valya ariani nawo. Nayo kitaare isumani iliwa ni nndu kita vvakohani veni. 5Kavaia: Mwana wa nndu yye Nndumi na wa Sabato. 6Neeli indeva Sabato ingi, kaaka numba ya iterevia kaloshia-fo. Neefo eeifoo nndu, na uko lwamwi usha lutoṛokombie. 7Na vaaria va mitisine na Vafarisayo veelleye si, akwaa akiṛaa nndu nkonu wa Sabato, amu vakooye kindo kya indiinga. 8Nae kamanya makusaṛo awo. Kaia nndu ulya wa uko lutoṛokombie: Kwimboo salala ia karikari! Kakwimboo kasalala-wo. 9Llyo Yesu avaia: Nkee imuuṛa ini: A kisumani itana fisha nkonu wa Sabato ana itana fikasha, ni ikiṛa muu wa nndu ana ni iureta? 10Kavalla koroo woose taari toose. Kaia nndu ulya: Saaṛa uko lwafo! Nae kalusaaṛa. Lia eni uko lwamwi lukava lingi usha. 11Nawo vakaishua sua vakakurera wo veni na veni: Nkiki titaniaa Yesu uu?

12Kyasia mikonu ilya kakwimboo kaenda uroń, amu andeterevia-fo Iṛuva. Kalala rembo kio barań eeterevaa Iṛuva. 13Neeli kundekya, kavaanga vanalosho vamwi. Kasaua ikumi na vavili kari kawo. Nawo wwo andevavaanga varumi. 14Nawo ni Simon, ito andevvaanga irina lyamwi lya kavili Petiro, na Anderea mwanamae, na Yakobo na Yohane, na Filipo na Baritolomayo, 15na Matayo na Toma, na Yakobo wa Alufayo na Simon avaangwaa Selote 16na Yuda wa Yakobo, na Yuda Isikariote, yye ulya andendiinga.

17Kainama andu emwi nawo kasalala andu a iverere. Na vandu veengi vakee vanalosho vamwi vakakusandia-fo. Na syamu shiingi ya vandu iifo vaukie kulya Yudaya koose na Yerusalemu na urukeń lukee mbaai ya nruva lua lwa Tiro na Sidon. Nawo vashe imwaranya na ikiṛwa saka tawo. 18Na akwaa vvalya veeatarwaa mmimuyo mikasha vakakiṛwa. 19Na syamu yoose vakafura imbaana, fulya awore finya yukiaa vandu ikavakiṛa woose.

