Yohani 19

UPilati akumuvihʼuYesu munyove zya vaYuda

1IlelʼuPilati ahamusendʼuYesu, ahavaninchilizya ava kumusyempa. 2Avenʼavasikali vahazingʼishipambwi sha lwangwa, she vahamuviha kwitwe, vahamuzwiha numwendʼumushemamu. 3Pe vahamwinzila vahati: Tukukulamuha we mwene wa vaYuda, havili vahamuhoma nikofi. 4Havili uPilati ahafuma kunzi, ahavavuzya ahati: Yenyi, nkumufumwa kunzi kulʼimwe, she nkuti mumanye namwe ukuti ntawazile numʼumulandu ine mumwakwe. 5PʼuYesu ahafuma kunzi shʼazwayʼishipambwi sha lwangwa numwendʼumushemamu. Uwenʼu-Pilati ahati: Yenyi, umuntʼuno! 6Avene nyene navashiputʼavapiti navanyamata vavo lwe vamuwenyi, pe vahavilishila vahati: Umuhomele pashihovenkanyo, umuhomele pashihovenkanyo. UwenʼuPilati ahamula ahati: Simumusende mwenemwe, mumuhomele pashihovenkanyo mwenemwe! Shʼine ntawazile numʼumulandu mumwakwe. 7AvenʼavaYuda vahamula vahati: Iswe tuli nuluhomelezyo, ilelo uluhomelezyo lunulu lukuti pakuti afwanje, shʼayipezilʼukuva Mwana wa Mulungu. 8UwenʼuPilati lwʼayiṿuyʼizwi linili pʼahonjezyʼukutetema. 9Ahinjila nohavili munyumba ya vulonzi, ahamuvuzyʼuYesu ahati: Ufumile kwi? UwenʼuYesu atahamwamula. 10PʼuPilati ahamuvuzya ahati: We sutakuyanga nane? Utamanyilʼine ukuti ndi namaha ga kukutavula, havili ndi namaha ga kukuhomela pashihovenkanyo? 11AhamulʼuYesu ahati: Vapele vatakupiyʼamaha kwe kumwanya, nkandi ute nago nagamo kukwane. Mwe mumwo wuyo wʼandesite kukwaho wʼumulandu wakwe alusizyʼuvupiti. 12Zye zizyo uPilati atili imutavule. AvenʼavaYuda nyene vahavilishila vahati: Ingʼukumutavula wununo, pʼute we mujenzi wa Kesali. Shʼuno wengʼakuyitemwa weka ukuva wʼumwene, wʼamusambushiye uKesali. 13Lwʼayiṿuye amazwi ganaga uPilati, pʼahafuma nawo kunzʼuYesu, ahatendama pashitengo sha kulonjela, ahava pupo pe vakuti pe pa-Vayʼamavwe, pʼavaHebuli vakuti pe pa-Gabata. 14Apene nyene pali pe pachiyeluka sha Pasa, pahavalilizyo ha mutanda. AhavavuzyʼavaYuda ahati: Yenyi, ali uyʼumwene winyu. 15Avene nyene vahavilishila vahati: Mwefwaje, mwefwaje, umuhomele pashihovenkanyo. UwenʼuPilati ahavavuzya ahati: Imuhomele pashihovenkanyo umwene winyu? Pʼavashiputʼavapiti vahamula vahati: Tute numwene uwunji iswe, tuli nawo uKesali weka.

Ukuhomelwa uYesu pashihovenkanyo

16-30: Mat. 27,31-50. Mal. 15,20-37. Luk. 23,26-46.

16Pʼahavaninchilizya ukuti vamuhomele pashihovenkanyo. 17Pe vahamusendʼuYesu, vahavala nawo. Uwene ahanyatulʼishihovenkanyo shakwe, ahafuma munkaya, ahavala pala pe vakuti pe pa-Lupanga, pʼavaHebuli vakuti pe pa-Goligata. 18Pe vahamuhomela pashihovenkanyo. Vahavahomela poka nawo paṿihovenkanyo ṿwavo navanji vavili, woka uku woka uku, uwenʼuYesu vahamuviha pahati. 19UwenʼuPilati wʼasimṿile nuvusimbe vwʼahaviha pamwanya pashihovenkanyo. Lyasimṿilwe lye likuti: wʼuyesu wa mu-Nazaleti, uMwene wa vaYuda. 20Uvusimbʼuvu vwe vahenyʼavinji avaYuda, she pali pe papipi ninkaya pe vamuhomeleye pashihovenkanyo uYesu. Vwasimṿilwe namushi-Hebuli, namushi-Loma, namushi-Giliki. 21Avene nyene avashiputʼavapiti va vaYuda vahamuvuzyʼuPilati vahati: Utasimbaje ilya kuti: Umwene wa vaYuda, nkandi ukuti we wuyo wʼatili: Ne mwene wa vaYuda ine. 22UwenʼuPilati ahamula ahati: Zye nsimṿilʼine zye nsimṿile nzila.

