Imbombo zya Vapositili 2

Ishikunjilwa sha MupepʼuMufinjile

1Lwe lyinzilʼisiku lya Pentekositi, pe vahavungana poka vonti. 2Pe vahaganduhʼapashezi ahalanga hafuma kumwanya, hali fwe ngati nkungʼimpiti yikuṿugula, hahizula munyumba mwe vavungine. 3Vahagʼimili zye zyali fwe ngati zya mwoto, zikuyitapulanya zikwimilila pamwanya pali vonti woka woka. 4Vonti vahizulʼuMupepʼuMufinjile, vahandʼukuyanga mumilʼizinji, inza shʼuMupepo ahavapʼukuziyanga. 5Ilelo mu-Yelusalemu mwe valʼavaYuda avantu ve vahamunyilagʼuMulungu, ve vafumile munkolo zyonti mwe zivaliye kunsi kwivingo. 6Lwʼahalanga hanaha havwasite pʼavantʼimpugʼimpiti vahavungana nukupulumba, she vazile vakuyanga munjango zyavo unʼiyakwe unʼiyakwe. 7Vahatentwa havili vahasukumila, vahati: Yenyi, amwe vonti ve vakuyanga panapa vate vaGalilayi? 8Zyava vuli lelo she tukwiṿwʼinjango zyitu mwe twapafililwe unʼiyaltwe unʼiyakwe? 9AvaPaliti navaMedi navElamiti nave vazenzile mu-Mesopotamiya namu-Yudayi namu-Kapadokiya namu-Ponti namw-Asiya, 10namu-Filigiya namu-Pamfiliya namw-Egipiti namunsi ya Libiya yʼipalamine niya mu-Kileni navaLoma avazenga mumwo, navaYuda nave vinjiye muvu-Yuda, 11navaKileti navAlabu, tukwiṿwa lwe vakuziyanjila munjango zyitʼimpiti zyʼavomṿilʼuMulungu. 12Vonti vahatentwa nukwalangana vahavuzilizanya woka woka vahati: Amwe zili vuli zinizi? 13Vamo nyene zihava zya nseho vahati: Vahozilwe lipele lya mampensyʼinonu.

Imbila ya Peteli pa Pentekositi

14PʼuPeteli ahavuha poka navishumi nawoka, ahavusyʼizwi lyakwe aha va vuzyʼahati: Mwe vantu, mwe vaYuda namwe mwenti mwe mukudila mu-Yelusalemu, muzimanyaje zinizi, mutejelezyajʼahinza zye nkuvavuzya. 15Zite inza she mwe mukusivilila, vanava vatahozilwʼipele ndali she havalilizyo ha vutatu shinishi, 16Izyenʼizi nyene zye zila zyʼayanzilʼumukuvwi uYoweli lwʼatili:

17Zili va vovulo kumanda ga kumpelela, akuyangʼuMulungu,

pe ndivitishizyagʼavantu vonti uMupepo wane,

pʼavana vinyʼavanaṿuli navantanda valikuvwaga,

pʼavalumendo vinyu valiyenyagʼiṿwitushizya,

pe navasongo vinyu valilotʼinjozi.

18Vope navanyamata vanʼavanaṿuli navantanda

mumanda gugo ndivitilizyagʼuMupepo wane,

vope valikuvwaga.

19Pe ndipelʼamamfindango kumwanya kwivingo

namayele munsi pansi namavanda numwoto nilyosi

lye likusuha fwe ngati luvesu.

20Izuva liligalunkana liliyipelʼukuva shisi

numwezi wuliyipelʼukuva mavanda

lwe suti lishilʼukwinzʼisiku lya Mwenʼipiti lye lilʼapazelu.

21Pe vonti venga vakuputa kwizina lya Mwene valipona.

22Mwe vanaṿuli vana-Yisilayili imwe, mutejelezyaje zye nkuvavuzya: UYesu wa mu-Nazaleti, umuntu wʼuMulungu amwinjizizye mumwinyʼumu nazye mbombo zya maha nama-mfindango namayele gʼuMulungu ahapelaga mumwakwe wuyo she mukwenya mwenti nkutaha gugo ge mugamanyile namwe, 23we wuyo lwʼatumwa inza shʼuMulungu akasime nzila, havili inza shʼamanyinsinye ukufuma he hali, wʼimwe mwamuhomeleye pashihovenkanyo ninyove zya vantʼavasitankomelezyo, muhamumugoga, 24wʼuMulungu ahamuzyusya ahamusatula mumayimba ga vufwe, she vutali namaha aga kumumenelezya shima. 25ShʼuDavidi ahaziyanga zye zyakwe, ahati:

UMwene wane nkamwenyaga shima kusheni shane,

shʼali kumuhono wanʼumulilo ukuti ntayugumbanaje.

