Yohani 20

Imbipa inyazi

1-18: Mat. 28,1-10. Mal. 16,1-11. Luk. 24,1-12.

1Ilelo pisikʼitanzi ilya pamulungu, pʼuMaliya wa mu-Magadala ahalavila nishisi, lwe kushili nukusha ahavala kumbipa, ahaga ivwe lya kumbipa lisegushe. 2Pʼahashimbila ukuvala kwa Simoni Peteli nakumusundikwa uwamwavo wʼalʼunkundwa kwa Yesu. Vʼahavavuzya ahati: VamwefizyʼuMwene mumbipa, ilelo tutamanyile kwe vamuvisile. 3Pe vahafuma muhaya nuPeteli nuwamwavʼumusundikwa ula, vahavala kumbipa. 4Vahashimbila ve vavili vahajenzanya, ilelʼuwamwavo umusundikwa ula wʼahaleshelelʼuPeteli, ahataliha ukufiha kumbipa. 5Ilelo pe lwʼakwinanjizya mumbipa, pʼahalolʼamenda ge vamusyiliye, ahaga inza she galambalaye. Uwene nyene ahasitʼukwinjila. 6Pʼahafiha wope nuSimoni Peteli wʼamulandite mwisinda, wʼahinjila mumbipa, ahenyelezyʼamenda ge galambalaye. 7Uwenʼumwenda wa matwinsi wʼali pitwe lyakwe, wʼahaga vatuvishe pagamwavo ge vamusyiliye nago ndali, ahaga vawupintinye, vavisile payo. 8Pe nuwamwavo umusundikwa ula wʼatalisile ukufiha kumbipa wope ahinjila lelo ahenya, pʼahitiha. 9Shʼavene vashilʼukumanyʼukalata wʼakuti pakuti azyuhaje kuvafwe uwene. 10Pe vahavwela kuhaya avasundikwa vanava.

UYesu akumwitushizya uMaliya

11NkandʼuwenʼuMaliya wʼahimilila kunzi, ahalungamana nimbipa, ahakutʼamansozi. Ilelo lwʼamakukuta vovulo, pʼahinanjizya mumbipa. 12Pʼahagʼavahavizya vavili, ve vazwayʼamendʼamazelu, vatendime woka kwitwe woka kuṿinama mwʼakasitʼumuvili wa Yesu. 13Pʼavene vahamuvuzilizya vahati: We mwantanda, ukukuta shonu? Uwenʼahati: She nazile vamwefizyʼuMwene wane, ilelʼine ntapazile pe vavazilʼukumuviha. 14Ilelo lwʼayanzile linili, pʼahashevela, ahenya mwisinda, ahagʼuYesu ayimiliye pupo. Uwene nyene atahamumanya ukuti we wʼuYesu. 15PʼuYesu ahamuvuzya ahati: We mwantanda, ukukuta shonu? Ukumwanzʼunanu? Uwene shʼatili musungabusitani, pʼahati: Mwene, ingʼumwefizyʼiwe, pʼumbuzyaje kwʼuvazilʼukumuviha, imbalʼukumusenda. 16PʼuYesu ahamuvuzya ahati: Maliya! Uwene pʼahasyetuha nzila, ahayanga shi-Hebuli ahati: Labuni (lye likuti: Musambilizi). 17PʼuwenʼuYesu ahamuvuzya ahati: Utahampalamansye mumuvili, she nchili ukuzuva ukuvala kwa Tata, nkandi valaga kuvamwitu, vavavuzye ukuti: Nkuzuva kwa Tata swenti namwe nane, kwa Mulungu witu swenti namwe nane. 18PʼahavalʼuMaliya wa mu-Magadala, ahavavuzyʼavasundikwa ahati: ImuwenyʼuMwene, ambuzizye lilino lilino.

UYesu akuvitushizya avasundikwa

19-23: Mal. 16,14-18. Luk. 24,36-49.

19Umusanyʼuno lelo lye lisikʼitanzi lya pamulungu, shamazuva, lwe vigaliye nakushilyango mwe vavunginʼavasundikwa, she vahatetemaga kuvaYuda, pe vahitushilʼuYesu ayinzile ayimiliye pahati, akuti: Uvwihalo vuvanje namwe! 20Ilelo lwʼayanzile linili, pʼahavasontela amahono nuluvazu. Pʼavenʼavasundikwa vahaseshela lwe vamuwenyʼuMwene. 21UwenʼuYesu ahavuyizya havili ahati: Uvwihalo vuvanje namwe. Inza shʼuTata antumile nane, she nane nkuvatuma vovulo namwe. 22Ilelo lwʼayanzile linili, pʼahavaputilʼumuyu, ahati: MuposhelajʼuMupepʼuMufinjile. 23Ava venga mukuswilʼamalandu gavo imwe, pe gaswililwe vovulo, ava venga mukuvaleha nago, pe valesilwe nago vovulo.

UYesu akumwitushizya uToma

24UwenʼuToma, woka uwa vishumi navavili, uno we vatili we Lipasa, we vatali nawo lwʼayinzilʼuYesu. 25Pe vahamuvuzyʼavasundikwa avamwavo vahati: TumuwenyʼuMwene. Uwene nyene ahavavuzya ahati: Inga ntalolʼamavamba ga masumali mumahono gakwe, ingʼinyove zyane ntaviha mumavamba ga masumali, inga numuhono wane ntaviha paluvazu lwakwe, pe vovulo pe ntaliyitiha ine. 26Ilelo lwe vadiliyʼamandʼumunana, pʼavasundikwa vakwe vahava mumwo nohavili, wope nuToma ali navo. Ilelo she vigaliye nakushilyango, pʼahinzʼuYesu, ahimilila pahati, ahati: Uvwihalo vuve namwe. 27Pʼahavalʼukuyanga kwa Toma ahati: Letʼulwove lwaho ipa, uyenye amahono gane, numuhono waho uwuvishe paluvazu lwanʼipa, utavanje nuluhano ndali, uyitihaje lelo. 28PʼuToma ahamula ahamuvuzya ahati: Mwene wane, Mulungu wane! 29UwenʼuYesu ahamuvuzya ahati: Iwe shinishi pʼuyitisile shʼumbwenyi ine, vasangalusu ve vakwitiha shisitakwenya.

ZyʼIvangeli ili lizilulumiye

30Niṿinjʼiṿimanyilo iṿwamwavo uYesu ahavapela kuminso kuvasundikwa vakwe, ṿwe ṿitasimṿilwe mwa kalata uno. 31Nkandi iṿwene ṿiniṿi ṿisimṿilwe ukuti mumwitihajʼuYesu ukuva we wʼuChilisiti, ukuva we Mwana wa Mulungu, ukuti muvanje nuvulanzi mwizina lyakwe, inga mukwitiha.

Currently Selected:

Yohani 20: NYi1965

Highlight

Copy