Sélimɛ 39

Zyozɛfu i nyɛ Ezyipiti ye nǎnw Potifari tɛ́ɛgi ni

1 # Sél 37:28; Ŋún 105:17 A be kári ní Zyozɛfu ní Ezyipiti ma. Ezyipiti ye nǎnw wi lè Potifari, Faraɔnw syɛɛnkpɔɔwaa, wi pye lè gáridibèle kùndigi, a woro sáà wi syɔɔ Isimayɛli ye ma, poro bele be kári yaà ní wi ní lè. 2#Sél 39:21; Kap 7:9 Yawe maa pye ní Zyozɛfu ní, a wi kérigèle myɛ i nyɔɔgi. A wi pye wi kàfɔw kpaʔa ni, wi lè Ezyipiti ye nǎnw. 3A wi kàfɔw gi nyaa Yawe i nyɛ ní wi ní. Keele o keele wi kpéʔele lè, a Yawe i ke myɛ nyɔɔgi wi kɔ́gi ni. 4A Zyozɛfu kéeli kpɔ́ʔɔ wi kàfɔw ma, woro wee má wi báara lè. A wi wi télege woro kpáagi kèlē nyúngo na, níì woro kɔ́lɔ yáriri myɛ kàlifáa wi ma. 5Nlaa Ezyipiti ye nǎnw Potifari tɛ́nɛ̀ wi télege lè woro kpáagi kèlē ní woro kɔ́lɔ yáriri myɛ nyúngo na, a Yawe dùbaw taʔa wi kpáagi na Zyozɛfu kéeli na. A Yawe dùbaw pye wi kɔlɔ̀ yáriri myɛ na, gee bee n jo kpáagi wóro ní séyi wóro. 6A wi wi kɔlɔ̀ yáriri myɛ yaʔa Zyozɛfu kɔ́lɔ na. Wi da ní ni gi kàa faala kɔ̀rɔsíi í, fwɔɔ gee yagana woro a lìi lè.

Zyozɛfu ní wi Kàfɔw cɔ́ɔ kéele

Zyozɛfu si maa tɔ̀nɔ n nyɔɔ gbanʔama cere na. 7Kérigèle bee kàdoʔo ma, a wi kàfɔw cɔ́ɔ i wi wéle, ní kɔ́ɔ̀ wi pye: «Sínɛ ní mii ní.» 8A wi cée níì gi joo wi kàfɔw cɔ́ɔ ma níì wi pye: «Wéle, yáriree di naa lè kpáagi ni, mii kàfɔw o waari di tàa faala ni ní mii ní í, wi n ti myɛ kàlifáa mii ma. 9Wàa faala ga kpɔ́ʔɔ n sɔ̀lɔ mii na kpáagi naa ni í. Wi ga mii yérige yarigaa faala na í kapye mɔ nibin na ban í. Níì cán mɔ wi nyɛ wi céw. Mɛ̀ɛ́ si mii a gbǎn kapeegi naa félege kpéʔele bi kapeele pye nya Kolocɔlɔɔ na?»

10Wi maa ni nyuu kéeli bee na canʔa o canʔa ní Zyozɛfu ní. Kàjáa Zyozɛfu ga fɔ̀lɔ n wi syɛ́ɛnri lóʔo níì sínɛ wi taana bi pínɛ ní wi ní í.

11Cangaa a Zyozɛfu jée kpáagi ni bi wi fáliw kpéʔele. Kpáagi falipyewaa faala si da pye yaà í. 12Lǎli bee ni a céw wi cò wi búrogi na níì wi pye: «Sínɛ ní mii ní.» A Zyozɛfu wi búrogi wòlo n yaʔa wi ma kɔ́gi ni níì fàn n yiri kàfugi na. 13Lǎli ni wi gi nyaa lè a wi wi búrogi wòlo n yaʔa woro ma kɔ́gi ni níì fàn n yiri kàfugi na lè, 14a wi fala n wi kpáagi falipyebèlē yeri ní baa be pye: «Ye wéle, wi n pan ní Heburuwaa ní wi ba wolo kpéʔele yakɔnʔɔgéle. Wi n baa too mii na bi sínɛ ní mii ní, a mii si yákpoli wáa gbanʔama. 15Lǎli ni wi gi nyaa a mii i yákpoli wáa ǹjogi ni lè ní i fúlo, a wi wi búrogi yaʔa yaà mii taana kpáagi ni níì fàn n yiri kàfugi na.»

16A wi si Zyozɛfu búrogi tɛ́ʔɛ wiyɛɛ daana n taa a wi kàfɔw yìri yaà n lúru n pan kpaʔa ma. 17A wi baa syɛ́ɛnri naa wonijanra joo wi nǎnw ma níì wi pye: «Heburupulow bee ní mɔ pan lè, wi n baa jée mii kurugo bi mii kpéʔele yakɔnʔɔnɔ. 18A mii ga yákpoli wáa ǹjogi ni níì fúlo, a wi wi búrogi yaʔa mii taana kpáagi ni, níì fàn n yiri kàfugi na.»

19A wi kàfɔw ga wi céw syɛ́ɛnrɛ lóʔo, dee wi joo lè níì jo: «Wéle, gee bee si mɔ púlow kpéʔele mii na!» A wi fúngi tɔ̀nɔ n yìri gbanʔama. 20A wi be pye a be Zyozɛfu cò n sáà le kàsow ni, beè fànʔafɔw kàsolebéle da pye lè.

Zyozɛfu i nyɛ kàsow ni

A Zyozɛfu kòro yaà beè kàsow ni. 21A Yawe pye ní Zyozɛfu ní, níì kacànga kpéʔele wi na n gi yaʔa a wi kéeli kpɔ́ʔɔ kàsokpaagi kàfɔlɔ ma. 22A kàsokpaagi kàfɔlɔ kàsolebèle myɛ yaʔa Zyozɛfu kɔ́lɔ na. Yariga o yariga ga naà kpéʔele yaà fwɔɔ gi sɔ̀lɔ Zyozɛfu ma gbɛnʔɛnɛ. 23Yáriri myɛ kàsokpaagi kàfɔlɔ da yaʔa Zyozɛfu kɔ́lɔ na lè, wi da ní ni gi kàa faala saanri ni wéle í. Níì cán Yawe maa pye ní Zyozɛfu ní ni wi kakpéʔelegèle myɛ nyɔɔgi.

Currently Selected:

Sélimɛ 39: CB10

Highlight

Copy