Sélimɛ 41

Faraɔnw ŋúnɔyɔ kéele

1A yɛ̀ʔɛlɛ siin ga kwɔ́ɔ, a Faraɔnw ŋúnɔ ní ŋúnɔgɔ ní. Wi maa wiyɛɛ nyaa woyéreo ní Niili cábigi nyɔ́ɔ na. 2A wi nìcáacànya kɔrɔsiin nyaa a yi yiri cábigi ni, yee yi pye lè ní sìnmɛ ní. A yi ba ni káa cábifogi ni. 3A wi níì nìcáayaa kɔrɔsiin nyaa a yi yiri cábigi ni. Yoro maa toʔoro níì waʔa. A yoro baa yére yee taana cábigi nyɔ́ɔ na. 4Nìcáayi yi da toʔoro lè níì waʔa, a yoro sǐnmi nìcànya kɔrɔsiin cò n káa. Lǎli bee ni a Faraɔnw yìri ŋúnɔmi na.

5A wi níì syɔɔ n ŋúnɔ ní níì ŋúnɔ ní ŋúnɔgaa ní n gi nyaa yaliikanya kɔrɔsiin, a yi yiri fíinge nibin na, yi maa nyìn pyaari na, níì tɔ̀nɔ n nyɔɔ. 6Koro kàdoʔo ma a wi yaliikanyaa kɔrɔsiin nyaa a yi yiri yee kurugo. Yoro maa pye pyaara fun. A canʔafolomɔ kabangi káfalaga yi waʔa. 7A yaliikan-waayi kɔrɔsiin yaliikanjǎnyi kɔrɔsiin jɔ́ɔ, yoro yee yi nyìn pyaari na lè. A Faraɔnw yìri ŋúnɔmi na n gi nyaa ŋúnɔgɔ gii.

8 # Dan 2:2 A nyǐngi ga sɔ̀li, a Faraɔnw fúngo tɔ̀nɔ n curugo. A wi be pye a be Ezyipiti cɛ́lɛfɔbèle myɛ ní Ezyipiti sícilibèle myɛ yeri. Ní baa wi ŋúnɔyi myɛ joo n tɛ̀ɛn be na. Kàjáa pe wàa faala ga gbàn n yi kɔ́rɔw joo wi ma í. 9Lǎli bee ni wee wi pye lè Faraɔnw yagbaʔa sámagala fáli nyúngo na, a woro gi joo Faraɔnw ma níì wi pye: «Mii a mii kolomi kèlē joo yirige níjanʔa. 10Cangaa mɔ Faraɔn fúngi maa baa tanʔa mɔ falipyebèle kurugo pe lè wolo, a mɔ be pye a be mii cò n sáà le kàsow ni, gáridibèle kùndigi kpaʔa ni n fàra wee na wi pye lè búruw sámagala nyúngo na. 11A wo myɛ siinw baa ŋúnɔ ní ŋúnɔyɔ ní yébilinijanga ni, yee kɔ́rɔ wi da fàli lè. 12Heburu-nìgɔcariwaa maa pye yaà ní wolo ní, gáridibèle kùndigi púlowaa. A wolo wolo ŋúnɔyi joo n tɛ̀ɛn wi na, a wi si wolo myɛ siinw ŋúnɔyɔ kɔ́rɔ joo wolo ma, n yɛlɛ ní wolo ŋúnɔyi kɔ́rɔ ní. 13A gi zǐn baa pye nya n yɛlɛ ní gi ní àmɛɛ wi da ŋúnɔyi kɔ́rɔ joo wolo ma lè. Pe n níì mii láa n télege mii falilɛɛw na, níì be pye a be wee cɔ̀rɔ tíigi na.»

Zyozɛfu n Faraɔnw ŋúnɔyɔ kɔ́rɔ joo

14A Faraɔnw tun be sa Zyozɛfu yeri, a be kári n sáà wi yirige kelekele kàsow ni. A Zyozɛfu wi yɛ́ɛgi kùnu níì wi búroyi fàli níì pan Faraɔnw tɛ́ʔɛ ma. 15A Faraɔnw baa gi joo Zyozɛfu ma níì wi pye: «Mii n ŋúnɔ ní ŋúnɔgɔ ní. Syɔɔn faala ga gbàn n gi kɔ́rɔw joo mii ma í. Mii si n lóʔo mɔ a gbǎn ŋúnɔgɔ kɔ́rɔ joo syɔɔn ma ní pe ga gi joo n tɛ̀ɛn mɔ na.» 16A Zyozɛfu Faraɔnw yari: «Mii ban í. Kolocɔlɔɔ wi a gbǎn syɛɛnlurugori kaan mɔ ma, Faraɔn, dee di nyɔɔ lè.»

