Luka 7

1Ili andemaa irera firero filya famwi foose fikaaka marwiń a vandu, kafika kulya Kaperinaumu. 2Na ifo eeifoo nshili umwi wa vasikari iyana, eeworee iketi lyamwi lilole kufui na ufu, nae eekee nndu eenkundiee nnu. 3Ili andeita mboni ya Yesu, kanrumia vasuṛi va Vayuda vantereve ashe ankiṛie iketi lyamwi. 4Nawo ili vandefikia Yesu, vakantereva nnu veenumbuaa: Asumani kuntanie kuro. 5Amu akundie nnu vandu veru kumande atitania numba yeru ya iterevia. 6Kyasia Yesu kaenda andu emwi nawo. Neeli ateekikee kwaasha na numba yamwi, nshili ulya kanrumia ndoo tamwi vashe imwia: Nndumi, manya kutakwareese, amu niń nsumani kwake numbeń yakwa ndi. 7Nkyo kiteveto nakulolia shi muni sheeli nsumani isha kwafo ndi. Kake rera kirero kimwi da, na iketi lyakwa livaa isha. 8Amu na akwaa nniń nkee nndu nrwaywa kwa si ya vanini vakwa. Noore na vasikari vakee kwa si yakwa. Kwakooya naia uu: Enda! Nae aendaa. Naia ungi: Oṛesho! Nae ashaa. Naia iketi lia lyakwa: Tana kuri! Nae katana. 9Ili Yesu andeita kuro kandiikia. Kaindukia syamu ilya indellatia kanumbua: Nta nallolia ikusura inini kuri kunu Isiraeli ndi. 10Na valya vanderumwa ili vandeuya kyeń, vakakooya iketi lia lilole lyammaa iva isha.

11Nkonu ungi Yesu kaenda muṛiń uvaangwaa Nain. Na vaseṛo vamwi variani nae na vandu kinga. 12Ili andefika kufui na mbenge ya muṛi ulya, kakwania-fo na nndu mfu ariwa eendeṛikwaa. Nae eekee ngitani kwa mae, na mae eekee nka nsikeeti. Na vandu veengi va muṛi ulya vakamwimia. 13Ili Nndumi andellolia, kavavio̱ mmuu kiimba kyamwi kamwia: Kutakiiye ndi, yeyo! 14Kaserikia kiraa kilya kirie nnyiṅa kakibaana na valya vakirie vakasalala. Kanumbua: Mwana nakwia: Kwimboo! Na ulya mfu kakwimboo kabooka irera. Na Yesu kawwiiṛia mae. 16Na vandu valya vakawarwa wweṛei woose vakaṅinisa Iṛuva vakanumbua: Nndu mwauya kisuku ankwimboo kunu kweru. Na vengi vakanumbua: Ni Iṛuva muni ansha isengera vandu vamwi. 17Na mboni ii yamwi ikakwana urukeń lua loose lwa Yudaya na ngyurukeń tingi toose ta miyanuń.

18Vanalosho va Yohane vakamwendee mboni to toose. 19Llyo Yohane avaanga vavili kari ka vanalosho vamwi kavaruma kwa Nndumi vaende imwuṛa: Iwe ni iwe ulya ashaa, ana tikaverea ungi? 20Nawo ili vandefika kwamwi, vakanumbua: Ni Yohane mbatisa atiruma kwafo eenumbuaa: Iwe ni iwe ulya ashaa, ana tikaverea ungi? 21Na kyeeri kilya kyeni kakiṛa veengi saka tawo na mavavio na mimuyo mikasha. Na midoń miingi kavaelekia ikalolia. 22Llyo aaṛua kavaia: Endeń mukandeongoya Yohane ifi mwallolia na iita: Midoń ikee ikooya ilolia. Fitoṛokombo fikee yenda. Vaworwa ni ivave vakee ishia. Vafu marwi vakee iita. Vafu vakee iṛutwa. Vakiva vakee ikwanisio̱ mboni shinuru ta ifura. 23Na wwa ngoma nndu ulya woose atashituṛukiaa.

