Luka 3

1Mwaka wa ikumi na karaanu wa witoṛo lwa Kaisari Tiberio Pontio Pilato eekee nshili nnini wa Yudaya, na Herode eekee mangi ya Galiliya, na Filipo mwanamae eekee mangi ya Ituraya na uruka lwa Tarakoniti, na Lisania mmangi ya kulya Abilene. 2Kyeeri kilya kya Hana na Kayafa vakee vakohani vanini Uyo kirero kya Iṛuva kifikia Yohane mwana wa Sakaria kulya ṅṅaloń. 3Nae kafika miṛitiń yoose ikee kufui na Yoridane eekwanisiaa vandu ubatiso lwa iilashika nrimiń, amu vatio̱ mareko awo. 4Sheeli kikee kitisiṛe kitabuń kya mwauya kisuku ulya Yesaya: A lu ununga lwa nndu akee ikaba oole bateń eenumbuaa: Songosień shia ya Nndumi, rendentień miko yamwi! 5Mamuungo woose alikio̱, na ngyuro toose na fiduru foose fivavario̱! Na kundo kwotokie kuseṛeeswa na shia to toore malomi taalamuswa! 6Na vandu woose valolie ikiṛwa ni Iṛuva!

7Kyasia karera na isyamu lia lindenshea, amu vabatiswa yye kavaia: Ini ufwari lwa shoka, ni i andemwikimba ini murishe uumisio lwa Iṛuva lushaa? 8Kyasia vikeń nunda tisumani na nrima wa ikurra. Manya mutarere mwinumbuaa: Ise toore nde yeru Abraamu! Amu namuia kuri: Kari ka mawe va Iṛuva amakii yutia-fo Abraamu vana. 9Na alli kuri kyaaṛa kyammaa irawa sindeń ya nri. Na nri woose utavikaa nunda shinuru uminyo̱o̱ na yeeṛwa muroń.

10Isyamu lia likamwuṛa: Titanaań are? 11Nae kavaaṛua kavaia: Ulya awore miseto ivili aavie ulya atawore. Na ulya akooyaa awore shoonga atane kuro da. 12Na vasaṅiṛia kyaalo nawo vakasha, amu vabatiswa. Vakamwuṛa: Llosha, a ise tikatanań ki? 13Nae kavaia: Manya mutaute nndu kindo kya mmwasi kitaare ni ikyo kivavase! 14Na vasikari nawo vakamwuṛa veenumbuaa: Eese titanaań are? Nae kavaia: Manya mutalamie nndu, ana mutatuṛue nndu amuniinge kindo, kake filwań mmaṛe anu! 15Neeli vandu veekiveree filya fivaa veekusaṛasaṛaa ifo mirimiń yawo mboni ta Yohane, sheeli eeba yye Kristo, 16Yohane kavaaṛua kavaia woose: Niń namubatisa na mura. Kake eefo nndu ashaa numa yakwa awore finya kita niń. Nań nta nkaṛiaa iboṛomua ngyuṛuumu ta faaru famwi ndi. Ye amubatisaa na Mumuyo Nsongori na muro. 17Nae arie kyeele na uko lwamwi aangate kivasha kyamwi kiile fyu. Na umbi asaṅiṛie ikumbiń lyamwi, kake muulu aukoṛaa na muro utasiaa. 18Kyasia kalunga-wo na firero fingi fiingi eekwanisiaa vandu nrumi ii ya ifura. 19Kake mangi Herode karerio̱ yye kiimba kya Herodia akee nka wa mwanamae na kiimba kya fikasha foose andefitana. 20Na findo filya foose kaengeṛia-wo na kingi karwaa Yohane kifingioń.

21Kyasia vandu woose vandeenda ibatiswa ni Yohane. Na Yesu nae kaenda indebatiswa. Ili eeterevaa Iṛuva, iṛuvewu likaruuka. 22Na Mumuyo Nsongori kamwolokia kankaya afwanani na mbuku. Na ununga lukauka iṛuvewu lukavaanga: Iwe ni iwe Mwanakwa nkunde, nsenyo̱ ni iwe.

23Nae Yesu eekee nndu sha wa myaka makumi araru lia abooka ilosha. Nae aishiwa sheeli mmwana wa Yosefu, ye mwana wa Eli, 24ye wa Matati, ye wa Levi, ye ma Maliki, ye wa Yanai, ye wa Yosefu, 25ye wa Matatia, ye wa Amosi, ye wa Naumu, ye wa Esili, ye wa Nagai, 26ye wa Maati, ye wa Matatia, ye wa Semei, ye wa Yoseki, ye wa Yuda, 27ye wa Yoanani, ye wa Resa, ye wa Serubabeli, ye wa Salatieli, ye wa Neri, 28ye wa Maliki, ye wa Adi, ye wa Kosamu, ye wa Elimadamu, ye wa Eri, 29ye wa Yosua, ye wa Elieseri, ye wa Yorimu, ye wa Matati, ye wa Levi, 30ye wa Simeoni, ye wa Yuda, ye wa Yosefu, ye wa Yonamu, ye wa Eliakimu, 31ye wa Melea, ye wa Mena, ye wa Matata, ye wa Natan, ye wa Davidi, 32ye wa Yese, ye wa Obedi, ye wa Boasi, ye wa Sala, ye wa Nasoni, 33ye wa Aminadabu, ye wa Aramu, ye wa Esiromu, ye wa Faresi, ye wa Yuda, 34ye wa Yakobo, ye wa Isaki, ye wa Abraamu, ye wa Tara, ye wa Naori, 35ye wa Seruki, ye wa Ragau, ye wa Pelegi, ye wa Eberi, ye wa Sela, 36ye wa Kenani, ye wa Arifakusadi, ye wa Semu, ye wa Noe, ye wa Lameki, 37ye wa Metusala, ye wa Enoki, ye wa Yaredi, ye wa Maalaleeli, ye wa Kenani, ye wa Enosi, ye wa Seti, ye wa Adamu, ye wa Iṛuva.

Currently Selected:

Luka 3: RWK72

Highlight

Copy