26Mwe mumwo umwoyo wane wuhadovela, lwope nulumili lwane luhalulutila.

Havili numuvili wane wulituzizya mulusuvilo.

27Shʼutalivulehʼuvulanzi vwane kuvuzimʼiwe, havili utaliyitihʼukuti umufinjile waho amanyʼukuvola.

28Undanzilʼamadala ga vulanzi, ulinizuzyʼuluseshelo kuminso kukwaho.

29Mwe vayaya, mwe vamwitʼimwe, muleshe njanje ntazyishe nazimo izya tata witʼumupiti uDavidi, wope afuye ahasyilwa, nimbipa yakwe ilipo kumwitu nilelʼili. 30Uwene nyene shʼali mukuvwi amanyile ukuti uMulungu amulapiyʼishilapo ukuti: Ulusanga lwa mumusana waho ndi lutendamiha pashitengo shaho sha vumwene, 31shʼatalisilʼukwenya zinizi mwe mumwo ahaziyanga izya kuzyuhʼuChilisiti ukuti uvulanzi vwakwe vutasyaye kuvuzimu, nga muvili wakwe wutamanyilʼukuvola. 32UYesu wununo uMulungu ahamuzyusya, zye tuzimanyile swenti swe vahome. 33Ilelo lwʼamuzuṿizye kumwanya kumuhonʼumulilo wa Mulungu, lwʼaposhela kwa Yise ulumfingwi lulʼulwa MupepʼuMufinjile, pʼahisitʼaha he mukuhenya nukuhiṿwa. 34ShʼuDavidi nyene atazuṿile kumwanya ndali, nkandʼuwene akuyanga akuti:

UMwene ayanzile kwa Mwene wane atili:

tendamaga kumuhono wanʼumulilo,

35uhafishe pupo pʼavalugu vaho ndivapela ukuva hatengo ha kuviha pupʼiṿinama ṿwaho.

36Ilelo mumanyaje nalyoli mwenti mwe va nyumba ya Yisilayili, ukuti uMulungu amupezilʼuYesu wʼimwe mwamuhomeleye pashihovenkanyo, ukuva wʼuMwene havili uChilisiti.

37Ilelo lwe viṿuye zinizi, pʼamoyo gavo gahafuma, pe vahamuvuzilizyʼuPeteli navapositili avamwavo, vahati: Amwe pe tutinji vuli lelo, mwe vamwitʼimwe? 38PʼuPeteli ahavavuzyʼahati: Mupinduhaje, mwozelwaje mwenti woka woka mwizina lya Yesu Chilisiti, mwe muvwajʼuvuswila vwa malandu ginyu, pe muliposhelʼishikunjilwa sha MupepʼuMufinjile. 39Shʼulumfingwʼulu lwinyu mwenemwe navana vinyu navakukutali vonti vengʼakuvitʼuMwene uMulungu witu ukuti vamwinzile. 40Ahayanga nagamwavo amazwi ge minji aga kuvasimishizya naga kuvasoha, ahati: Simuyipohaje nakuluhʼulusyohanʼulu. 41Vonti ve valiposheleyʼizwi lyakwe ve vahozelwa, pe vahinjila mushivanza kwisiku lilyo avantu 3,000.

Ukulandila mulwitiho avachilisiti

42Ve vahumishizyʼinongwa zya vapositili nukuva poka nukumensulanyʼumukati nukuputa.

43Pʼishitetemwi shihavagwila vonti mwe vavaliye, shʼavapositili vahapelagʼamamfindango namayele ge minji. 44Vonti ve vitisile vahavanga poka, ṿwonti vahahanaga. 45Pe vahakazyʼiṿwuma ṿwavo ninsavo yavo ye vali nayo, vahavagavanyʼavantu vonti ukulandata mwʼuvupina vwavo vwavaliye. 46Amanda gonti vahahomanaga mwa tempeli, valʼumwoyo woka, wope numukati vahamensulanyaga munyumba zyavo mwe zivaliye, iṿintu vahalyanga nuluseshelo namoyʼamasitakukutana. 47VahamutinihagʼuMulungu nukuva ve vankundwa kuvantu vonti. UwenʼuMwene ahavonjezyagʼamanda gonti mushivanza ve vaposilwe.

Currently Selected:

Imbombo zya Vapositili 2: NYi1965

Highlight

Copy