Luka 8

1Kikava numa ya ifi kava akee ilengetialengetia miṛiń na fimiṛiń eeongoyaa na ikwanisa mboni shinuru ta umangi lwa Iṛuva. Na valya ikumi na vavili veekee andu emwi nae. 2Na vaka kiindi valya veenkiṛwaa mimuyo mikasha na ndwaṛi wwo Maria wa kulya Magidala eemuukwaa mmimuyo mikasha mfungare 3na Yohana akee nka wa Kusa ulya akee mulla findo fa Herode, na Susana na vengi veengi. Nawo veekee indundia na masaa awo.

4Kyasia syamu nini ya vandu iikee andu emwi ikashea Yesu yukie miṛiń yoose. Nae kavakabia sumu kanumbua: 5Nndu nremi akwimboo indeeṛa mbeu tamwi. Ili eeṛaa, mbeu kiindi tikawa shień tikavario̱vario̱ na ndee tikadola. 6Mbeu tingi tikawa kundo kuwore mawe. Ili tindemia tikauma. Fulya tindetuṛa-fo nsini. 7Na tingi tikawa kari ka mbeu ta miinga na miinga ikamia andu emwi nato ikatiima tiiṅinaa. 8Na mbeu tingi tikawa uteriń unuru tikamia ukareeka fikannde mbeu shiingi. Ili Yesu andemaa irera ifi, karosa ununga kanumbua: Ulya woose awore marwi a yaranya aaranye!

9Numa vaseṛo vamwi vakamwuṛa: A misendie ya sumu ii yyo ki? 10Kavaia: Ini mwanniingwa imanya fiṛisi fa umangi lwa Iṛuva. Kake valya vengi wo vakaio̱ sumu tubu, amu vakamfita vatalolie, na ili vaitaa vatamanye. 11Na misendie ya sumu yyo ii: Mbeu nkirero kya Iṛuva. 12Mbeu ilya indewa shień nkimwi na valya vaaranyaa kirero kilya. Numa Satana kasha kauta kirero ngooń tawo, amu vatakikusure vakiṛwa. 13Na mbeu ilya indewa kundo kuwore mawe nkimwi na valya vaaranyaa kirero kilya na ikiwaria na ifura. Kake vawore mirarii ndi. Kyeeri kyaangu vatairikie, kake kyeeri kya yelelio̱ vakaiwukana. 14Na mbeu ilya indewa kari ka miinga nkimwi na valya vaaranyaa kirero kilya vakaenda vakaimwa nngatara tawo ana masaa awo na ngyukesi tawo ta isanga li veeiraa weendo usha. 15Kake mbeu ilya indewa uteriń unuru nkimwi na valya vaaranyaa kirero kilya vakakiwara na ngoo luteefo ukavili vakaira weendo usha, fulya vakee isisiria.

16Eefo nndu aataa taa na iifunika na kiya ana airwaa kwa si ya kiraa ndi. Kake aivanikaa kivanikoń, amu valya vakaa numba va-mulikio̱ llanga yayo. 17Amu kiifo kindo kikee kiṛike kitataṛambukaa ndi. Ana nta kiifo kindo kikee kifise kitamanyikaa na baa ndi. 18Kyasia kulleń nnu sheeli mwaranyaa! Amu nndu awore kindo aniingwaa kingi, na ulya atawore kindo na akwaa nkilya akusaṛie sheeli awore akisokwaa.

19Numa mae na vanavamae vakanshea, nta imakii ifika io akai kiimba kya wiingi lwa vandu. 20Kaendewa mboni: Yeyo wafo na vanavamaa vaselele wooṛo vafurie ikwania nawe. 21Kaaṛua kavaia: Yeyo wakwa na vanavama ni iwo vakee yaranya kirero kya Iṛuva na ikiwara.

22Kyasia llyo nkonu umwi wa mikonu fiya kaaṛukia ngalaveń andu emwi na vanalosho vamwi. Kavaia: Tiṛuke kwa kulya ya nruva ii. Vakaenda. 23Neeli veendaa na ngalava fiya, nae kalala ruo. Ikasha mburaato nruveń. Ngalava ilya ikaishua mura vakakaa ukiveń. 24Vakaenda vakamwanta vakanumbua: Nndumi nnini, Nndumi nnini, tikee imamia. Nae kakwimboo kanaya mburaato na ikoola lya mura fikamanda fikasia do do. 25Nae kavaia: A ikusura lyanu nkwi likai? Vakaeṛea vakariika. Vakauṛana wo veni na veni: A uu ni i akee ivavasa mburaato na mura, nafo fikamwirikia?

