JAN 13

Jesu wí ma wi ploʔofɛɛ pe cyeʔe jeʔe ge

1Sanni Toromo srɛʔɛ fɛti nyiŋi kí bi no ge, Jesu wi daʔa cɛ́n mà yo nyiŋi kí ma tyɛʔɛ ga na wí bi nyini naʔa drunya ni bì gɛri wi To krugu we. Bee pe da bá wí na naʔa drunya ni we, pe dáa wi glanʔa su. Ali pe dáa wi glanʔa fɔ wi kunyiŋi na ge.

2Pa pe da gáa yebliʔi hro li de, Sotanri wɔ̀ɔ po wi klú màʔa le wa Simo pyɔ Judasi Isikariyɔte wi lama ni me wi Jesu le wi bɛnfɛɛ pe kyɛrɛ̀ ni de. 3Jesu wi daʔa cɛ́n mà yo wi To wí ma sye wì bɛfu kan wí ma. Wɔ̀ɔ ki cɛn nɛ mà yo wi dá jɛ wa Nyɛʔɛlɛ liì na mà pan bì ba hru bì gɛri nɛ. 4Wɔ̀ɔ jɛ be lihaʔa na ge mà yere mà wi dreʔe fara ge màʔa tyɛʔɛ mà kpasyoʔo kpe màʔa pwɔ wì na. 5Ki kruʔu ma, wɔ̀ɔ nyumu le tasa wà ni mà mi tyɛʔɛ na wi ploʔofɛɛ pe cyeʔe jeri ge mí ni na toro mà na ke tuʔu pé na kpo kpasyoro da nì wi dá bwɔ wì na ge. 6Nyiŋi ga na wi yâ no Simo Pyɛri na we. Pyɛri wɔ̀ɔ wí po: «Na fɔlɔ, mo má bi na cyeʔe jeʔe ge kpo yo?» 7Jesu wɔ̀ɔ wí po: «Ga mí na hanri ge, moò na ki kɔ̀rɔ́ cɛnni we ŋaŋa ni ge. Di má bi bɔɔ cɛn kruʔu ma ni ge.» 8Pyɛri wɔ̀ɔ wí po: «Mi ìn biʔi ta bì na cyeʔe yaʔa ge ma ke jèʔé ná na fyeu.» Jesu wɔ̀ɔ wí po: «Nà mi ìn ke jeʔe ge, moò ma tama ta wa na ma.» 9Simo Pyɛri wɔ̀ɔ wí po: «Na fɔlɔ, nàʔa po ban ge, mò gá na cyeʔe kee nigbe jeʔe, di ma na kyɛrɛ̀ nì, ní na yugu jeʔe de kpo.» 10Jesu wɔ̀ɔ wí po: «Hɛn ŋa wí ma fogo kɔ ge, wí ín jé jori bì fogo nɛ fɔ mà laʔa wi cyeʔe jeʔeme na, mɛjɛn wí nyɛ ylɛɛ ko. Yèé yé nyɛ ylɛɛ, di yè bɛfu ban.» 11Jesu wi dá ŋa cɛn wi dá bì bɔɔ le wi bɛnfɛɛ pe kyɛrɛ̀ ni de. Kiì gi ki da gan wɔ́ɔ kí yo mâ yo: «Yè bɛfu wò nyɛ ylɛɛ ge.»

12Nyiŋi ga na Jesu wi da gâ pe cyeʔe jeʔe ge kɔ ge, ma yâ wi dreʔe le ge, wɔ̀ɔ bâ glɛn nɛ mà pe po: «Ga mí ma hanri ye na ge, yé ma ki kɔ̀rɔ́ cɛn we yo?#13:12-15 ma wèle wa Luk 22:27 ni wè. 13Yé na na yeri “krɛʔɛfɔlɔ” mà nì na na yeri nɛ wò fɔlɔ. Yé ma kayocɛnŋɛ yo, mɛjɛn mí nyɛ ban. 14Nàʔa po ban ge, mì ŋa mí nyɛ yè krɛʔɛfɔlɔ mâ nì mâ po yè fɔlɔ we, nàʔa po mí ma yè cyeʔe jeʔe ge ye na ge, kí ma yala yèé ye da ke jeʔe yè na ban kpo. 15Mɛjɛn mí ma lɛgɛ tyɛʔɛ ye na, jango ye daʔa hanri ye kân nɛ pa mí maʔa hanri ye na pomo ma na ge. 16Mí biʔi yo ye ma kanyɛmɛ na, ŋklo woò nyɛ kpangbanŋa bì doro wi fɔlɔ na we. Ŋa pé ma tun ge wòo gban bì gbɔʔɔ bì doro ŋa na wí moo tun ge.#13:16 ma wèle wa Mat 10:24; Luk 6:40; Jan 15:20 ni wè. 17Pa yé ma ki woʔo ga cɛn kɔ ge, nà ye daʔa hanri ban kpo ge, pa ye bo frɛmɛ ní.»

18Ho naʔa nyu yè bɛfu kala na. Mi dá bee fara ge, mí ma pe cɛn. Di kí ma yala ki fùnŋù ga kí nyɛ wa nyoŋoʔo Nyɛʔɛlɛ li sɛbɛ ni we mâ yo: Ŋa wí na na hro li de wí ma wa mà krɛʔɛ mà can ná ni.#13:18 ma wèle wa Ŋuʔu 41:10 ni wè.

