Imbombo zya Vapositili 3

Ukupola kwa muntu wʼalemaye

1UPeteli nuYohani vahazuva ukuvala mwa tempeli muhavalilizyo ha kuputa, aha vusanu na vune. 2Numuntu wʼalemaye mwe mwa nyina wʼahanyatulwaga we vahamuvihagʼamanda gonti pashilyango sha tempeli she vahatinji iShinza, ukuti alavajʼiṿwa shikuku kuli vuvo ve vakwinjila mwa tempeli. 3Uwene lwʼavawenyi avaPeteli nuYohani vakwinjila mwa tempeli, pʼahati: Simumpanje hamʼaha shikuku. 4UwenʼuPeteli ahamutontomela poka nuYohani, ahati: Utwenye sweswe. 5Pʼahavenyelezya ukuti ngavanga vakumupa yimo. 6UwenʼuPeteli nyene ahati: Nizya feza nizya sahabu zye nte nazyʼine, iṿwene nyene ṿwe ndi naṿwo ṿwe nkukupa; Mwizina lya Yesu Chilisiti wa mu-Nazaleti vuhaga, ujendaje. 7Pʼahamulemʼumuhonʼumulilo ahamuvusya. Pʼiṿinama niṿihankala ṿwakwe ṿihagoma pe pala. 8Ahadovʼukuvuha, ahimilila, ahajenda ahinjila navo mwa tempeli lwʼakujenda nukudova nukumutinihʼuMulungu. 9Navantu vonti vahamwenya lwʼakujenda nukumutinihʼuMulungu. 10Vahamumanya ukuti we wuyo wʼatendamiyʼiṿwa shikuku paShilyangʼiShinza sha tempeli. Shihavagwilʼishitetemwi nukusukumila zye zyamwazilʼumuntʼula. 11Ilelo lwʼavumishizizye nuPeteli nuYohani, pe vontʼavantu vahavashimbilila mumanda ye vatili ya Solomoni, vahatentwa nkani.

Imbila ya Peteli mula tempeli

12UwenʼuPeteli nyene litaziwenyi zinizi, pʼahavavuzyʼavantu ahati: Mwe vayaya mwe vaYisilayilʼimwe zye mukusukumila zyashi zinizi, mukututontomela shonu, muli fwe ngati mukuti sweswe twamupelela ukujenda nage maha gitu navwe vunyilaMulungu vwitu sweneswe? 13UMulungu wa Abulahamu nuYisikaka nuYakobu, uMulungu wa vatata swenti wʼamwimisilʼumunyamata wakwʼuYesu, wʼimwe mwamutwaye nukumuhana kuminso ga Pilati lwʼuwenʼalonzilʼilya kumutavula. 14Nkandʼimwe mwamuhanilʼuMufinjile umugolosu, muhalavʼumugogavantu. 15Uwene nyenʼuChilongozi wa vulanzi we muhamugoga, wʼuMulungu amuzyusizye kuvafwe. Iswe swe vahome va zinizi. 16Mulwitiho lwʼizina lyakwe, izina lyakwe limupiyʼamahʼumuntʼuno we mukumwenya shinishi nukumanya mumumanyile. Havilʼulwitiho lwʼapezile wuyo lumupiyʼuvulanzʼuvulusyʼumuntʼuno kuminso ginyu mwenti. 17Ishi lelo mwe vamwitu, nazimanyʼukuti lwe nkazivombaga zinizi mutazimanyile, inza she vahonzizye navapiti vinyu. 18Zyonti zyʼuMulungu atalisilʼukuzikumusya mumalomu ga vakuvwi vonti ukuti: UChilisiti aliyimba. Zye zilunjisile vovulo. 19Simupindushe lelo, muvwelaje ukuti amalandu ginyu gasyumulwaje, namahʼamatehamu ginzaje ukufuma kuminso ga Mwene, 20ukuti amutume uChilisiti wʼavasonteye, we Yesu, 21wuyo wʼahondeye ukuposhelwa kumwanya ukwinzʼukufiha kumanda ga kuyananya uvupwa zyonti zyʼayanzilʼuMulungu ukufuma he hali mumalomu ga vakuvwi vakwe avafinjile. 22She wope nuMose ayanzile atili: UMwene witu uMulungu alivavusizyʼimwe umukuvwi wʼali fwe nene, we muhamutejelezyaje munongwa zyonti zyengʼakuvavuzya. 23Pe vontʼavantu venga vatakumutejelezyʼumukuvwi wununo ve valitupulwa muluho lwavo. 24Avakuvwi vonti ukufuma paSamweli namwe valandatine vonti ve vahakuvwaga, vope vahagayangagʼamanda ganaga. 25Imwe mwe vana va vakuvwi nava lumfingwi lwʼuMulungu afinzile navaso, lwʼahayanga nuAbulahamu ahati: Inkolo zyontʼizya munsi zililotwa mumbeyu yaho. 26LwʼuMulungu amuvusizyʼumunyamata wakwe, pʼahamutuma suti kulʼimwe ukuti avalote lwʼakuvafupusya mwenti kumbivi zyinyu.

Currently Selected:

Imbombo zya Vapositili 3: NYi1965

Highlight

Copy