24Na valya vanderumwa ni Yohane vameenda, Yesu kabooka iia syamu ilya mboni ta Yohane: A lia mukwimboo mukaenda bateń, nkiki mundeendella-fo? Nsuṛumuta ikee ivivitwa mmburaato? 25Ana nkiki kyamusomuta mukandella-fo? Ni nndu aṛee miseto mirenderi? Valya vaṛee miseto ya utoṛe na ilya ifura wo vakaa numbeń ta kimangi. 26A kikangio mukaenda ni indella-fo ki? Ni nndu mwauya naań? Ee da, namuia: Ni nnini kita nndu mwauya. 27Uu yye atisiṛio̱ ifi: Lla te naruma nrumi wakwa akwirie mbele asongosie shia yafo mbele yafo. 28Nań namuia: Kari ka woose vandeiriwa vvaka eefo nnini kita Yohane ndi. Kake ulya akee munnya wa woose ifo umangiń lwa Iṛuva, ni nnini kita ye. 29Na vandu vandearanya Yohane na akwaa wasaṅiṛia kyaalo wo vakairikia mifurie ya Iṛuva veekubatisio̱o̱ ubatiso lwa Yohane. 30Kake Vafarisayo na vaaria va mavavaso wo vaima kilya Iṛuva andevaṛengia, fulya vandelea indebatiswa yye.

31Nndumi kanumbua: A vandu va kishuku ki vvavakanisaa na kiki? Wo vavakani na i? 32Vavakani na fivana fikee rembo singiṛeń fiivaanganaa fiinumbuaa: A ili tamukabia mbembe neeni mukalea itavana nkiki? Tamuimbia fiimbo fa kiiyo neeni nta iiya! 33Amu Yohane mbatisa ashe nta ilya nkate ana nta inwa mfinyo. Neeni mukanumbua: Aworwa ni uketo. 34Mwana wa nndu kasha kalya na inwa. Neeni mukanumbua: Uu ni llafu na munwa mfinyo kawara na ndoo na vasaṅiṛia kyaalo na varekwa. 35Kake uṛango lwa dede lwammanyika kwa vana vayo woose valya vakuwara nalo.

36Kyasia umwi wa Vafarisayo kashea Yesu kantereva andelya shoonga kwamwi. Na Yesu kafika kwa Mfarisayo ulya kaaka numba kakaa rembo. 37Na muṛiń ulya eeifoo nndu nka aṛemie na waaisi. Nae ili andemanya, sheeli Yesu akee ilya shoonga kwa Mfarisayo ulya, kasha arie kawembe kawore mafura a kisaamu a ikwaamba. 38Kaserikia Yesu amuuka na kimungo eeiyaa. Na masoru amwi akashololokia marendeń a Yesu. Nae kaangua na mafuli amwi a nrwe. Kaonga na marende amwi mimo na yaamba-fo mafura alya arie. 39Mfarisayo ulya eevaangiee Yesu kwamwi ili andelolia kuro, kakusaṛa ngooń yamwi eenumbuaa: Kifo nndu uu mmwauya fisuku dede, eemanyaa mikae ya nka uu akee imbaana, sheeli mmwaaisi. 40Lia eni Yesu kamwia: Simon, noore kindo nkwiaa. Na Simon kamwia: Shiia Mbee! 41Kamwia: Eeifoo nndu mwakuya vandu awore vaasile vavili. Ulya umwi amwakue shilingi mayana araanu na ulya ungi amwakue shilingi makumi araanu. 42Neeli vandetuṛa kutu kindo kya intaa, kavatia sile woose vali vavili. A kullań iwe? Kari ka vandu iwo vali vavili ni ungau amfuraa kya mmwasi? 43Simon kamwaṛua kamwia: Nkusaṛie ni ulya andentia shiingi. Yesu kamwia: Kwamaaṛua kisumani. 44Kaindukia nka ulya kaia Simon: Kulolie nka uu? Lia nasha numba ii yafo, kwashiniinga nta mura wa isangya marende ndi. Nae kashiiritia masoru amwi marendeń akwa na yaangua kaangua na mafuli amwi a nrwe. 45Lingi nta kwanshoonga mimo ndi. Nae kuuka lia nasha numba ii yafo, nta amiimua yonga marende akwa mimo ndi. 46Lingi nta kwanshaamba mafura nrweń wakwa ndi. Nae kaamba marende akwa mafura a kisaamu. 47Kiimba kya iki nakwiań: Nka uu ammaa itio̱ mareko amwi lla kasa eekee meengi, fulya awore ikunda iingi lya ishikunda niń. Kake ulya antio̱ mareko maangu ni ulya awore ikunda yaangu lya ishikunda niń. 48Kyasia Yesu kaia nka ulya: Kwammaa itio̱ mareko afo. 49Na vandu valya veekee shoongeń andu emwi nae vakakusaṛa ngooń tawo: A nndu uu yye i katia vandu mareko awo? 50Nae kaia nka ulya: Kwanshikusura, nakyo nkyo kyankukiṛa! Enda na unambwe!

Currently Selected:

Luka 7: RWK72

Highlight

Copy