Luka 1

1Veefo vandu veengi vandeimboo maako vasańiṛie mboni ta findo filya findeawutio kunu kweru andu emwi, 2sheeli tindefitio warambua valya vandelolia Kirero kilya na miso awo wo veni na ikiṛundia. 3Kiimba kya iki nań namfukya nduye mboni tilya na walio kuuka mbooko na itisununda, nkutisiṛie, Teofilo wakwa, 4amu kumanye kisumani kya mboni tilya kundefundwa, sheeli tikee ta dede deń.

5Kyeeri kilya Herode akee mangi ya Yudaya eeifoo nkohani umwi, irina lyamwi ni Sakaria, akee wa ikamba lya Abia. Na nka wamwi akee wa ufwari lwa Aron, irina lyamwi ni Elisabeti. 6Nawo ve vavili veekee vandu vakusurie Iṛuva vakasoṛa mavavaso woose na miṛaṛikie ya Nndumi liteefo ilomi. 7Nawo veeworee mwana ndi, amu Elisabeti eekee kyuumba. Na woose vali vavili veenkuaa. 8Kyasia eekee iṛunda mashoṛa a ukohani mbele ya Iṛuva kisumani na ikamba lyamwi. 9Na mikae ya vakohani ni ikaba wuuku, nalo lukawwoya lwa yaka ifo numba ya Nndumi, amu andekoṛia-fo findo fa kisaamu. 10Na isyamu lyoose lya vandu veeterevaa wooṛo kyeeri kyo kya ikoṛa findo fa kisaamu. 11Kakworuswa mmalaika wa Nndumi aselele taari ya uko usha lwa kiraa kya ikoṛia findo fa kisaamu. 12Ili Sakaria andellolia kataṛaaka kawarwa wweṛei. 13Malaika ulya kamwia: Kuteeṛee Sakaria, amu kiterewo kyafo kyamiitiwa, na nka wafo Elisabeti akwiriaa mwana wa womi. Na irina lyamwi kuvvaangaa Yohane. 14Nawe kuvaa na ifura na ikyesa na vandu veengi vasenywaa ni iwonika lyamwi. 15Fulya akaa ave nnini mbele ya kisangu kya Nndumi, nta atanwaa mfinyo ana kindo kya inanga. Nae eeshuṛwaa Mumuyo Nsongori kuuka ndewuń ya mae. 16Na veengi va Isiraeli avawiiṛaa kwa Nndumi Iṛuva wawo. 17Nae yye muni amwiriaa mbele akee na Mumuyo wa Elia na finya yamwi, amu aaṛue ngoo ta vaande va vandu tiuiye vana vawo, na iwo vawore nkuushu awaṛuaa vakooye iwara makusaṛo a valya va usumani, naamu amakii ideeṛia Nndumi vandu vamwi vammaa isongoviswa. 18Sakaria kaia malaika ulya: Mmanyaa are kirero ki? Amu niń nankua na nka wakwa ni nkyeku wa mikonu miingi. 19Malaika kamwaṛua kamwia: Nniń Gaburieli, nsalalaa mbele ya Iṛuva. Nań nanrumwa nrere nawe, nkufitie mboni ii shinuru. 20Nawe lla te! Kufwaa uṛoo kulemwa irera, kumande nkonu ulya ifi foose filolikaa. Fulya kitaare kwairikia firero fakwa. Nafo faawutio̱o̱ kyeeri kyayo.

21Na vandu valya veeveriee Sakaria vakariika kiimba kya isinda lyamwi kulya numba ya Iṛuva. 22Ili andesomuka, nta imakii irera nawo. Nawo vakamanya sheeli amooruswa kindo ifo numba ya Iṛuva. Nae kavatukiatukia uko kakaa akee mfu uṛoo. 23Ili mikonu ya ikamba lyamwi indesia, kakwimboo kaenda kyeń kwamwi. 24Numa ya mikonu ilya nka wamwi Elisabeti kakufinga kakufisa andu a miiri iraanu. Kanumbua: 25Nkuro Nndumi andeshitania mikonu yo andeisaua, ashuute usutu lwakwa niikee nalo kunu vanduń.

26Mwiri wa karindaru malaika Gaburieli karumwa ni Iṛuva aende kumande muṛiń wa Galilaya uvaangwa Nasareti, 27kwa mwana wa sambuṛa kilana eefingio̱o̱ ni nseṛo avaangwa Yosefu, akee wa ufwari lwa kwa Davidi. Na irina lya kilana ito mMaria. 28Ili andeaka kwamwi kamwia: Nakwisana iwe kukee llilie. Nndumi akee nawe! 29Nae kataṛaaka nnu kiimba kya firero famwi. Kakusaṛa ngooń yamwi: Iisana li llya mikae ki? 30Malaika kamwia: Kuteeṛee Maria, amu kwankooya isekye ifo kwa Iṛuva. 31Lla te kukufingaa na iira mwana wa womi, na irina lyamwi kuvvaangaa Yesu. 32Ito avaa nnini, avaangwaa mwana wa ito akee ule ya findo foose. Na Nndumi Iṛuva anniingaa kifumbi kya umangi lwa Davidi ndee wamwi. 33Nae ashiliaa numba ya Yakobo kumande miṛeṛe na umangi lwamwi lwiraa mmando ndi. 34Maria kaia malaika ulya: A kirero ikyo kivaa are, nań kitaare nankwania na nndumi? 35Malaika kamwaṛua kamwia: Ni Mumuyo Nsongori akwolokiaa na finya ya ulya akee kwa ule ya findo foose ikusikiaa sha kiṛishwe. Kiimba kya ikyo ikyo kisongori kiiriwaa ni iwe kivaangwaa Mwana wa Iṛuva. 36Lingi lla te mfwari wafo Elisabeti nae akufingie na mwana wa womi, lla kasa ankua. Na mwiri uu wamwi wwa karindaru. Nae andevaangwa kyuumba. 37Ainu kiifo kindo kilemikaa kwa Iṛuva ndi. 38Maria kanumbua: A uu niń nkee isinga lya Nndumi, kishivień sheeli kwanumbua! Kyasia malaika ulya kakwimboo kaenda.

