JAN 14

Jesu wí nyɛ kloʔò ga kí na nori wa To na we

1Jesu wɔ̀ɔ pé po: «Yè lama mò gáa wlele ye na. Ye pà Nyɛʔɛlɛ na le. Ye pà domi na we kpo. 2Korohara fafaʔara nyɛ wa To wi go nî ge. Nà ki ìn dì bo ban ge, mi dí bìʔi yo ye kan. Mí na sye bì yà deʔe kà hanri ye kan. 3Nà mi ga gɛri bi yá deʔe kà hanri ye kan, pa mi hru bì ban naʔa bì ba ye kpe, jango, deʔe ga na mí nyɛ ge, ye po wa kpo. 4Mí na sye deʔe ga na yé ma ki kloʔò cɛn ge.» 5Toma wɔ̀ɔ wí po: «Na fɔlɔ, má na sye deʔe ga na wo ìn ki cɛn. Pa woʔo po mɛlɛ bí ki kloʔò cɛn ge?» 6Jesu wɔ̀ɔ wí po: «Domi mí nyɛ kloʔò mà po kanyɛmɛ mà po nyuwyeʔe. Hɛn wà wóo gban bì no wa To na we na kruʔu na. 7Nàʔa po ye di na cɛ́n ge, paʔa bo ye dí na To cɛn we kpo. Ŋaŋa ni ge, yé moo cɛn. À yoo nya.»

8Filipe wɔ̀ɔ wí po: «Na fɔlɔ, ma To tyɛʔɛ we wo na. Nàʔa po ban, wò lama pà mi fiʔi.» 9Jesu wɔ̀ɔ wí po: «Filipe, mí ma mo naʔa ye ni. Mɛ ìn je na cɛn yo? Hɛn ŋa wí ma na nya ge, ki woo wí ma To nya we kpo. Má yo bì To tyɛʔɛ we ye na mɛlɛ nɛ? 10Moò baʔa na yo bí yo mí nyɛ wa To ni we. To wiì fanna wɔ́ɔ po naʔa mì ni we? Kayoro da mí na nyu ye ma ge, mì na tapolo woro ban. Di na To ŋa wí na kori wa na nî ge. Wiì wi wí na wi kaʔa hanri ge wa na nî ge. 11Ye pàʔá na, yeʔe cɛn ye yo mí nyɛ wa To ni we. To fanna wɔ̀ɔ po naʔa mì ni we. Nàʔa po ye ìn bi baʔa na na kayoro ti fanŋa ni ge, ye pàʔá na kaʔa gee fanŋa ni mí na hanri ge. 12Mí biʔi yo ye ma kanyɛmɛ na, hɛn ŋa wí bi ba ná na ge, pɔɔ da na kahranʔa kee hanri bì nì bì da kèè hanri ke kpondo ke toro gee na ge, mɛjɛn mí na sye na To krugu we. 13Nà ye yraʔa o yraʔa ga nyɛri wí ma na yele na le, pa miʔi hanri ye kan, jango bì da To wi kmara teri de hɛɛn na be.

14Ee, nà ye yraʔa o yraʔa ga nyɛri ná ma na yele na le, pa miʔi hanri ye kan.

Jesu wí ma Nyɛʔɛlɛ li Nyìli li panma kayoʔo yo

15Nàʔa po mí na ye glanʔa ge, pa ye da na kayoro kpɔʔɔ de. 16Mí bi yà na To nyɛri we wi haʔafɔlɔ wà troʔo naʔa ye ma nɛ jango wi baa gòrí naʔa ye nì su. 17Ki haʔafɔlɔ wí nyɛ Nyɛʔɛlɛ li Nyìli li, la lí nyɛ kanyɛmɛ yofɔlɔ we. Drunya hɛɛn pòo gban bìʔi ta li po pe haʔafɔlɔ, mɛjɛn poò na li nyaʔa. Pòo gban bì li cɛn. Di yèé yé ma li cɛn, mɛjɛn lí na kori wa ye nì. Lí bi bo wa ye ni.

18Mi ìn bi ye yaʔa ye kò yè yɛ haʔafɔlɔ fun. Di mí bi da ban yè krugu. 19Ki kó cɛnri, drunya hɛɛn pe ìn bi gà ná nya adi. Di yèé yé bi ba na nya nɛ. Pa mi gâ bo nyuwyeʔe na, yèé fanna, yé bi ba bo nyuwyeʔe na kpo. 20Ki nyiŋi na ge, pa ye naʔa cɛn bì yo mí nyɛ wa na To ni we bìʔi cɛn nɛ bì yo yé nyɛ wa na nî, domi à mi po wa ye ni.

21Ŋa wí na na furu kayoro kpɔʔɔ de, paʔa bo mí na ki woo glanʔa we. Mí na hɛn ŋa glanʔa ge, ki woo wi naa na To glanʔa we. Pɔɔ da mì glanʔa we kpo. Pa mi nà tyɛʔɛ wí na.»

22Judasi ŋa pe dáa yeri Isikariyɔte ge, wɔ̀ɔ yo: «Na fɔlɔ, kí nyɛ mɛlɛ á ma yo, má bi mà tyɛʔɛ wo na, di mɛ ìn bi mà tyɛʔɛ drunya hɛɛn na be ge?» 23Jesu wɔ̀ɔ wí po: «Nà mi da hɛn ŋa glanʔa ge, ki woo pɔɔ da na kayoro kpɔʔɔ de. Ki woo pɔɔ da na To glanʔa we. Domi nì, na To nì, pa wo ban ki woo krugu we bì ba go wa wi ní. 24Nà mi ìn da hɛn ŋa glanʔa ge, wòo da na kayoro kpɔʔɔ de. Kayoro da yé na nuru ná ma ge, mì na woro ban. To ŋa wí ma na tun ge wiì woro di.

25Mí ma ki kaʔa yo ge ye kan, mɛjɛn mí nyɛ naʔa ye nì adi. 26Haʔafɔlɔ ŋa To wí bi droʔo naʔa ye ma na yele na le, wí bi ba ye ploʔo kaʔa kè bɛfu ní bì nì bì lama to ye na kaʔa kè bɛfu ní gee mi dáa nyu ye kan ge. Ki haʔafɔlɔ wiì wi ŋa Nyɛʔɛlɛ li Nyìli ní le.

27Nyimi mi mí bi gân ye ma ge. Mi ìn bi mi kân ye ma nɛ pa drunya hɛɛn pé na mi kanʔa pomo ma na ge. Yè lama mò gáa wlele ye na. Yò gáa fyaʔa kpo. 28Mi diʔí yo ye kan, à yeʔe loʔo mà yo mí na sye, di mí bi yà hru bì ban nɛ yè krugu. Nàʔa po mi dí bo na ye glanʔa kanyɛmɛ na ge, ye dí bì bo lafiʔimi nì, ga na mí na sye na To krugu we, mɛjɛn wí ma kpɔʔɔ mà toro mì na we. 29Ga kí bi ba hanri kruʔuma ni we kiì gi mí ma yo ye kan kɔ ŋaŋa ni ge, jango nàʔa gá baa hanri ge, ye pà na kayoro na de. 30Mi ìn bi kaʔa fafaʔagaa yo ye kan adi, mɛjɛn drunya wi kundiʔi wí na pan wa. Di wi fanŋa wò nyɛ ná na. 31Di ga To wí yo bì hanri ge, kiì gi mí bi hanri ge, jango drunya hɛɛn peʔe cɛn pe yo To wí na na glanʔa. Ye jɛ̀, wò kɛ́.

Currently Selected:

JAN 14: NLK10

Highlight

Copy