Luka 2

1Kyeeri kilya Uyo ivavaso lyuka kwa Kaisari Augusito, vandu va ngyuruka toose vatisiṛwa marina awo kiimba kya kyaalo. 2Na itisiṛwa lia fikee lya mbele fikava lia Kirinio andeshilia kulya Siria. 3Na woose vakaenda itisiṛwa nndu woose na ufari lwamwi. 4Na akwaa ni Yosefu kakwimboo kulya Galilaya muṛiń ulya wa Nasareti karwa na kulya Yudaya muṛiń wa Davidi wivaangwaa Betileemu, fulya eekee wa ufari lwa kwa Davidi. 5Amu atisiṛio̱-fo andu emwi na Maria eemworisio̱o̱, nae eekufingiee. 6Nawo ifi veekee kulya, kyeeri kyamwi kikafika kya iira mwana. 7Kaira mwana wamwi vvele kamwiṛina na firami kamwaṛa mundiń wa numbe, fulya vandetuṛa andu a ilala ifo numba ya veeni.

8Na kulya urukefi lua veefo veesi veekaa bateń veeringaa shoo tawo kio. 9Kwibari malaika wa Nndumi kavashea na langa ya Nndumi ikavamulikia. Nawo vakaeṛea nnu. 10Malaika ulya kavaia: Muteeṛee! Fulya nkee imuia mboni ya ukyesi unini luviaa vandu woose. 11Fulya nkonu wa nnu mwamiirio̱ Nkiṛa kulya muṛiń wa Davidi, uu akee Kristo Nndumi. 12Na kiringisio mundeloliaa: Mukooyaa mwana mwiṛine na firami mwaṛe mundiń. 13Lia eni syamu ya ngyama ya iṛuvewu ikasha vakasangia na malaika ulya vaka-ṅinisa Iṛuva veemwimbiaa: 14Iṛuva aṅiniswa akee iṛuvewu na isangeń luve unambwe kwa vandu valya vankundaa.

15Ili vamalaika valya vandeuya iṛuvewu, veesi valya vakakurera: Ndefoń teende Betileemu, tindella kilya kyantanika-fo, kilya Nndumi antimanyisa. 16Vakaenda veerishaa vakakooya-fo Yosefu na Maria na mwana ulya eeaṛiee mundiń. 17Ili vandemaa illolia, vakakwanisa mboni ta firero filya vandeio̱ fa mwana ulya. 18Na woose vandeita vakariika kya filya vandeio̱ vveesi. 19Na Maria kawara firero filya foose kafikusaṛa ngooń yamwi. 20Na veesi valya vakauya wisiń lwawo veeṅinisaa Iṛuva na imwitikisa kiimba kya mboni tilya toose vandeita na ilolia.

21Ili mikonu nyaanyi indesia, Uyo mwana arinwa kafukiyo̱ irina lyamwi Yesu lia andefukiyo̱ mmalaika ulya, ilyo kitaare mae ankufinga nae.

22Neeli mikonu yawo ya ikusangya indesia kisumani na uvavaso lwa Mose, vakanrosa Yerusalemu vanrambikie Nndumi. 23Sheeli kikee kitisiṛe ifo mavavasoń a Nndumi: Mwana woose wa womi vvele airiwa kyawara avaangwa nsongori wa kwa Nndumi. 24Na lingi vakakunda iniingia na nsimbika, sheeli kikee kirere ifo mavavasoń a Nndumi, nato mmbuku ivili ana mawore avili a mbuku ta numba.