17A Faraɔnw gi joo Zyozɛfu ma níì wi pye: «Mii n ŋúnɔ ní ŋúnɔgɔ ní n gi nyaa mii i nyɛ woyéreo ní Niili cábigi nyɔ́ɔ na, 18níì wéle n sìnmɛ nìcáacànya kɔrɔsiin nyaa a yi yiri n ba ni káa cábifogi ni. 19Koro kàdoʔo ma a mii nìcáayaa kɔrɔsiin nyaa a yi yiri yee kurugo. Yi maa waʔa níì toʔoro, ní i nyɛ wogɔʔɔrɔ-kɔʔɔrɔyɔ ní. Ezyipiti tári myɛ ni mii ga tɔ̀nɔ n kɔ́ɔ̀ yi toʔoro velege nyaa í. 20Nìkɔʔɔrɔ-kɔʔɔrɔyi yi toʔoro lè, a yoro sǐnmi nìye kɔrɔsiin káa. 21Yee káa-mí-jɔ́ɔlɔ kadoʔo ma, syɔɔn ga sèʔê yi nyaa wi a gi cán bi cán yi n yarigaa jɔ́ɔ í. Yi maa sèʔê kòro wodoʔoroyo ní yi kanlɛɛmi na. Lǎli bee ni a mii yìri ŋúnɔmi na. 22A mii níì syɔɔ n ŋúnɔ n gi nyaa yaliikanya kɔrɔsiin, yi maa nyìn pyaari na níì nyɔɔ. A yi pínɛ n yiri fíinge nibin na. 23Koro kàdoʔo ma a mii níì wéle n yaliikanyaa kɔrɔsiin nyaa a yi yiri yee kurugo. Yi maa fɔ́gɔ níì waʔa, yoro yee canʔafolomɔ kabangi káfalaga pábari lè. 24A yaliikan-waayi si yaliikanjǎnyi kɔrɔsiin jɔ́ɔ. A mii si gi joo n tɛ̀ɛn cɛ́lɛfɔbèle na, pe wàa faala si ga gbàn n gi kɔ́rɔw joo mii ma í.»