23Avenʼavasikali lwe vamuhomeleye pashihovenkanyo uYesu, pe vahasendʼamenda gakwe, vahagavana pane, wokʼumusikali agakwe, wokʼagakwe. Yope ninkanzu yakwe vahasenda. Iyene nyenʼinkanzu yali itali nuvumame navumo, lyali lihove mwonti ukufuma pamwanya. 24Pe vahavuzanya vahati: Ye tutalepule ndali, ye twilishʼishili mwe tumumanye wʼakwʼayisende. Mwe zihalunjiha zizyo zye zisimṿilwe zye zikuti: Vagavinʼamenda gane, iyenʼinkanzu yane ye vahiliha ishili. She vahahonzya vovulʼavasikali.

25Vahimilila pupo, vahalungamana nishihovenkanyo sha Yesu nawe nyina, nawe munine wa nyina, nawe Maliya umuha Chiliyopa, nawe Maliya wa mu-Magadala. 26UwenʼuYesu lwʼawenyi nunyina numusundikwa wʼali wʼunkundwa kukwakwe, wope ayimiliye pupo, pʼahayanga kwa nyina ahati: We mwantanda, uno we mwana waho. 27Pʼahamuvuzya umusundikwʼuno ahati: Yenya, uvinyu wununo. Uwenʼumusundikwʼuno ahitiha he havalilizyo hanaha, ahamuposhela kunkaya yakwe.

28Pisinda pazinizi lelo, lwʼamanyilʼuYesu ukuti zisizile zyonti, pʼahati: Numilwe. Shʼuwenʼahati zisile nzila zyonti zye zisimṿilwe. 29Ilelo pe lwali pupʼuluviga lwe lwizuyʼipele lya asiki. Avene vahatonteha ahenda mwipele lya asiki, vahafwila kwitete, vahapalamizya kwilomu lyakwe. 30Ilelo lwʼaposheleyʼipele lya asiki uYesu, pʼahati: Zyasila. Pʼahagovoha itwe, ahasililishila.

Izya kulaszva nimpalala nukusyilwa

31Avene nyenʼavaYuda vahati amayimba gatalindaje paṿihovenkanyo pisabati, shisiku lya sabati lila lyali lipiti, she havili pali pe pachiyeluka, vahavala ukulambilizya kwa Pilati, vahati: Inga vavapwotagʼiṿinama, inga vavefwaga paṿihove-nkanyo. 32Pe vahavalʼavasikali, vahataliha pamutanzi vahamupwotʼiṿinama, vahavala kuwamwavo wʼahomelilwe poka nawo pashihovenkanyo. 33Ilelo pe vahavala nakwa Yesu, uwene vahaga afuye hali, pe vahasitʼukumupwotʼiṿinama. 34Nkandi wokʼumusikali ahamulasa nimpalala paluvazu, ilelo pe gahazwa mumwo namavanda naminzi. 35Uwenʼuno wʼaziwenyi zinizi, wʼazihomeshezizye. Ulwenʼuluhomeshezyo lwakwe lwe lwa nalyoli. Ilelʼuwene amanyile ukuti akuyanga zye zya nalyoli, shʼakuti mwitihaje namwe. 36Zinizi nyene zye zyapezilwe ukuti lilunjihaje izwi lye lisimṿilwe mwa kalata lye likuti: Nalimʼifupa lyakwe lye lilipwotwa. 37Havili ilinjʼizwi lya mwa kalata likuti: Valimulola we vamulasile.

38-42: Mat. 27,57-61. Mal. 15,42-47. Luk. 23,50-55.

38Pisinda pazinizi, pʼuYosefu wa mu-Alimatiya, wʼalʼumusundikwa wa Yesu kukwilu, shʼahatetemaga kuvaYuda, ahalavʼiṿimba lya Yesu kwa Pilati, ahati: Mpanga, ndyefwe pashihovenkanyo. PʼuPilati ahitiha. Lelo ahajenda ahefwʼiṿimba lyakwe. 39Ahavala wope nuNikodemo wʼavazile kwa Yesu pavusiku itanzi lila, ahatwalʼumulembo umuhali we vakuti umila izina nivata pupo, pʼahava pamapaundi 100 uvumwamu. 40Ve vahasendʼiṿimba lya Yesu vahalipinya namendʼamazelu, vahaliviha namalembo, inza she galʼamiho ga vaYuda aga kusyila. 41Ilelo yali pupʼibusitani pe vamuhomeleye pashihovenkanyo. Ilelo mubusitani mwe yalʼimbipʼimpwa mwe mumwo vatamuvisile numo nalumo. 42Mwe vahamuviha uYesu, she pe pachiyeluka sha vaYuda, yope nimbipa yali papipi.

Currently Selected:

Yohani 19: NYi1965

Highlight

Copy