25Na kulya Yerusalemu eeifoo nndu irina lyamwi eevaangwaa Simeon. Nndu ulya eekee nsumani kakusurana na Iṛuva kaverea ulya awiiṛiaa va Isiraeli muu, na Mumuyo Nsongori akee kari kamwi. 26Nae eenringisio̱o̱ mMumuyo Nsongori, afwaa kitaare allolia mbele Kristo wa Nndumi ndi. 27Kasha numba ya Iṛuva eeitikwaa mMumuyo Nsongori. Neeli Yosefu na Maria vandennde Mwana Yesu numbeń ya Iṛuva, amu vamwutie nsimbika sheeli kikee kivavase, 28nsuṛi ulya kawara mwana ṅundeń kaṅinisa Iṛuva eenumbuaa: 29Alli kwotoṛień iketi lyafo likwendie na unambwe, Nndumi, sheeli kwallirekia, 30fulya miso akwa allolia Nkiṛa wafo 31kweemmudeṛiaa mbele ya vandu woose va masangeń, 32ave langa ya iṛangusa vandu valya vateeshi Iṛuva, amu vammanye. Na vandu vafo va Isiraeli vakooye tikisi. 33Na ndee na mae vakaṛiikiswa mfilya findererwa fa mwana ulya. 34Na Simeon kavaniinga mboṛa kaia mae wa mwana: Mwana uu yye aseṛeeswaa amu amanyise makusaṛo a vandu a ngooń na baa. Na kinga kya va Isiraeli valya vatankusuraa vakooye ureti, na kinga kya valya vankusuraa vakooye iimbolo na ikiṛwa yye. Nae avaa mwilwa vvandu. 35Na ukiva lwa mwana uu lukuvavisaa nrimiń sha nndu akee iilikwa nshombo.

36Eeifoo na nka mwauya fisuku eevaangwaa Ana, eekee llifu wa Fanueli wa ufwari lwa kwa Aseri. Nae eekee nkyeku nkuu, eenkaa na mmi myaka mfungare kuuka amaalikwa kafiyo̱ ni mmi. 37Nae eemfitaa myaka makumi nyaanyi na iini. Nae eelakanaa ifo numba ya Iṛuva ndi eeṛundiaa Iṛuva eekwimaa shoonga na intereva kio na nsanyiń. 38Kasha na alya vakai kyeeri kilya kyeni kaitikisa Iṛuva kaongoya vandu mboni ta mwana ulya valya veekee iverea ikiṛwa kulya Yerusalemu.

39Neeli vandemaa imarisia filya foose fivavase ni Nndumi, vakauya kyeń kwawo kulya Galilaya muṛiń wa Nasareti. 40Na mwana ulya kaṅina kaniingwa na finya ya nrima na uṛango na ikundwa ni Iṛuva.

41Nde na mae wa Yesu veendaa Yerusalemu myaka yoose kisukuń kya Pasaka. 42Ili Yesu andemaa myaka ikumi na ivili, vakarwa lingi na ule Yerusalemu kisukuń, sheeli veeishiviee. 43Ili mikonu yo yeemmaa yumbuka, vakauya na kyeń na mwana Yesu kasaa numa kulya Yerusalemu kitaare nde na mae veeshi. 44Vakakusaṛa akee na vaaroe vamwi vakaenda weendo lwa nkonu umwi vakanduya kwa vandu va ufwari na kwa ndoo tawo. 45Ili vandentuṛa-fo vakainduka Yerusalemu indenduya-fo. 46Ili mikonu iraru indesia, vakankooya kulya numba ya Iṛuva akee rembo kari ka valosha eevaaranyaa sewu tawo na ivauṛa. 47Na woose vandemwita eereraa vakariika kiimba kya uṛango lwamwi na myaṛuye yamwi. 48Ili ndee na mae vandellolia, vakariika. Na mae wamwi kamwia: Nki ili kwantitania kuri, mwanakwa? Tankuṛuya na ndeo na ngatara. 49Kavaia: Nkiki mwikee ishiṛuya? Mwishi se sheeli kyashiwara nsinde kunu kuwore findo fa Nde yakwa? 50Nawo nta yaṛukio̱ mfirero fo famwi. 51Nae kalungana na nde na mae vakauya Nasareti. Kavairikia findoń foose. Na mae kawara firero fi foose ngooń yamwi. 52Na Yesu kaengeṛia iṅina na uṛango na iyaa kakundwa ni Iṛuva na vandu.

Currently Selected:

Luka 2: RWK72

Highlight

Copy