Imbombo zya Vapositili 5

UAnaniya nuSafila

1Ilelo umuntu woka, wʼali wʼuAnaniya numushi wakwe wʼali uSafila ve vahakazya ṿimo ṿwe vali naṿwo. 2Izyenʼimpiya zye vaposheleye ahazyiha zimo, numushi wope azimanyile. Havili zimo ahavalʼukuziviha kuṿinama kuvapositili. 3PʼuwenʼuPeteli ahayanga nawo ahati: Ananiya, apatiye shonʼuSetano mumwoyo waho, atili umusheṿwaje uMupepʼuMufinjile, ukuti uzyishe zimʼimpiya zya nsʼila yʼukazizye? 4Lwʼushili ukukazya amwe itali yaho wenewe? Lwʼukazizye amwʼimpiya zitali zyaho wenewe Zyope? Zyʼukumbusile zyashi zinizi mumwoyo waho? Utavasheṿizyʼavantu ndali, umusheṿizye we Mulungu. 5UwenʼuAnaniya lwʼakwiṿwa amazwi ganaga, pʼahagwa pansi ahasililishila. Pe vonti ve viṿuye zinizi, ve shihavagwilʼishitetemwi ishipiti nkani. 6Avenʼavalumendo vahamuyananya, vahamunyatula, vahafuma nawo, vahamusyila.

7Ilelo lwʼutuvalilizyo tutatu tupitiliye pʼahinjila umushi wakwe umusitakuzimanya zye zyavomṿilwe. 8PʼuPeteli ahamuvuzya ahati: Mbuzya weya, insi yinyu she muhonzizye vovulo ukukazya mpela? Uwenʼahati: Ena, she tuhonzizye vovulo. 9UwenʼuPeteli ahamuvuzya ahati: Fwane mwitinkine ukumulinga uMupepo wa Mwene? Yenya, iṿinama ṿwʼava ve vasyiliyʼumulume waho yili pashilyango, vakwinzʼukukunyatula nawe shinishi, 10Luvilo luvilo ahagwa muṿinama ṿwa Peteli, wope ahasililishila, lwe vakwinjilʼavalumendo pe vahaga wope afuye. Pe vahamunyatula, vahafuma nawo, vahamusyila pupo pe vamusyiliyʼumulume. 11Ilelʼishitetemwi shihashigwila nishivanza shonti navantu vonti ve viṿuye zinizi.

Avapositili vakupela amamfindango nukukantulʼimpungo

12Izyenʼinyove zya vapositili zihapela amamfindango namayelʼaminji lwe vakwenyʼavantu, vonti vahayanga poka mumanda ya Solomoni, valʼumwoyo woka mwene. 13Avamwavo nyenʼavantu vahasita nukuva pupo, atalipo numo uwa kuyisanganya navo. Avantu vonti vahavamwamiha. 14Avene nyene ve vahamwitihagʼuMwene vahonjezelwa ukuṿula, avinji nava-naṿuli navantanda. 15Pe zihanda pupo izya kuvanyatula avavinu nukuvaviha pamasolo paṿilili napamazagala gavo, ukuti ingʼuPeteli akujenda pʼishinzyunguli shakwe shivazundilaje vamo. 16Vahakululuha avantʼavinji ve vafumile munkaya zye zyali kupipi namu-Yelusalemu, vahaleta navavinu nave valemilwe nimpepʼinkandamanu vonti ve vahazuzuvuha.

