JAN 16

1Mí na ki kaʔa nyu ge ye kan jango yò ga laʔa pama na me. 2Pé bi baa ye prɔ bì da ye yrigi wa Juwifiyee pe sɛrigoro ni de. Ali paʔa ba bo nyiŋi kà na, nà hɛn wà bí yèé wà kpo ge, ki woo pɔɔ daʔa honri bì yo wí ma tunŋu kà kɔ Nyɛʔɛlɛ kan le. 3Pé bi baa ki kaʔa hanri ge ye na, mɛjɛn pe ìn To cɛn we, pe ìn mì cɛn we kpo. 4aDi mí ma ki kaʔa yo ge ye kan, jango ke nyiŋi nàʔa gá ba no ge, ye honri ké na, yeʔe cɛn ye yo mi da ké yo ye kan kɔ.

Nyɛʔɛlɛ li Nyìli li tunŋu kɔmo

4bMi ìn dà glu bì ke yo ye kan ki hlinyiŋi na, mɛjɛn mi dá bo naʔa ye nì. 5Di ŋaŋa ni, mí bi gɛri ŋa krugu wi da ná tun ge. Yèé wà nigbe ìn jâ na yugu bì yo: ‹Má na sye hanbe?› 6Di yé nyɛ yɛpɛnʔɛ ní ceŋge ga na mí ma ki kaʔa yo ge ye kan ge. 7Mí bi kayocɛnŋɛ yo ye kan. Nà mi kɛri ge, pa kiì bí bo pronʔo ye kan. Mɛjɛn, nà mi ìn gɛri, haʔafɔlɔ wòo ban yè krugu. Di, nà mi kɛri ge, pa mi yɔ̀ɔ troʔo naʔa ye ma. 8Nòo gá ban nyiŋi ga na ge, pɔɔ baʔa tyɛʔɛ hɛɛn na be, peʔe cɛn pe yo pé ma punŋu kapeʔe nì, sinmi ní, ní kiti kala namyɛlɛ na le. 9Pé ma punŋu kapeʔe namyɛlɛ na, mɛjɛn pe ìn ba ná na. 10Pé ma punŋu sinmi namyɛlɛ na, mɛjɛn mí na sye na To krugu we. Ye ìn bi gàá na nyaʔa adi. 11Pé ma punŋu kiti namyɛlɛ na, mɛjɛn kiti wí ma kon kɔ ki drunya wi kundiʔi na we.

12Kaʔa fafaʔagaa nyɛ ná ma bì ke yo ye kan, di yòo gban bì ke cɛn ŋaŋa ni ge. 13Di Nyɛʔɛlɛ li Nyìli la lí na Nyɛʔɛlɛ li kanyɛmɛ teri hɛɛn na be, nà li gá ban nyiŋi ga na ge, pa li baa ye sinni jango ye kanyɛmɛ mì bɛfu cɛn. Li ìn bi baa li kayotara tiì nyu, di, nà li gá baa ga nuru ge, pa li da kiì nyu ali kaʔa gee ké gà baa hanri kruʔu ma ni we, lí bi baa ke nyu bì da ke fligi ye kan. 14Nyɛʔɛlɛ li Nyìli lí bi baa na kpɔʔɔ, mɛjɛn ga lí bi baa daʔa mì ma we, lí bi baa kiì nyu ye kan. 15Ga kí nyɛ na To ma we kì bɛfu kí nyɛ ná ma. Kiì ma kan á miʔi yo mâ yo: Lí na ga taʔa mì ma we, lí bi baa kiì nyu ye kan ge.