26Vakaṛuka kwa kulya vakafika urukeń lwa Vagerigesa lusumani na lwa Galilaya. 27Neeli andeoloka ngalaveń, kakwania na nndu nseṛo umwi wa muṛi ulya aworwa mmumuyo nkasha. Nae kuuka mikonu miingi nta ikiṛaa miseto ana ikaa kyeń ndi kita mbangeń ta vafu tubu. 28Nae ili andelolia Yesu, kaṛoṛongya kawwoya mbele yamwi karera na ununga unini eenumbuaa: Nkiki noore nawe, iwe Yesu Mwana wa Iṛuva akee ule ya foose? Nakutereva, manya kutashivavise! 29Fulya Yesu arie ivavasa mumuyo ulya nkasha uuke nndu ulya. Amu wikee inrukania kyeeri kyaasha. Nae kafingwa na mise na fimbeṛe na iringwa. Kake kafukyafukya filya fimfingie kaumbutwa mmumuyo ulya nkasha ukamfita kundo kutarulwa. 30Yesu kauuṛa: Irina lyafo ni iwe i? Nato ukanumbua: Irina lyakwa nniń isyamu. Amu eemaakwaa mmimuyo mikasha miingi. 31Nayo ikantereva, amu ataivavise yoloke kirundumiń. 32Kyasia na io iiyoo shoo ya nguve iiswaa uroń. Ikantereva ainiinge muumu ikwate-fo nguveń tilya. Nae kainiinga muumu. 33Mimuyo ilya ikauka nndu ulya ikakwata nguveń. Na shoo ilya ikaoloka waangeń iirishaa tikasia nruveń tikafiya-fo. 34Neeli veesi valya valolia kive kuro vakarisha vakandekwanisa mboni miṛiń na manremiń. 35Na vandu vakakwimboo indella kilya kyatanika. Vakasha kulya Yesu akai. Vakakooya-fo nndu ulya andeukwa mmimuyo akee rembo marendeń a Yesu aṛee miseto, awore uṛango. Vakaeṛea. 36Na valya vandelolia nndu ulya eeworwaa mmimuyo mikasha sheeli akiṛwa vakavaongoya. 37Na iwo woose veerulee kulya Gerigesa na va miyanuń vakantereva auke kwawo, fulya vandewarwa wweṛei unini. Kyasia kaaṛukia ngalaveń kauya na kulya auka nafo. 38Na nseṛo ulya aukwa mmimuyo ilya mikasha kantereva muumu wa ikaa nae. Kake Yesu kamwotoṛa kamwia: 39Uya kyeń kwafo kukwanisie-fo filya Iṛuva ankutania finini. Nae kaenda kava mukwanisa kulya muṛiń koose filya Yesu andentania.

40Kyasia ili Yesu andeuya, syamu ilya ya vandu ikawwaria na ifura, amu woose veeweriee. 41Lia eni kasha nawo nndu umwi irina lyamwi ni Yairo. Nae ni nndu wa nrwe wa numbeń ya iterevia. Kawa na si marendeń a Yesu kantereva afike kyeń kwamwi. 42Amu awore mwana wa kika akee wa ngitani amae myaka ikumi na ivili, nae aroywa kufui na ufu. Neeli Yesu eendaa kaidiṅwa ni isyamu iingi. 43Na nndu nka eeifoo alole saka ya kika andu a myaka ikumi na ivili. Nae eemmayaa masaa amwi woose kwa vaanga ateefo nndu andemakii inshiisa. 44Kasha numa yamwi kabaana nkyendu wa nseto wamwi. Na lia eni saka yamwi ya kika ikamwuka. 45Yesu kanumbua: Ni i uu ashibaana? Vandu vakaira ngani woose. Na Petiro andu emwi na vaaroe vamwi vakamwia: Nndumi, ni isyamu li likusisiṛie. 46Yesu kanumbua: Eefo nndu anshibaana, amu namiita namuukwa mfinya. 47Kyasia nka ulya kalolia sheeli atakimakii inkufisa. Kasha eereremaa kawa mbele yamwi kamwongoya kari ka vandu woose na baa kiteveto kya imbaana na sheeli andeva nsha lia eni. 48Nae kamwia: Mwana wakwa, ishikusura lyafo Uyo lyankukiṛa. Kwendie na unambwe! 49Neeli eekireraa kuro, kasha nndu auka kulya kyeń kwa nndu ulya wa nrwe wa numba ya iterevia kamwia: Mwana wafo ammaa ifwa. Manya kutakiatare llosha uu. 50Kake Yesu aita kuro kamwia: Manya kutaeṛee, kusure tubu! Nae akiṛwaa. 51Ili andeaka numba ya nndu ulya wa nrwe, nta yotoṛia nndu aake numba kita Petiro na Yohane na Yakobo na ndee wa mwana ulya na mae. 52Na vandu woose vaiyo veekee iiya na iishiṛa. Kanumbua: Manya mutaiye! Nta amfwa ndi, niikai alele ruo da. 53Nawo vakanseka, amu veeshi sheeli ammaa ifwa. 54Nae kawwara uko kawaanga kanumbua: Mwana kwimboo! 55Muu wamwi ukamwuiya, nae kakwimboo kyeeri kyo kyeni. Kavavavasa vanniinge shoonga. 56Na vasuṛi vamwi vakariika nnu. Nae kavaima, kaaṛa vataie nndu kilya kyantanika.

Currently Selected:

Luka 8: RWK72

Highlight

Copy