Imbombo zya Vapositili 4
4
UPeteli nuYohani pa luhomano lwa vahombe
1Ilelo lwe vakuyanga navantu vovulo, pe vahapalamila kuli vuvo avashiputo numusungatempeli navaSadusayi, 2vaṿisitwe mwe vazile vakuvasambilizyʼavantu nukukumusyʼukuti, mwa Yesu kulipʼukuzyuha kuvafwe. 3Pe vahavalema vahavigalila mujela vahati, tulizimalilizya shandavi. She hali he hamazuva. 4Nkandʼavinji mumpuga yavo ve vahiṿwagʼinongwa vahitiha, pʼimbazyo yavo ihafiha pa 5000ukuvazya ve vanaṿuli veka.
5Lwe kushiyʼinzanchi, pʼavahombe navasongo navamanyakalata vahavungana mu-Yelusalemu, 6nuHanasi uwashiputʼumupiti nuKayifa nuYohani nuAlekizanda navajenzi va washiputʼumupiti. 7Ilelo lwe vavavisile pahati, pe vahavavuzilizya vahati: Mumaha vuli namwizina vuli lye mukuzivombela zyonti zinizi? 8PʼuPeteli ahizulʼuMupepʼuMufinjile ahavavuzya ahati: Mwe vahombe vahataluholo, mwe vasongo muvana Yisilayili umu, 9mukutulinga nukutuvuzilizya umusanyʼuno kumbombʼinyinza yʼavombelilwe umuyeyevazʼuno ukuti, shonu shimuzuzuvushizizye. 10Zye zimanyihaje kuli mwenti na kuli vonti ava luho lwa Yisilayili ukuti, mwizina lya Yesu Chilisiti uwa mu-Nazaleti, wʼimwe mwamuhomeleye pashihovenkanyo, wʼuMulungu ahamuzyusya kuvafwe, muli wuyo umuntʼuno ayimiliye kuminso ginyu umugomu. 11Uwene nyene we livwe lyʼimwe mwe vazenganyumba mwalisyosheye lye liyipezilʼukuvʼitwe lya kushipembe. 12Atalipo numʼuwunji uwa kutupoha, nizina tute nalyo nalimʼilinji swe vantu kunsi kwivingo uku ilya kupulumushila mumwʼiswe. 13Ilelo lwe vawenyi avaPeteli nuYohani vakuyanga nakutetema, lwe viṿuye ukuti vate vasambilile, vantu vwelele, pe vahasukumila, vahamanya ukuti ve vuvo ve vali nuYesu. 14Ilelo lwe vamuwenyi wope numuntu wʼazuzuvusile pe havili zihasova izya kuyangʼavene. 15Pe vahavafumwa mwilonjelwi vahavuzilizanya vuvo veka, 16vahati: Tutuvuli navo avantu vanava? She vonti ve vasamiye mu-Yelusalemu umu vavawenyi ukuti vapezilʼumumfindango apazelu, naswe numo atakuhana. 17Inongwa zinizi nyene ukuti zitakwile mwonti muvantu, pe lelo tuvindaje ukuti vatahavuyizyʼukumuvuzya numʼumuntu nazimo mwizina linili. 18Pe vahavita havili, vahavahandanizya ukuti vatayangaje nukuzikumusya izyʼizina lya Yesu.
19Avene nyenʼavaPeteli nuYohani vahamula vahavavuzya vahati: Amwe nyinza lelo kwa Mulungu inga tukuvasajilʼimwe, uwenʼuMulungu we ndali, zye muzilongaje mwemwe, 20shʼiswe tukupotwʼukuleha ukuziyanga zye tuziwenyi nukuzyiṿwa. 21Pʼavene vahonjezyʼukuti: Aheli! Pe vahavatavula, she vazile zyasovʼizya kusimpa mumwo ukuti vavahomele she vahanyilagʼavantu. Mwʼavantu vonti vahamutimagʼuMulungu pali zila zyʼavapeleye, 22shʼuwenʼumuntʼuno wʼumumfindango wapezilwe muli wuyo, amaha gakwe gʼamazile gashizile napamashumi gane.
UPeteli nuYohani vakugaluha kuvamwavo
23Ilelo lwe vavatavuye, pʼavene vahavalʼukuvavuzyʼavamwavo zyonti zyʼavashiputʼavapiti navasongo vayanzile navo. 24Avene lelo lwe viṿuye zinizi, pe vahavusyʼizwi lyavo kwa Mulungu kumwoyo woka, vahati: We Muhataṿwonti, wʼupezile niya kumwanya niya pansi, nusumbi naṿwonti ṿwe yili mumwo, 25we wayanzile mwa MupepʼuMufinjile mwilomu lya tata swenti uDavidi umunyamata waho, uhati:
Avakunzi vakusambuha shonu? Ninkolo zya vantu zikusiva zyashʼizya shaha?
26Avamwene va munsi vavusile, avapiti vavungine, vamululisilʼuMwene nawe Chilisiti wakwe.
27She nalyoli munkayʼumu mwe nuHelodi nuPonti Pilati navakunzi ninkolo zyontʼizya vana-Yisilayili vamuvunganiyʼuYesu uMunyamata waho umufinjile, wʼumupasile wenewe, 28vinzilʼukuvomba zyonti zyʼumuhono waho nulukasamo lwaho ukufuma hali ṿikasime ukuti zyinzaje. 29Shinishi lelo we Mwene uyenyaje she vakututetemwa, uvapanjʼavanyamata vaho ukuyangʼizwi shisitakunyila. 30Lwʼukugolosyʼumuhono waho uvazuzuvushizyajʼavantu, gope namamfindango namayele gapelwaje mwizina lya Munyamata waho umufinjile uYesu. 31Ilelo lwe vapusite pe pahandʼukuyinga pala pe vavungine, vonti vahizulʼuMupepʼuMufinjile, vahayangʼinongwa zya Mulungu nakunyila.
Impiya zya vwanamuntu
32Ilelo vonti ve vahitihaga valʼumwoyo woka mwene ninsingo yoka yene. Ahasitʼukuva pupo numʼuwa kuti: Shane nene neka, ishuma shakwe. Vahahanaga ṿwonti. 33Pʼavapositili vahaziyanga namahʼamapiti vahahomeshezyʼizya kuzyuhʼuMwene uYesu, nuvwankundwa vonti vahakundwa nkani. 34Pʼatali numʼuwa nzala, she vonti ve vali ninsi nave vali ninyumba vahazikazyaga, impiya zya vukazi zye vahazitwalaga, 35zye vahazivihaga kuṿinama ṿwa vapositili, ingʼavapositili ve vahavapanga panzala inza ṿwe vahayananaga naṿwo.
36UYosefu lelo wʼavapositili vamupiyʼilya Balinaba, lye likuti uWalusuvizyo umuLevi, wʼapafilwe mu-Sipelesi 37wʼali numugunda wakwe wʼahakazya, nimpiyʼizyo ahaziviha kuṿinama ṿwa vapositili.
Currently Selected:
Imbombo zya Vapositili 4: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