UPeteli nuYohani kuluhomano lwa vuhombe havili

17Pe vahavuha nuwashiputʼumupiti navamwavo vonti, ve vali mumpuga ya vaSadusayi, ahafwishi hahavalema. 18Pe vahavalema avapositili, vahavaviha mujela. 19Uwenʼuhavizya wa Mwene nyene ahigula kushilyango sha jela pavusiku, ahavafumwa, ahavavuzya ahati: 20Simuvale muhimilile apazelu mwa tempeli, muhavavuzyʼavantu inongwa zyonti zya vulanzi vunuvu. 21Avene lwe viṿuye linili, lwe kushiye pe vahalavila ukuvala mwa tempeli, vahasambilizyʼavantu. Uwenʼuwashiputʼumupiti nave vali nawo vahavitʼava luhomano lwa vahombe navasongo vonti va vana-Yisilayili. Pe vahavatuma mujela ava kuvaleta. 22Avenʼavanyamata lwe vafishe, pe vahaga vate mumwo mujela, pe vahagaluhʼukuvavuzya 23ukuti twazile ijela yigalilwʼahinza vope navasunzi vimiliye kushilyango, nkandi lwe twigulʼulwiji tutamwazile numo. 24Ilelo lwe viṿuye linili numusungatempeli navashiputʼavapiti, pe vahalanganʼavene vahati: Ilelo she shonu shinishi havili? 25Pʼahavala pupo pe vali wokʼumuntu, ahavavuzya ahati: Yenyi, avantu ve mwamavigaliye mujela vali mwa tempeli vimiliyʼapazelu, vakuvasambilizyʼavantu. 26Pʼumusungatempeli ahavala navanyamata vakwe ahavasenda, vahavolovela, she vahanyilagʼavantu, vahati, vatahatutinze namavwe. 27Vahavaviha mwe lwalʼuluhomano lwa vahombe. Pʼuwashiputʼumupiti ahavavuzilizya, 28ahati: Amwe tutavavuzizyʼimwe namaha ukuti mutahamusambilizye numʼumuntu mwizinʼili? Yenyi she mwizuzya inongwa zyinyu mu-Yelusalemu havili mukwanza ukutuletela amavanda ga muntʼula. 29PʼuPeteli navapositili avamwavo ahamula ahati: UMulungu navantu, she pakuti tumusajilʼuMulungu. 30UwenʼuMulungu wa vatata vitu amuzyusizye Yesu wʼimwe mwamugozile pala pe mwamuhomeleye pikwi. 31WʼuMulungu amwimisile ukuva wʼuChilongozi nuMuposhi uwa kumupʼuYisilayili ulupinduho nuvuswila vwa malandu. 32Ilelo naswe swe vahome va nongwa zinizi, wope nuMupepʼuMufinjile wʼuMulungu avapiye ve vakumusajila. 33Ilelʼavene zihavalasa mumoyo, vahati tuvagoje.

34Pʼahavuha woka muluhomano lwa vahombe, umuFalisayi, wʼali wʼuGamaliyeli izina, umusambilizyankomelezyo we vahamunyilaga nkani vontʼavantu, ahati: Simuvafumwe kunzi hansʼavapositili. 35Ahavavuzya ahati: Mwe vamwitu mwe vaYisilayili, zye mwolovele, mukumbushe; nkani izi zye mukuti tusundajʼavantu vanava. 36She patadiliye nkani pʼahavuhʼuTudiya, ahayiyanga ukuti wʼushitʼulive, vahamwumishizyʼava-ntʼavanaṿuli 400 we vahamugoga, avene ve vamulandite vuhasavalila, vahapalankana. 37Havili ulwa pisinda uYuda umuGalilayʼula, ahavuha pala pʼavantu vahavazilwaga nukusimbwa, ahavalulisyʼavantu vamo ukuti vamulandate. Wope ahalova, avene ve vamusajiye vuhasavalila. 38Mwe mumwo lelo ine nkuti: Avantʼiva muvafupushile muvaleshe. Shʼinga nazye vasiṿile nazye vakuvomba zifumile kuvantu pe zikuloleha, 39nkandʼinga zifumile kwa Mulungu, pe mutalizizimanjizya nalumʼimwe. Mwolovele, mutayipelajʼukuva mwe valwanuMulungu.

40Pe vahamwitiha, vahavitʼavapositili, vahavahoma, vahavavinda nkani ukuti vataliyangajʼizina lya Yesu. Pe vahavatavula. 41Avene lelo ve vahafuma nuluseshelo mwe lwalʼuluhomano lwa vahombe, she vapelilwe ukuhondela umusamu pazyʼizina. 42Vatatuzizyʼukusambilizyʼavantu amanda gonti mwa tempeli namunyumba mwe zyavaliye nukukumusyʼintumʼinyinza ya Yesu ukuti we wʼuChilisiti.

Currently Selected:

Imbombo zya Vapositili 5: NYi1965

Highlight

Copy