19Ga kí gà ba hanri kruʔu ma ni we, kiì gi mí na nyu ye kan ŋaŋa ni ge, jango, nàʔa gá ba hanri ge, ye paʔá na yeʔe cɛn, ye yo mí nyɛ ŋa mì mí nyɛ ge. 20Mí biʔi yo ye ma kanyɛmɛ na, ŋa mí ma tun, nà hɛn ŋa buú co kmaʔa ge, paʔa bo wí ma domi co kmaʔa kpo. Hɛn ŋa wí bi domi co we kmaʔa ge, paʔa bo wí ma ŋa co kmaʔa wí ma na tun ge.#13:20 ma wèle wa Mat 10:40; Mar 9:37; Luk 9:48; 10:16 ni wè.

Jesu wi yo Judasi wí bi bɔɔ pɛ̀rɛ

(Mat 26:20-25; Mar 14:17-21; Luk 22:21-23)

21Nyiŋi ga na, Jesu wi gâ ki woʔo ga yo ge, wi lama à mi wlele wí na. Wɔ̀ɔ ki kayoʔo ga yo ge mà yo: «Mí biʔi yo ye ma kanyɛmɛ na, wà nyɛ naʔa ye ni ŋa wí bi yà ná le wa na bɛnfɛɛ pe kyɛrɛ̀ ni de.» 22Ploʔofɛɛ à pe na pe wele, mɛjɛn wí na ŋa pin ge, pe ìn dɔ̀ɔ cɛn. 23Jesu wi ploʔofɔlɔ wà dà glɛn wa wì tanla. Ki woo wi dáa Jesu glanʔa we ceŋge. 24Simo Pyɛri wɔ̀ɔ wi nɛlɛ yrigi mà li wa ki woo ma we mòo po: Ma Jesu yugu wí na hɛn ŋa pin ge. 25Wɔ̀ɔ flo wa Jesu tanla we mà yo: «Na fɔlɔ, má na han pin?» 26Jesu wɔ̀ɔ wí po: «Nà mi bru kon buu niʔi buu kan ŋa ma ge paʔa bo wii wi.» Ki nyiŋi na, wɔ̀ɔ taʔa mòo niʔi mòo kan Simo pyɔ Judasi Isikariyɔte ma we. 27Judasi wi gâ brukonʔo syɔ ge kɔ, Sotanri wɔ̀ɔ je wí ni. Jesu wɔ̀ɔ wí po: «Ga má bi hanri ge, maʔa hanri ticaʔaga.»

28Di bee pe da blɛ́n ná li wí ni ge wɛ̀ ìn ki cɛn ga kí ma kan, wɔ́ɔ ki woʔo ga yo wi kân ge. 29À pèè naʔa honri mà yo Judasi pɔɔ gâ bo gbejanra alege cofɔlɔ ge. Kiì kɔsɔ na, Jesu wí yo wi ya yrɛbɛ pà syɔ ba pé ma cori srɛʔɛ fɛti wlɛʔɛ na ge, ná kiì ban, paʔa bo wí yo wi ya yraʔa kà kan fyomofɛɛ ma be. 30Judasi wi gâ brukonʔo syɔ kɔ ge, wɔ̀ɔ nyini kpo. Yebliʔi ki dá bo kí ma kmo kɔ.

Furu kayofonŋo

31Nyiŋi gâ na Judasi wi da gâ nyini kɔ ge, Jesu wɔ̀ɔ yo: «Ŋaŋa ni ge, hɛɛn pé bi Hɛn Pyɔ wi kmara nya de. Pa pe Nyɛʔɛlɛ li kmara nya de kpo wi fanŋa ni ge. 32Hɛɛn pa pe gâ Nyɛʔɛlɛ li kmara nya Hɛn Pyɔ wi fanŋa ni ge, Nyɛʔɛlɛ fanna pa li Hɛn Pyɔ wi kmara tyɛʔɛ de hɛɛn na be li fanŋa ni ge. Lí biʔi hanri ŋaŋa ni ge. 33Na pii, mí nyɛ naʔa ye nì nyiŋi cɛnri na nɛ. Ki kruʔu ma, yé bi baa na ca bì de. Ga mi dá yo Juwifiyee ma be mí biʔi yo ye ma kpo bì yo: Deʔe ga na mí na sye ge, yòo gban bì gɛri wa. 34Mí bi furu kayofonŋo yo ye kan. Kí ga: Ye da yè glanʔa. Ye da yè glanʔa nɛ pa yé na na glanʔa pomo ma na ge.#13:34 ma wèle wa Jan 15:12,17; 3:23; 2Jan 5 ni wè. 35Nà ye da yè glanʔa ge, hɛɛn pè bɛfu pé biʔi cɛn bì yo yé nyɛ na ploʔofɛɛ.»

Jesu wí yo Pyɛri wí bi bɔɔ ce

(Mat 26:31-35; Mar 14:27-31; Luk 22:31-34)

36Simo Pyɛri wɔ̀ɔ wí po: «Na fɔlɔ, má na sye hanbe si?» Jesu wɔ̀ɔ wí po: «Mí na sye deʔe ga na mòo gban bì gɛri wa na ní ŋaŋa ni ge. Di kruʔu ma ni we, má bi gà ba gɛri wa.» 37Pyɛri wɔ̀ɔ wí po: «Nyaʔa kɔsɔ na mi ìn bi gban bì gɛri wa ma ní ŋaŋa ni ge? Mí ma kondo mà yaʔa bì gu ma kala na le.» 38Jesu wɔ̀ɔ wí po: «Mo ma kù domi na kala na le yo? Mí biʔi yo má ma kanyɛmɛ na, sanni gopɔlɔ wí bi gbele ge, pa maʔa yo yohara tanri bì yo mɛ ìn na cɛn.»

Currently Selected:

JAN 13: NLK10

Highlight

Copy