Imbombo zya Vapositili 1

Izya kutaliha

1Ukalata umutanzʼula we Teyofile, we nasimṿile munongwa zya mbombo zyonti zyʼuYesu atalisilʼukuvomba nkusambilizya, 2ukufiha kwisiku lila lyʼahanyatulwa ukuzuva kumwanya, lwe sutʼavalajizya mwa MupepʼuMufinjile avasundikwa vakwe vʼavasavuye. 3Nkutaha vuvo vʼahayilolesyaga munyinji ukuti ululanzi, lwʼafumile ukuyimba, vʼavitushizizye mumandʼamashumi gane, ahavavuzya nizya vumwene vwa Mulungu. 4Ilelo lwʼahomine navo, pʼahavalajizya ahati: Mutahafume mu-Yelusalemu, nkandi muhalugulilile ulumfingwi lwa Tata lwe mwiṿuye nakukwane, 5ukuti uYohani avozizyʼavantu nage minzi, nkandʼimwe nyene pasyaye pansi pe muliyozelwa mwe mwa MupepʼuMufinjile.

UYesu akuzuva kumwanya

6Avene lelo ve vavungine pupo, vahamuvuzilizya vahati: Mwene, amwe pʼukwinzʼukushindamisyʼuvumwene vwa Yisilayili pisiku lilyo? 7Uwenʼahamula ahati: Mutahondeyʼimwe kuwumanya nga mwaha nga havalilizyo hʼuTata atili he ha maha gakwe wuyo weka. 8Nkandi muliposhelʼamaha lwʼavishiyʼuMupepʼuMufinjile, pe muliva mwe vahome vane mu-Yelusalemu namu-Yudayi mwonti namu-Samaliya, mulifiha nakwipeleleyʼinsi. 9Ilelo pe lwʼayanzile zinizi, pʼahasompolwa lwe vakwenya, ivingo lihazuva nawo kuminso gavo. 10Ilelo lwe vatontomeye kumwanya, lwʼuwenʼasogoye, pe vahitushilʼavantu vavilʼava mendʼamazelu vimiliye navo. 11Ve vahati: Mwe vayaya, mwe vaGalilayʼimwe, mwimiliye shonu nukutontomeia kumwanya? UYesu wununo wʼasompolilwe kumwinyu nukuzuva kumwanya, wʼaliyinza vovulo inza she mumuwenyi akuzuva kumwanya.

Ukwitwa kwa musundikwa wʼishumi na vuvili

12Pe vahagaluhʼukuvala mu-Yelusalemu ukufuma kwigamba lye vahatinji Igamba lya Mavula, lye lili kupipi ku-Yelusalemu pahatambwi hʼisabati. 13Ilelo lwe vafishe pe vahazuva kunyumba ya kwigulu kwe vahatendamagʼavaPeteli nuYakobu nuYohani nuAndeleya nuFilipu nuToma nuBalitolomayi nuMatayi nuYakobu, umwana-Alifayi, nuSimoni uZelote nuYuda, umwana-Yakobu. 14Vonti vanava nyene valʼumwoyo woka nukwumishizyʼukuputa poka navantanda nuMaliya unyina wa Yesu navazuna vakwe.

15Mumanda gugo pʼuPeteli ahavuha nukwimilila pahati pavamwavo vala (uvwinji vwavo vali amashumʼishumi namashumigavili) ahati: 16Mwe vayaya, mwe vamwitʼimwe, zyonti zyali zya kwinza zila zye zisimṿilwe, zyʼaziyanzile uMupepʼuMufinjile mwilomu lya Davidi, zye zikumutahʼuYuda, wʼavalongoye ve vamulemilʼuYesu, 17Shʼuwene avazilwʼukuva wamwitu, wope aposheleyʼishigavo mumbombo yinino. 18Ishʼumuntʼuno ahalonkʼinsi namalipilo ge vamulipiye pavugulugulu vwakwe, ahayikunga ahagwa pansi shʼasulime, ahatumbunkana pahati, uvula vwakwe vwonti vuhafuma kunzi. 19Pe zyakumuha kuvantu vonti ve vasamiye mu-Yelusalemu, pe ninsʼila Vahayitaha ilya Hakelitama munjango yavo, lye likuti: Insi ya ṿipalazi. 20She mwa kalata wa Nyimbo lisimṿilwe lye likuti:

Inkaya yakwe pakuti iyipelajʼukuvʼitongo, numo atasamilaje mumwo,

nilya kuti:

Uvusunzi vwakwe vupwanilwaje nuwunji.

21Ilelo muvantu ve twavanga navo mumanda gonti gʼuYesu ajendaga mumwitʼumu, 22ukwanda kulwozyo lwa Yohani ukwinzʼukufiha pala pahasompolwaga ukuzuva kumwanya ukufuma kumwitu, woka muli vanava avanje poka naswe wʼuhome wa kuzyuha kwakwe. 23Pe vahasavula vavili, uYosefu we vatili uBalisaba, we vamupiye nilya Yusiti, nuMaliya. 24Pe vahaputa vahati: We Mwene, we mumanyinsanyamoyo ga vonti, umusonte muli vavilʼiva wʼumusavuye wewe, 25uwa kupwanila pambombo yinino napavwapositili vwʼuYuda avupulumuye ukuti avale pavuyo vwakwe wuyo. 26Pe vahilihʼishili, ishenʼishili shihamugwilʼuMatiya, ahavazilwʼukuva wa vishumi nawoka avapositili.

Currently Selected:

Imbombo zya Vapositili 1: NYi1965

Highlight

Copy