Yɛpɛnʔɛ kí bi ba grɛʔɛ lafiʔimi

16Ki kó cɛnri ye ìn bi gà ná nya adi. Nà nyiŋi kà cɛnri bi doro nɛ ge, pa ye ba na nya.» 17Ki nyiŋi na ge, wi ploʔofɛɛ à pèè naʔa nyu pe ma mà yo: «Ki kɔ̀rɔ́ wí nyɛ nyaʔa ní, ga wí ma yo mâ yo: ‹Ki kó cɛnri ye ìn bi gà ná nya ge. Nà nyiŋi kà cɛnri bi doro nɛ ge, pa ye ba na nya.› Wɔ̀ɔ ní màʔa yo nɛ mà yo: ‹Mɛjɛn mí bi gɛri na To krugu we.› 18‹Nyiŋi cɛnri wi kɔ̀rɔ́› wí nyɛ nyaʔa ní? Wo ìn ki kɔ̀rɔ́ cɛn wi ma.» 19Jesu wɔ̀ɔ ki cɛn mà yo pé naʔa ca bùu yugu. Wɔ̀ɔ pé po: «Ga mí ma yo mâ yo: ‹Ki kó cɛnri ye ìn bi gà ná nya. Nà nyiŋi kà cɛnri bi doro nɛ ge, pa ye ba na nya,› yé na yè yugu kiì kala na yo? 20Mí naʔa nyu ye ma kanyɛmɛ na, yé bi baa gbele bì da yoolo, di drunya hɛɛn pa pe bo lafiʔimi nì. Yé bi ba bo yɛpɛnʔɛ ní, di ki yɛpɛnʔɛ paʔa ba grɛʔɛ lafiʔimi. 21Acɛnlɛ fɔlɔ wi lara nà ti dɔɔ ya nyiŋi ga na ge, wi na po yɛpɛnʔɛ ní, mɛjɛn wi henyiŋi kí ma tyɛʔɛ. Di nòo gá pyɔ he we kɔ ge, wi na lama wɔ wi cɔlɔʔɔ ní ge, mɛjɛn wí ma hɛnfonŋo ta naʔa drunya ni we. 22Kí nyɛ ban kpo yèé ma be, mɛjɛn yé nyɛ yɛpɛnʔɛ ní ŋaŋa ni ge. Di mí bi ba ye nya nɛ. Ki nyiŋi na, yè lama pa mi fiʔi. Hɛn wà wóo gban bì ki lafiʔimi syɔ me ye ma.

23Ki wlɛʔɛ nàʔa gá ba no ge, yòo ba na yugu yraʔa kà nì adi. Mɛjɛn mí biʔi yo ye ma kanyɛmɛ na, nà ye yraʔa o yraʔa ga nyɛri To ma we na yele na le, pɔɔ ki kân ye ma.

24Mà jâ gbe wa fɔ mà bâ no alaʔa na, ye ìn je yraʔa kà nyɛri na yele na le kpɛn. Ye da nyɛri, pa ye da, jango yè lafiʔimi mi fùnŋù.

Jesu wí ma drunya ja we

25Mí ma ki kaʔa gee yo ge ye ma yomɛʔɛ ni. Nyiŋi kà na pan wa, nàʔa gá ba no ge, kayoro da mí bi baa nyu ye kan, tòo bo yomɛʔɛlɛ adi. Di mí bi baa To wi kayoʔo nyu bì daʔa fligi ye kan. 26Ki wlɛʔɛ na ge, pa ye da nyɛri na yele na le. Di mi ìn biʔi yo ye kan bì yo mí bi da To nyɛri we ye kan. 27Mɛjɛn na To wiì tapolo we, yé moo glan, ga na mí na ye glanʔa á ye ní mâ paʔa na máʔà cɛn mâ yo mí ma jɛ wa Nyɛʔɛlɛ liì ma ge. 28Ee, mi dá jɛ wa na To wiì ma mà pan naʔa drunya ni we. Ŋaŋa ni ge, mí bi nyini naʔa nɛ drunya ni we bì hru bì gɛri nɛ na To krugu we.»

29Wi ploʔofɛɛ à poo po: «Wele, má ma ki kayoro da yo de mâ ti fligi ki tɔ na ge. Mɛ ìn ti yo yomɛlɛ ni adi. 30Ŋaŋa ni ge, wó maʔa cɛn mà yo má ma kaʔa kè bɛfu cɛn. Ki ìn yala hɛn wà bi ma yugu kala là nì adi. Ki kala na, wó ma paʔa na mà yo má jɛ wa Nyɛʔɛlɛ liì ma.» 31Jesu wɔ̀ɔ pé po: «Ye ná mà paʔa na ŋaŋa wiì ni yo? 32Ye welé, nyiŋi kà na pan wa, kí ma jâ no kɔ. Ki nyiŋi na ge, yè bɛfu nigbe nigbe pa ye ba jraʔa bì gɛri yè kasyɛnrɛ ma de bì na yaʔa nà yɛ nigbe. Di ho nyɛ nà yɛ nigbe, mɛjɛn na To wí nyɛ ná ni. 33Mí ma ki kaʔa yo ge ye kan, jango ye nyimi ta wa na nî. Yé bi jɔlɔ naʔa drunya ni we. Di ye dihon ta, mɛjɛn mí ma drunya ja we.»

Currently Selected:

JAN 16: NLK10

Highlight

Copy