39Kyasia Maria kakwimboo mikonu ilya kaenda ngyuroń kulya muṛiń wa Yuda. 40Kaira na kulya numba ya Sakaria kaisana Elisabeti. 41Kikava ili Elisabeti andeita iisana lya Maria, kimwana kilya kinnya kika ta vana simiń ya mae. Na Elisabeti kaishuṛwa Mumuyo Nsongori. 42Karosa ununga lwa finya kanumbua: Iwe kwanniingwa mboṛa kari ka vaka. Na ito akaa simiń yafo ni nniinge mbora! 43Kyashuukia na kwi kirero ki, kumande mae wa Nndumi wakwa ashishee niń? 44Amu ili ununga lwa iisana lyafo lwaaka marwiń akwa, Uyo kimwana kyo kyakiliakilia na ifura kunu simiń yakwa. 45Ngoma iwe kundekusura, amu ikyo kundeio̱ ni Nndumi kyawukiaa.

46Maria kanumbua: Nrima wakwa waṅinisa Nndumi, 47na ngoo yakwa yankesia Iṛuva Nkiṛa wakwa. 48Fulya amilla utanyari lwa iketi lyamwi. Amu kuuka alli fishuku foose fishivaangaa wa ngoma. 49Amu muni finya anshitania finini. Na irina lyamwi ni isongori. 50Na ililia lyamwi likaa kwa valya vamweṛee fishuku na fishuku. 51Atana fa finya na uko lwamwi kanyanyata iwo vakee ikuṅinisa ifo makusaṛoń a mirima yawo. 52Na iwo vanini kavateṛua fifumbiń fawo kaṅinisa valya vakee vatanyari. 53Valya vaworwa nsoto avawuurusa na fisha. Na masimba kavatia kya ruu. 54Ankumbua ililia kaelekia iketi lyamwi Isiraeli, 55sheeli andeia vaande yeru, ni Aburaamu na fishuku famwi kumande miṛeṛe. 56Maria kakaa nae kiṛengo kya miiri iraru, numa kauya kyeń kwamwi.

57Neeli mikonu ya Elisabeti indefika ya iira mwana, kaira mwana wa womi. 58Vakyungu vamwi na vafwari vamwi vakaita sheeli Nndumi amwengeṛia ililia lyamwi vakafura andu emwi nae. 59Ili indefika mikonu nyaanyi, vakasha vanderina mwana ulya. Vakafura ivvaanga irina lya ndee Sakaria. 60Llyo mae aaṛua kanumbua: Wode. Nkuro ndi, avaangwaa Yohane! 61Vakamwia: Eefo nta nndu wa ufwari lwafo avaangwaa irina li ndi. 62Vakasinia ndee vaka-mwuṛa irina afurie imfukiya. 63Nae kafura iwe lya itisiṛa. Katisiṛa-wo kanumbua: Irina lyamwi ni Yohane. Vakariika woose. 64Lia eni kana kamwi kakaruuka na ulumi lwamwi. Kabooka irera eeṅinisaa Iṛuva. 65Valya woose vakee kufui nawo vakawarwa wweṛei. Na mboni ti toose tikakwaniswa kulya ngyuroń ta Yudaya koose. 66Na woose vandeita vakawara na ngoo tawo vakanumbua: A mwana uu avaa wa mikae ingai? Amu uko lwa Nndumi lukee andu emwi nae.

67Na Sakaria vaava wamwi kaishuṛwa Mumuyo Nsongori kaauya kanumbua: 68Eetikiswa Nndumi Iṛuva wa Isiraeli, fulya ansengera vandu vamwi na ivakiṛa. 69Katiseṛeesia wembe lwa ikiṛwa kari ka numba ya iketi lyamwi Davidi. 70Sheeli arera na kana ka vaauya fisuku vamwi vasongori kuuka ilyo kala, 71amu tikiṛwa misa eru na yutwa maakoń a valya woose vatisule. 72Katana kuro alilie vaande yeru na ikumbua mma yamwi shisongori, 73ni ikite lia andefiya nde yeru Abraamu sheeli: 74atiniingaa ise tikie maakoń a fituva feru na indundia titawore weṛei, 75tikaa-fo tikee na usongovisi na usumani kisanguń kyamwi mikonu yoose ya muu weru. 76Nawe kimwana, kuvaangwaa mwauya wa ulya akee ule. Amu kwiriaa Nndumi mbele kunsongosie shia tamwi, 77na iṛangusa vandu vamwi vamanye ikiṛwa lyawo fikee lya itio̱ mareko a wo. 78Fulya Iṛuva antililia. Kwa ikyo tanshewa llanga yuka ule, 79amu imulikie valya vakee llemiń na kiṛishweń kya ufu na yorusa marende eru shia ya unambwe. 80Na mwana ulya kaṅina na yengeṛio̱ finya nrimiń. Kakaa ṅṅaloń kumande nkonu ulya andekworusa Isiraeli na baa.

Currently Selected:

Luka 1: RWK72

Highlight

Copy