Sélimɛ 40

1Kérigèle bee kpéʔelele kadoʔo ma, wee wi pye lè Ezyipiti fànʔafɔw yagbaʔa kaanna nyúngo na, ní wee wi pye lè wi búruw sámagala nyúngo na, a bele bee baa kapeele pye be kàfɔw na, wi lè Ezyipiti ye fànʔafɔw. 2A Faraɔnw fúngo tanʔa wi kpáagi falipyebèlē siin kurugo, gee bee n jo, wee wi pye lè wi yagbaagi sámagala nyúngo na, ní wee wi pye lè wi búruw sámagala nyúngo na. 3A wi be pye a pe be cò n le gáridibèle kùndigi kpaʔa kàso ni, kàsokpaagee ni Zyozɛfu pye lè wodɔɔn ní. 4A gáridibèle kùndigi be yaʔa Zyozɛfu kɔ́lɔ na waa be kɔ̀rɔsíi sáā be màkow nyɔɔgi. A be kòro yaà kàsow ni n làlaa kwɔ́ɔ.

Zyozɛfu n kàsolebèle siin ŋúnɔyɔ kɔ́rɔ joo

5Wee wi pye lè Ezyipiti fànʔafɔw yagbaʔa sámagala nyúngo na, ní wee wi pye lè wi búruw sámagala nyúngo na, poro bele pe da pye wodɔnbéle ní kàsow ni lè, a be myɛ siinw baa ŋúnɔ ní ŋúnɔyɔ ní yébilinijanga ni, yoro yee kɔ́rɔ wi da fàli lè. 6A ki ga pye nyǐngi nyɔ́ɔ na, a Zyozɛfu pan be ma n baa be wéle n gi nyaa a be yɛ́ɛyi tɔ̀nɔ n tanʔa. 7A wi be yíbe poro bele be pye Faraɔnw kpaʔa falipyebèlē lè ní i nyɛ ní woro ní kàsow ni woro kàfɔw kpaʔa ni lè, níì jo: «Nyàʔá gi yele yɛ́ɛyi tanʔa nya níjanʔa?» 8#Sél 41:15-16 A be wi pye: «Wolo n ŋúnɔ ní ŋúnɔyɔ ní bi gi taa syɔɔn faala o naa bi yi kɔ́rɔw joo wolo ma í.» A Zyozɛfu be yari: «Kolocɔlɔɔ má ban yi kɔ́rɔw joolo nyɛ ì? Koro na ye yi joo ye tɛ̀ɛn mii na.»

9Wee wi pye lè yagbaagi sámagala nyúngo na, a woro wi ŋúnɔgi joo n tɛ̀ɛn Zyozɛfu na níì jo: «Wéle, mii n ŋúnɔ n gi nyaa a ɛrɛzɛn tírige i nyɛ mii yɛ́ʔɛ ma. 10Kágangèlē taanri si maa pye ɛrɛzɛn tírigi bee na. A ki ga baa fùn níì fyɛ́ɛnrɛ kpéʔele, a gi kágangèle bee ɛrɛzɛnlɛɛɔ jɔnjɔnyɔ kpéʔele. 11A mii Faraɔnw yagbaala nyaa mii kɔ́gi ni, a mii ɛrɛzɛnw cɛnɛ níì wi nyìmini n le Faraɔnw yagbaala ni, ní sáà yagbaali le Faraɔnw kɔ́lɔ ni.» 12A Zyozɛfu wi yari: «Ki kɔ́rɔw wi nyɛ wee naa. Kágangèle taanri i nyɛ canya taanri. 13Canya taanri ga kwɔ́ɔ, Faraɔnw a ní mɔ nyúngi yìrige, si ní mɔ lége mɔ fáliw ni. Mɔ a ní ra wi yagbaali nii wi kɔ́gi ni bi yɛlɛ ní mɔ yagbaagi kaanna kundigire fáli kánlɛɛmɛ ní. 14Kàjáa lǎli ni mɔ ga sáà kacǎnni taa lè, mii i mɔ nyɛ́ɛri ki n yɛlɛ mi sɔ̀ngi mi taa mii na, mí kacànna kpéʔele mii na. Mii kéeli tɛ̀ɛn Faraɔnw na, mí mii yirige kpáagi naa ni. 15Níì cán fànʔa na pe mii cò n yirige Heburubèle tára ni, àlí mii ga caa wɔ́ɔ̀ kàso kalele kpéʔele nɛɛ naa í.»

16Wee wi pye lè búruw sámagala fáli nyúngo na, a woro ga gi nyaa a fànʔafɔw yagbaʔa fáli kùndigi ŋúnɔgɔ kɔ́rɔ joolo tɛ́nɛ, a wi gi joo Zyozɛfu ma níì jo: «Mii n wɔ́ɔ̀ ŋúnɔ ní ŋúnɔgaa ní n gi nyaa búrufiio sɛ̀ʔɛgēle taanri mii nyúngi ni. 17Faraɔnw búru-nidaanmaɔ si maa pye ǹjoʔo ma sɛ̀ʔɛli ni. N wi yaʔa mii nyúngi ni wodugoo ní sɛ̀ʔɛli ni, a féjɛɛnri i maa n ba ni wi jóori.» 18A Zyozɛfu wi yari: «Ki kɔ́rɔw wi nyɛ wee naa. Sɛ̀ʔɛgèle bee taanri i nyɛ canya taanri. 19Canya taanri ga kwɔ́ɔ, Faraɔnw a mɔ nyúngi ceri bi láʔa mɔ na, si mɔ cɔ̀rɔ tiige na. Féjɛɛnri a ra maa bi ba ra mɔ céri jóori.»

20Candaanri wógi bee si maa pye Faraɔnw canzeʔe yɛɛgbara fɛ́tii. A wi lìigbɔɔlɔ sámaga wi syɛɛnkpolobèle myɛ ma. Wee wi pye fànʔafɔw yagbaʔa sámagala nyúngo na lè, ní wee wi pye wi búruw sámagala nyúngo na lè, a wi be nyúnyi yìrige wi syɛɛnkpolobèle nínge ni. 21Wee wi pye wi yagbaagi fáli nyúngo na lè, a wi woro lúrugo n télege wi fáliw na, a woro i Faraɔnw yagbaala nii wi kɔ́gi ni. 22Wee si wi pye lè búruw sámagala nyúngo na, níì be pye a be woro cɔ̀rɔ tiige na n yɛlɛ ní gi ní àmɛɛ Zyozɛfu da gi kɔ́rɔw joo lè. 23Koro ní ki myɛ ní, wee wi pye fànʔafɔw yagbaʔa sámagala fáli nyúngo na lè, wee bee ga sɔ̀ngi n taa Zyozɛfu kéeli na í, a wi fɛ̀ʔɛ wi na.

Currently Selected:

Sélimɛ 40: CB10

Highlight

Copy