JAN 15

Jesu wí nyɛ hrɛsɛn ticɛnŋɛ

1Mí nyɛ hrɛsɛn ticɛnŋɛ. Na To wɔ̀ɔ po ki falifɔlɔ. 2Kaclaʔa ga kí bi bo ná na bí bo koò na seri ge, pɔɔ baʔa tɛ bìʔi laʔa wa. Ga kí bi da pibi seri ge, pɔɔ daʔa hanri bì daʔa yɛli, jango ki da seri ki toro kplɛʔɛ na ge. 3Yé ma yɛli kɔ kayoro da fanŋa ni mi dáa nyu ye kan ge. 4Ye kò wa na nî. Mì fanna, pa mi go wa ye ni. Kaclaʔa nàʔa ko kì yɛ ge, kòo gban bì sɛ kí po ki ìn bwɔ wa tino na we. Kí nyɛ ban kpo yèé ní be. Yòo gban bì pibi sɛ yè yɛ ge, kí po ye ìn go wa mì ni we.

5Mɛjɛn mí nyɛ tiʔi. Yèé yé nyɛ kaclara. Ŋa wí bi go wa na nî ge, domi nà mi ko wa wi nî kpo ge, ki woo pɔɔ da pibi fafaʔa seri. Mɛjɛn yòo gban bì yraʔa kà hanri yè yɛ na kruʔu ma ge. 6Hɛn o hɛn ŋa wi ìn bi go wa domi ni we, pa pe ki woo yrigi bùu wa finmi na, nɛ pa kaclara da nyɛ toò na pibi seri ge, á pe ti wa finmi na, jango tí waʔa ge. Pé bi ba ti kpoʔolo bì ti wa kwɔʔɔ nî ti hògó. 7Nà ye ko wa na nî ge, na kayoro nà ti ko wa ye ni kpo ge, yraʔa o yraʔa ga kí bi ye glan ge, yeʔe nyɛ̀rí, pa yeʔe ta. 8Nà ye pibi fafaʔa sɛ bí na To wi kpangbanma tyɛʔɛ me hɛɛn na be, pa ye bo na ploʔofɛɛ. 9Mí na To glanʔa we pomo ma na ge, yèé fanna, yé na na glanʔa ban kpo. Ye kò ye da na glànʔá su. 10Nà ye da na kayoro kpɔʔɔ de, paʔa bo mí na ye glanʔa nɛ pa mí na na To wi woro kpɔʔɔ de wɔ́ɔ na na glanʔa kpo ge.

11Mí ma ki kaʔa gee yo ge ye kan, jango na lafiʔimi mi po ye ma, yèé yè lafiʔimi mi fùnŋù kpo. 12Na funru kayoʔo kí ga: Ye da yè glanʔa nɛ pa yé na na glanʔa pomo ma na ge.#15:12 ma wèle wa Jan 13:34; 15:17; 1Jan 3:23; 2Jan 5 ni wè.

13Glanʔama mà wò wa adi ma mí bi gbɔʔɔ bi doro ma na me: Hɛn wi wì kân kùʔù ma ge wi nagroboo kan be. 14Yèé nà ye da ga hanri mí ma yo ye ma ge, pa ye bo na nagroboo. 15Mi ìn bi da ye yeri tungɔɔ adi, mɛjɛn tungɔɔ wi ín jé da ga cɛnni wi kundiʔi wí na hanri ge. Di mí bi da ye yeri na nagroboo, mɛjɛn mí ma kaʔa kè bɛfu tyɛʔɛ ye na gee mí ma loʔo na To ma we. 16Yèé ban yé ma na fara ge. Mì wi mí ma ye fara ge mà ye tɛnŋɛ jango yee sye, ye yaa pibi ba seri pí bi go be bí pi nyiŋi han ge. Nàʔa po ban, yraʔa o yraʔa ga yé bi nyɛri To ma we na yele na le, pɔɔ ki kân ye ma. 17Ga mí bi yo ye kan ge, kí ga: Ye da yè glanʔa.

Drunya wí ma Jesu cɛ we ní wi woo ní be

18Drunya hɛɛn pa pe ye cɛ ge, yeʔe cɛn ye yo pe da glú mà mì cɛ we kpɛn. 19Nà ye dí bo drunya wi woolo ge, ye dí bì da drunya hɛɛn glanʔa be ga na yé nyɛ pe woolo ge. Di pa mi da gâ ye fara naʔa drunya ni we, yoò nyɛ drunya wi woolo. Kiì kala na, drunya wí ma ye cɛ ge. 20Ye honri na kayoro na de da mi dá yo ye ma ge mâ yo: ‹Tungɔɔ wòo gban bì gbɔʔɔ bì doro wi kundiʔi na we.› Nàʔa po pé ma na cɔlɔ ge, pa pe ye cɔlɔ kpo. Nàʔa po pé ma na kayoro kpɔʔɔ de, pa pe yè woro kpɔʔɔ de kpo.#15:20 ma wèle wa Mat 10:24; Luk 6:40; Jan 13:16 ni wè. 21Di pé bi ki woʔo ga hanri ge ye na na yele kala na, mɛjɛn pe ìn ŋa cɛn wí ma na tun ge. 22Nàʔa po mi ìn dà ban bi baa nyu pé ni ge, kapeʔe ìn dì bî bo pé na. Di ŋaŋa ni ge, tanʔa wò nyɛ pé ma pe kapeʔe namyɛlɛ na le. 23Nà hɛn wà bi ná cɛ ge, paʔa bo wí ma na To cɛ we kpo. 24Nàʔa po mi ìn dàá kaʔa kèè hanri wa pe nî ge, gee hɛn wɛ̀ ìn je glu bíi ké hanri ge, kapeʔe ìn dì bî bo pé na. Di ŋaŋa ni ge, pé ma ga nya mí ma hanri ge. À pe wo cɛ mì nì na To nì we, 25jango ki kayoro ti fùnŋù da tí nyɛ wa nyoŋoro pe furu kayoro sɛbɛ ni we mâ yo: ‹Pé ma na cɛ yugu fun.›#15:25 ma wèle wa Ŋuru 35:19; 69:5 ni wè.

26Mí bi yà haʔafɔlɔ troʔo naʔa ye ma, ŋa wí bi jɛ wa na To ma we. Nòo gá ban nyiŋi ga na ge, pɔɔ ba na kala tyɛʔɛ le ye na. Ki haʔafɔlɔ wí nyɛ Nyɛʔɛlɛ li Nyìli la li lí na jrɛʔɛ wa To ma we mâ na kanyɛmɛ teri hɛɛn na be ge. 27Yèé fanna, yé bi bo na kala li jarifɛɛ, mɛjɛn yé nyɛ ná ni mà kpe na tunŋu ki hlinyiŋi na ge.

Currently Selected:

JAN 15: NLK10

Highlight

Copy