25A Zyozɛfu Faraɔnw yari: «Faraɔn, mɔ ŋúnɔyi kɔ́rɔ i nyɛ nibin. Gee Kolocɔlɔɔ a kpéʔele lè, koro wi tɛ̀ɛn mɔ na. 26Nìcáacǎnyi kɔrɔsiin ní yaliikanjǎnyi kɔrɔsiin i nyɛ yɛ̀ʔɛlɛ kɔrɔsiin. Ŋúnɔyi bee i nyɛ nibin. 27Nìwaayi kɔrɔsiin yi yiri lè yee kurugo ní i nyɛ wodoʔoro-kɔ́ʔɔrɔ-kɔʔɔrɔyɔ ní, yoro ní pyaara fun yaliikanyi canʔafolomɔ kabangi káfalaga pábari lè, yoro wɔ́ɔ i nyɛ yɛ̀ʔɛlɛ kɔrɔsiin, koro si a pye kateʔe yɛ́ɛgéle. 28Amɛɛ mii gi joo mɔ ma lè Faraɔn, ànbée gi nyɛ. Gee Kolocɔlɔɔ a kpéʔele lè, koro wi tɛ̀ɛn mɔ na, Faraɔn. 29Wéle, yaliiri a tɔ̀nɔ́ ba nyɔɔ yɛ̀ʔɛlɛ kɔrɔsiin fúngo ni, Ezyipiti tári myɛ ni. 30Koro kàdoʔo ma kateegi a too tári na bi yɛ̀ʔɛlɛ kɔrɔsiin kwɔ́ɔ. Syɛ́ɛnbèle a fɛ̀ʔɛ pe yaliinɛʔɛgi bee myɛ kéele na Ezyipiti tári ni. Kateegi a tɔ̀nɔ́ tári kálagi. 31Koro kàdoʔo ma àmɛɛ kateegi bee a ba gbàn bi sɔ̀lɔ lè koro a gi kaan be fɛ̀ʔɛ yaliinɛʔɛgi kéele na Ezyipiti tári ni, 32Amɛɛ si mɔ ŋúnɔgi bee ŋúnɔ n taʔala lè tɔlɔyɔ siin Faraɔn, koro n gi tɛ̀ɛn Kolocɔlɔɔ wi kéeli bee kɔ̀rirɔ n tímana, wi si a wɔ́ɔ li kpéʔele kelekele. 33Tɔ́ɔliw ni, Faraɔn, ki n yɛlɛ mɔ í nànwaa caa, wee wi nyɛ lè kacaɔn, níì cìlige, mi télege Ezyipiti tári nyúngo na. 34Ki n yɛlɛ Faraɔnw í koro kpéʔele, si wɔ́ɔ vàlaw kakarigabēle télege tári nyúngo na, poro í da nibin nibin láʔala yaliiri tílaya kagunɔ kagunɔbèlē na yaliinɛʔɛri yɛ̀ʔɛlɛ kɔrɔsiin fúngo ni. 35Pe yaliiri kpóʔoro yɛɛjangèle bee kɔrɔsiin fúngo ni ge maa lè, mɔ Faraɔn si gi yaʔa pe bilew kɔn bi yaʔa kěyi ni nyɛ̀ʔɛna yɛ́ʔɛ na. 36Yaliiri bee a kɔn bi yaʔa yaà kateegi yɛ̀ʔɛlɛ kɔrɔsiin yɛ́ʔɛ na ki maa ba too Ezyipiti tári na lè, koro ga pye kateegi a kɔ́ ba tári kálagi í.»

Faraɔnw n Zyozɛfu télege Ezyipiti tári nyúngo na

37A syɛ́ɛnri bee tɔ̀nɔ n Faraɔnw ní wi syɛɛnkpolobèle myɛ dɛ́nɛ. 38A Faraɔnw si be pye: «A wolo a gbǎn ní nànwaa taa lé Kolocɔlɔɔ Pǐli í pye wi ni àmɛɛ wee naa nyɛ lè?»

39A Faraɔnw gi joo Zyozɛfu ma níì wi pye: «Amɛɛ si Kolocɔlɔɔ gee bee myɛ tɛ̀ɛn mɔ na lè, syɔɔn faala ní o beè wee wi nyɛ lè kacaɔn, níì cìlige n mɔ kwɔ́ɔ í. 40#Kap 7:9,10; Dan 5:29 Mɔ wi a tɛ́ɛn mii kpáagi nyúngo na. Mii tári syɛ̀ɛnnɛ a ra lúro mɔ ma. Fàngoli yagana kéele li a mii kpɔ́ʔɔ mɔ na.» 41A Faraɔnw Zyozɛfu pye: «Wéle, mii n fǎngi kaan mɔ ma mɔ í pye Ezyipiti tári myɛ nyúngo na.»

42A Faraɔnw vèʔew wòlo wiyɛɛ kabeli na wi lè fǎngi wóo, n le Zyozɛfu kabeli na níì lɛn fànifɛɛlɛfɛɛlɛɔ búroyo le wi na, ní wɔ́ɔ̀ tɛɛ̀ nyɔ̀ʔɔmɔ le wi yátiigi ni. 43Níì wi télege woro wòtorowee ni wi taʔa woro wów na lè, pe si i yákpogèle wáa wi yɛʔɛ̀ ma ni gi nyuu níì jo: «Ye kólogi yaʔa!» Kánmi bee na Faraɔn Zyozɛfu télege Ezyipiti tári myɛ nyúngo na.

44A Faraɔnw níì gi joo Zyozɛfu ma níì jo: «Mii wi nyɛ Faraɔnw. Syɔɔn faala a tée kɔlɔ̀ yìrige wàlá bi nyɔ̌nnaa kɔ́n Ezyipiti tári ni mɔ nyɔ́ɔ fun í.» 45A Faraɔnw mɛ́ʔɛ le Zyozɛfu na ni wi yiri Safinati-Payeneya, níì Asinati kaan wi ma wi pye wi cɔɔ̀. Poti-Fera wi da pye lè Ɔn kěgi sáriga-wòloo, woro pyà wi pye Asinati. A Zyozɛfu yiri n sáà Ezyipiti tári myɛ nyaari. 46Lǎli ni wi kári n sáà yére Faraɔnw yɛ́ʔɛ ma lè, wi lè Ezyipiti ye fànʔafɔw, wi maa taa yɛ̀ʔɛlɛ toko ní kpɔrigɔ.

