Luka 4

1Kyasia Yesu kauya auka kulya Yoridane eeshue Mumuyo Nsongori. Kakurikwa mMumuyo wa Iṛuva ifo ṅṅaloń. Kakaa-fo andu a mikonu makumi aani eelelio̱o̱ nSatana. 2Nae mikonu ilya nta ilya kindo. Neeli indesia kawarwa nsoto. 3Satana kamwia: Kwakooya kukee Mwana wa Iṛuva dede, ia iwe lia lyaṛuke nkate. 4Yesu kanumbua: Nkitisiṛe: Kindo nndu awaraa nakyo muu nshoonga yo sheni ndi. 5Kanrosa uroń waasha kamworusa ngyumangi toose ta isanga kwa limwi tiń. 6Satana kamwia: Umangi lu loose na tikisi yayo nkuniingaa, fulya fikee maakoń akwa, nań mfikuniingiaa nndu sheeli nankunda. 7Kyasia iwe kwakooya kufwiṛiaa nri si mbele yakwa, fivaa fafo foose. 8Yesu kaaṛua kamwia: Nkitisiṛe: Ni Nndumi Iṛuva wafo kumfukiyaa nri kuntereve ye muni na imwindia. 9Numa kankurika kumande Yerusalemu kanseṛeesa alya uṛoṛo lwa numba ya Iṛuva kamwia: Kwakooya kukee Mwana wa Iṛuva, kutuule si kuuka ia! 10Amu nkitisiṛe: Akurikiaa vamalaika vamwi vakuringe. 11Nawo vakuwariaa na maako awo, amu urende lwafo lutakabwa ni iwe. 12Yesu kaṛua kamwia: Manya kutareye Nndumi Iṛuva wafo! 13Neeli Satana andemarisia kyelelio kyoose, kamwuka kanrea mbele.

14Na Yesu kauya na kulya Galilaya awore finya ya Mumuyo wa Iṛuva. Na nsendo wamwi ukakwana ngyurukeń toose ta miyanuń. 15Nae kava mulosha ifo numba tawo ta iterevia eeitikiswaa vvandu woose.

16Kasha na kulya Nasareti kulya aṅinia. Kandeaka neefo numba ya iterevia nkonu wa Sabato. Kasalala asomie vandu. 17Kaniingio kitabu kya mwauya ulya Yesaya. Kakirua kakooya andu atisiṛie: 18Mumuyo wa Nndumi nkwa ule yakwa, amu anshaamba mafura nkwanisie vandu vakiva mboni ya Iṛuva ya ifura. Kashiruma nkwanisie vafinge vaboṛomulwa na vafu miso vakooye ilolia lingi, nniinge valya vavavisio̱ muumu vaende, 19na ikwanisa mwaka wa Nndumi usenye. 20Karaya kitabu kilya kawiiṛia ndundi ulya kakaa rembo. Na valya veekee numba ya iterevia woose vakamulla koroo. 21Kabooka ivaia: Nnu mitisine ii yamaawukia marwiń anu. 22Na woose vakanumbua sheeli nkuro, vakaṛiikiswa mfirero fa uwoo findeuka kaniń kamwi. Vakanumbua: A uu mmwana wa Yosefu se? 23Nae kavaia: Kiifo kindo kiimaa mwishiiaa sumu ii ndi: Mwaanga kukiṛe ku muni! Findo foose tamiita sheeli fatanika kulya Kaperinaumu, fitane na ia urukefi lwafo ku muni! 24Kalunga inumbua: Nkue namuia: Eefo mwauya airikio̱o̱ urukeń lwamwi muni ndi. 25Nkya dede namuia: Iifoo misikeeti miingi kulya urukeń lwa Isiraeli kyeeri kya Elia lia iṛuvewu lindefingwa myaka iraru na miiri irindaru na soto nini ikasha urukeń loose. 26Ana nta Elia arumwa kwa umwi wawo ndi kita kwa nsikeeti umwi kulya Sarepita urukeń lwa Sidon. 27Lingi veeifoo veengi veeworwaa ni ivave kulya urukeń lwa Isiraeli kyeeri kya mwauya ulya Elisa. Ana eefo nta umwi andeshiiswa kitaare nNaeman, nae ni nndu wa Siria. 28Woose veekee ifo numba ya iterevia ili vandeita ifi vakaliwa nngoo. 29Vakakwimboo vakansomuta wooṛo ya muṛi. Vakankurika kumande mbaambaa ya uro, kulya muṛi wawo witanie, amu vambiṛingitie si. 30Kake ye aira karikari kawo kakwendia.

31Kainama na kulya Kaperinaumu mmuṛi wa Galilaya. Kava mulosha mikonu ya Sabato. 32Nawo vakaṛiikiswa mmiloshie yamwi, amu firero famwi fiiworee finya yukie kwa Iṛuva. 33Nafo numba ya iterevia kasha-fo nndu aworwa mmumuyo nkasha. Kariika na ununga unini. 34Kanumbua: Iya! Nkiki kikuwore neese, Yesu wa Nasareti? Kwansha itimamisia. Nań nkwishi iwe ni iwe i! Iwe ni iwe Nsongori wa Iṛuva. 35Llyo Yesu annaya kanumbua: Sia do do, kumwuke! Llyo mumuyo ulya nkasha ukankaba na si io kari kawo ukamwuka utawavise. 36Vakariika woose na yuṛana wo veni na veni veenumbuaa: A kirero ki nkya mikae ingai? Akee ivavasa mimuyo mikasha na finya ya kimangi, nayo ikauka. 37Na nduma wamwi ukakwana kundo koose ngyurukeń ta miyanuń.

38Kyasia kasomuka ifo numba ya iterevia kafika numba kwa Simon. Mae wa nka wa Simon eeworwaa mmuro vvave wa mukunguru. Vakantereva kiimba kyamwi. 39Kaenda na-wo kakumwinikia kanaya mukunguru ulya. Nato ukamwuka. Lia eni kakwimbo kavaṛundia.

40Neeli saa iiakiaa, kashewa wwoose vawore vandu valole ndwaṛi ta mikae yoose. Nae kavaekeṛia maako umwi umwi kavakiṛa. 41Na veengi vakaukwa mmimuyo mikasha iishiṛaa iinumbuaa: Iwe kukee Mwana wa Iṛuva. Kainaya nta iiotoṛia irere, amu yo imwishi sheeli yye Kristo.

42Neeli kukye kauka-fo kaenda kundo kutaare vandu. Na syamu ilya ya vandu ikanduya. Vakafika kulya akai. Vakakunda imwima, amu atalakani nawo. 43Nae kavaia: Kyashiwara neende na miṛiń ingi nndeongoya vandu mboni ya ifura ya umangi lwa Iṛuva, amu ikyo nkyo nnderumio̱. 44Kava mukwanisa kirero kya Iṛuva ifo numba tawo ta iterevia kulya Galilaya.

Currently Selected:

Luka 4: RWK72

Highlight

Copy