Yohani 21

UYesu akuvitushizya kwa sumbi wa mu-Tibeliya

1Ulwa pisinda uYesu ahavuyizya ahavitushizyʼavasundikwa bi vakwe kwa sumbi wa ku-Tibeliya. Ukwene lelo ukuvitushizya shʼahonzizye vovulo. 2She nuSimoni Peteli nuToma we vakuti we Lipasa, nuNatanayeli wa mu-Kana mu-Galilayi, navana-Zebedayi navamwavʼavasundikwa vavili vahavanga poka. 3PʼuSimoni Peteli ahavavuzya ahati: Ine nasogolʼuku-ṿuvʼinswi. Pe vahamuvuzya vahati: Naswe tukuvala swenti. Pe vahavalʼukuyipashila mwivoti. Nkandʼuvusiku vunuvu vahapotwa ukulema nazimo. 4Shandavi lelo lwe kushiye kunzi, pʼuYesu ayimiliye pashipuma. Avene nyenʼavasundikwa ve vatamumanyile ukuti wʼuYesu. 5PʼuYesu ahavavuzya ahati: Mwe twana mwe, ingavanga muli naṿwo yimo iṿwa kulya? Avene vahanawamula vahati: Ndali tute naṿwo. 6Uwenʼahati: Ulwelʼulwo mutajile kumulilʼuku kwivoti, pe mukuzyaga. Vahatajila. Pe luhavapota ukukwesa, she zyalʼinyinji inswi. 7Pʼumusundikwa ula wʼali wʼunkundwa kwa Yesu ahamuvuzyʼuPeteli ahati: WʼuMwene! UwenʼuSimoni Peteli lwʼayiṿuye ukuti wʼuMwene, pʼahazwalʼamenda gakwe, shʼali vulo, ahayitaga muminzi. 8Avenʼavasundikwa avamwavo vahajenda mwivoti ukuvala pʼali, she patalʼapatali kushipuma, pali pamahono 200, vahakwesʼulwelo lwa nswi. 9Ilelo lwe vazuṿile kushipuma, pe vahagʼumwoto wa mazimwa akwaha, ninswi yili pamwoto numukati pupo. 10PʼuYesu ahavavuzya ahati: Mulete zimʼinswi zye muṿuvile shinishi. 11PʼuSimoni Peteli ahinjila mwivoti, ulwelo ahalukwesela kushipuma, lwizuye ninswi zye mpiti ntupu, zyali 153. Ilelo pope nashenga zyalʼinyinji vovulo, pope ulwelo Gahazepunkana napamo. 12PʼuYesu ahavavuzya ahati: Nzagaji, mulavushe lelo. Avene nyenʼavasundikwa atahava numo uwa ukumuvuzilizya ukuti: We nanʼiwe? She vamumanyile ukuti we wʼuMwene. 13PʼuYesu ahapalamila, ahasendʼumukati ahavapa, ninswi vovulo. 14Kwe kuva lelo lwe lwa vutatu lunulu ulwa kuvitushizyʼavasundikwa vakwʼuYesu lwʼazyusile kuvafwe.

Izwi lya Yesu ilya halaji kwa Peteli

15Ilelo lwe valavusile, pʼuYesu ahayanga kwa Simoni Peteli ahati: Simoni, we mwana wa Yohani, amwe uvalusizye vanava ukunkundʼine? Uwenʼahamula ahati: Ena Mwene, shʼumanyile nawe ukuti nkukunzite. Pʼuwene ahamuvuzya ahati: Dimaga utugonzi twane lelo. 16Ahavuyizya ulwa vuvili ahati: Simoni, we mwana wa Yohani, amwe unkunzite? Uwenʼahamula ahati: Ena Mwene, shʼumanyile nawe ukuti nkukunzite. Pʼuwenʼahati: Dimaga ingʼonzi zyane. 17Ahavuyizya ahayanga ulwa vutatu ahati: Simoni, we mwana wa Yohani, amwe unkunzite? PʼuPeteli ahaswimililwa lwʼamuvuzilizizye ulwa vutatu lwʼatili: Amwe unkunzite? Pʼahati: Mwene, shʼiwe umanyile zyonti, umanyile nane ukuti nkukunzite iwe. Pʼahati: Dimaga ingʼonzi zyane. 18Nalyoli lyoli nkuvavuzyʼine nkuti: Lwe wali we mujaha iwe, pʼuhayifungaga wekʼilamba lyaho lya mumusana, uhajenda mwonti mwe wakasime weka, inga lumo ingʼuvazilʼukukula, pʼuligolosyʼamahono, uwunji alikufunga ilamba mumusana, alikudendemulila kwʼutakasimʼiwe. 19Zinizi nyene zyʼayanzile ukutashila mumwo uvufwe uvwa kwinzʼukumutimʼuMulungu uwene. Ilelo lwʼayanzile linili, pʼahati: Undandate.

20UwenʼuPeteli lwʼakushevela mwisinda, pʼahenya ukuti umusundikwa wʼali wʼunkundwa kwa Yesu ukumulandata, uno wʼayegamiye pashifuva shakwe lwe vakulyʼiṿwa shamazuva, wʼahamuvuzilizyʼuYesu ahati: Mwene, unanu wʼakukwanilila? 21UPeteli lwʼamuwenyi wununo, pʼahamuvuzyʼuYesu ahati: Mwene, akutuvuli wununo? 22UwenʼuYesu ahamuvuzya ahati: Apene pʼinga nkasimʼine ukuti ninzʼimwaje lwe ninzile havili, pe shonu wenewe? Ndandatagʼiwe. 23Pe lihanda ukuyangwa pupʼizwi, lihavala kuvamwavo, ilya kuti: Atakufwʼumusundikwa uno. NkandʼuwenʼuYesu atatili: Atakufwa, ndali, ayanzile lyeka lye lya kuti: Apene pʼinga nkasimʼine ukuti ninzʼimwaje lwe ninzile havili, pe shonu wenewe?

Izya kumalilizya

24Uwenʼumusundikwa wununo, we wuyo wʼakuzihomeshezya zinizi, wʼakuzisimba. Ilelʼiswe tumanyile ukuti uluhomeshezyo lwakwe lwa nalyoli. 25Zilipo zisyaye nizinjʼinyinji zyʼahavombagʼuYesu. Zyenga zyati zisimbwaje zyoka zyoka zyonti vwelele, ine nkuti avakalata inga vasimbwaga pe vasovaga munsʼumu apa kuva viha.

Currently Selected:

Yohani 21: NYi1965

Highlight

Copy