20Nae kaimboo miso kalla vanalosho vamwi. Kanumbua: Mukee va ngoma ini mukee vakiva, amu umangi lwa Iṛuva llwanu. 21Mukee va ngoma ini muworwa nsoto alli, amu muwuuruswaa. Mukee va ngoma ini mukee iiya alli, amu musekaa. 22Mukee va ngoma ini, ili vandu vamusuaa na ikufukya na ini na imurumaruma na yeeṛa irina lyanu ifo wooṛo sha kindo kiravi kiimba kya Mwana wa nndu. 23Fureń nnu nkonu ulya na ikiliakilia! Fulya a va maṛe anu avva meengi iṛuvewu. Amu nkuro da vaande yawo vandetania vaauya valya. 24Kake ushi ini vayamasaa, amu ikyo kimuwiiṛia muu mwammaa ikooya. 25Ushi ini muwuusi alli, amu muliwaa nsoto. Ushi ini mukee iseka alli, amu mukunaṛiaa na iiya. 26Ushi ini vandu woose vakee imwaamba ulumi na imurera kinuru kyoose. Amu nkuro vaande yawo vandetania vaauya valya va wongo. 27Kake kindo nkee imuia ini mukee ishaaranya: Kundeń fituva fanu. Iwo vamusule vatanień finuru. 28Valya vamudenga vaniingeń mboṛa. Iwo vamuteenda vaterevień kwa Iṛuva. 29Na nndu kakukaba ui lwa usaa lumwi, mwaṛue na ilu lungi. Na nndu kakusoka nseto wa yeeṛia, manya kutamwime na ito kuṛee. 30Ulya woose akwombaa nniinge. Na ulya akusokaa ifo fafo, manya kutafure akuwiiṛie. 31Na sheeli mufurie vandu vamutanie ini, neeni vatanień kuro da. 32Amu kwakooya mwakunda valya vamukundie ini, ni usha lungalu muworeń? Amu na akwaa vvandu varekwa vakundaa iwo vavakunda. 33Na kwakooya mutaniaa fa usha iwo vakee imutania fa usha, a usha muworeń llo ki? Amu na akwaa vvandu varekwa mfo vatanaa kuro da. 34Na kwakooya mwakuyaa iwo tubu mwikusuraa muwiiṛio̱o̱ wwo kindo, mwaorusa usha lungaluń? Na akwaa warekwa vaakuyaa varekwa vengi, amu vawiiṛio̱ kuro da. 35Kake veń vandu va ikunda fituva fanu, veń vandu va itania vandu fisha na ivaakuya mutaveree iwiiṛio̱ kindo. Llyo na maṛe anu avaa meengi, neeni muvaa vana va ito akee ule ya foose. Amu ye ni wwoo aaviaa na akwaa walya vatamwaana na iwo vakasha. 36Veń vandu va ililia vengi, sheeli na Nde yanu awore ililia. 37Manya mutarere vandu fikasha, amu neeni mutarerwa. Manya mutaumisie vandu, amu neeni mutaumisio̱. Veń vandu va itia vandu sile tanu, amu neeni mutio̱ sile. 38Veń vandu va maako a iniinga vengi, amu neeni muniingwa. Nkyelelio kinuru kyansirio̱ na isikio̱sikio̱ kikee irikiarikia nkyo muniingwaa, mufukiye ifo misetoń yanu. Amu kyelelio kilya mweleliaa nakyo vengi nkyo neeni mwelelio̱o̱.

39Nae kavakabia na sumu kanumbua: A nndu ndoń amakii yorusa ndoń ungi shia? Wo vali vavili vaolokaa se iriniń? 40Nta mwanalosho akiliaa llosha wamwi ndi. Kake nndu woose kammaa iloshwa deń, eeṅaṅanaa na llosha wamwi tubu. 41Eewe nki ili kwalla kinana kikee irisoń lya mwanamae wafo, nta imanya kisinde kikee irisoń lyafo? 42Ana kumakii iia are mwanamae wafo: Mwanama, vera nkuute kinana kikee irisoń lyafo nta kutalolie kisinde kikee irisoń lyafo ku muni? Iwe makavili, uta mbele kisinde kikee irisoń lyafo, llyo kumakii illa kisha kinana kikee irisoń lya nndu ungi kumwute. 43Amu wifo nri nnuru uvikaa nunda shikasha ndi, ana wifo nri nkasha umakii ivika nunda shinuru ndi. 44Amu nri woose urambukaa na nunda tayo. Amu ifo nrueń vayaa-fo marwaa ndi, ana ifo miingeń vayaa-fo sabibu ndi. 45Nndu nsha, afisie findo fisha ifo nrimiń wamwi, areraa ifo fisha. Na ito nkasha, ifo findoń famwi fa ukasha afisie nrimiń, areraa ifo fikasha. Amu kana ka nndu kareraa kilya kiishule nrimiń wamwi.

46Neeni naamu ki ili mukee ishivaanga: Nndumi, Nndumi, neeni mutakee itana nta ikyo narera. 47Nndu woose ashaa na kwakwa na yaranya firero fakwa na itana kafitana, mmworusaa, kasa avakani. 48Avakani na nndu andesongosia numba karema kumande si karwaa mfulo kwa ule ya iwe. Mfu ukasha ukakaba numba ilya na finya, nta imakii iisenisa, fulya ikee shisongosie kisha. 49Kake ulya aita kara atatana, avakani na nndu andesongosia numba uteriń itawore mfulo. Na mfu ukasha na finya ukaituula boto. Na miwoye yayo ikava minini.

Currently Selected:

Luka 6: RWK72

Highlight

Copy