A Zyozɛfu núngo Faraɔnw taana n kári n sáà Ezyipiti tári myɛ nyaari n foro. 47A tári tɔ̀nɔ n yaliinɛʔɛrɛ kpéʔele fála-mí-taali yɛ̀ʔɛlɛ kɔrɔsiin fúngo ni. 48A Zyozɛfu yaliiri kpóʔoro kpóʔoro tiyɛɛ na n kɔn n màʔa kěyi ni, Ezyipiti tári ni, yɛ́ɛgèle bee kɔrɔsiin ni. Wi maa kàʔa o kàʔa ní gi taana séyi yaliire kpóʔoro gi ni. 49A Zyozɛfu tɔ̀nɔ n yaliiri kpóʔoro, a di nɛʔɛ n pye àmɛɛ sólomi lɔ̀ʔɔ nyɔ́ɔ táminyɔɔ nyɛ lè. A be di córoli yérige níì cán ti da níì pye bi gbǎn córo í ti nɛʔɛni báriga ni.

50Sáni kateegi yɛɛzelile í nan lè a Zyozɛfu nànbiigéle siin see. Ɔn kěgi sáriga-wòloo pe da ni yiri lè Poti-Fera, woro pìíw Asinati wi pìíbèle bee see Zyozɛfu ma. 51A Zyozɛfu pìiseliw mɛ́ʔɛ le ni wi yiri Manase#41:51 Manase: Mɛ́ɛgi naa kɔ́rɔ i nyɛ gee gi syɔɔn kaan wi fɛ̀ʔɛ lè.. Níì cán wi maa jo: «Kolocɔlɔɔ n gi yaʔa a mii fɛ̀ʔɛ mii fɔ̀rɔgi myɛ ní mii tóow kpaʔa wòolo myɛ na.» 52A wi siin wów mɛ́ʔɛ le ni wi yiri Efirayimi#41:52 Efirayimi: Mɛ́ɛgi naa kɔ́rɔ i nyɛ pìisiin wóo n kaan., ncan wi maa jo: «Kolocɔlɔɔ n mii kaan pìibēle na tári naa ni, dee ni mii da pye lè fóomi ni.»

53Yaliinɛʔɛri yɛ̀ʔɛlɛ kɔrɔsiin ge pye Ezyipiti tári ni lè, a gele bee baa kwɔ́ɔ, 54#Kap 7:11 á kateegi yɛ̀ʔɛlɛ kɔrɔsiin séli n yɛlɛ ní gi ní àmɛɛ Zyozɛfu da gi joo lè. Kateegi maa pye tátɛɛyee myɛ ni kàjáa yaliiri maa pye Ezyipiti tári tɛ́ɛyɛ myɛ ni. 55#Zyan 2:5 Lǎli ni kateegi wɔ́ɔ baa too Ezyipiti tári myɛ na lè, a syɛ́ɛnbèle i yákpogèle wáa Faraɔnw kurugo níì jo wi poro kaan yaliire na. A Faraɔnw gi joo Ezyipiti ye myɛw ma níì be pye: «Yaa syée Zyozɛfu ma. Gee faala wi ga sáà joo yele ma lè, ki n yɛlɛ ye gi kpéʔele.» 56A kateekpɔʔɔ tɔ̀nɔ n too tári myɛ na. A Zyozɛfu yaliiri tɛɛkɔnyɔ myɛ múgu, ní i bilew pára Ezyipiti ye ma. Kateegi maa tɔ̀nɔ ni gbàngí ni syée Ezyipiti tári ni. 57Syɛ́ɛnbèle maa ni yìrigí tátɛɛyi myɛ ma ni maa Ezyipiti ma Zyozɛfu ma n ba ni bilew syoo. Níì cán kateegi maa tɔ̀nɔ n gbàn tátɛɛyi myɛ ni.

Currently Selected:

Sélimɛ 41: CB10

Highlight

Copy