Sélimɛ 38

Zyuda ní Tamari kéeli

1Lǎli bee ni Zyuda núngo wi senyɛnbèle taana n kári Adulami ye nànwaa ma, pe i wi mɛ́ɛgi yiri Hira. 2A wi sáà pìcaawaa nyaa yaà beè, pe i wi tóow mɛ́ʔɛ yiri Syuwa. Kanaan ye wóo wi pye. A wi wi láa wi cɔɔ̀, níì pye ní wi ní. 3A wi yére fícɛnnɛ na, ní baa nànbile see, a wi li mɛ́ɛgi le n jo paa li yiri Ɛri. 4A wi níì yére fícɛnnaa na n nànbilaa see, níì loro mɛ́ɛgi le n jo paa li yiri Onan. 5A wi níì nànbilaa nikwɔɔ see níì loro mɛ́ɛgi le n jo paa li yiri Syela. Lǎli ni wi see lè Zyuda maa pye Kiziibi ma.

6A Zyuda cɔlɔɔ láa n kaan wi pìilɛɛw Ɛri ma, pe i wi mɛ́ɛgi yiri Tamari. 7Zyuda pìilɛɛw Ɛri si maa pye syɛɛnpeeo Yawe yɛ́ʔɛ ma, a Yawe wi kpóo. 8Lǎli bee ni a Zyuda gi joo wi pìíw Onan ma níì jo: «Sa pye ní mɔ yɛʔɛfɔw cɔ́ɔ ní, wi láa, gi kpéʔele gee mɔ yɛlɛ bi kpéʔele mɔ yɛʔɛfɔw kéele na lè, koro ga pye mɔ í yòdaʔaga yaʔa gi kòro beè mɔ yɛʔɛfɔw kàdoʔo ma.»

9Kàjáa Onan maa gi cán ncan yòdaʔagi bee a ra córo woro wóʔo í. A gi si pye wi ga pye ní wi yɛʔɛfɔw cɔ́ɔ ní lǎlee ni lè, wi n gi wo tári na, koro ga pye woro a kɔ́ yòdaʔaga kaan woro yɛʔɛfɔw ma í. 10Gee wi da ni kpéʔele lè, ki maa pee Yawe yɛ́ʔɛ ma, a Yawe wɔ́ɔ̀ woro kpóo. 11Lǎli bee ni a Zyuda gi joo wi pìíw cɔ́ɔ Tamari ma níì jo: «Ki n yɛlɛ mi sa kòro lɔgucaa mɔ tóow kpaʔa ma bi taa mii pìíw Syela í ba lɛɛ.» Níì cán wi maa jo: «Wee naa a wɔ́ɔ kɔ́ kùu àmɛɛ wi yɛʔɛfɔbèle kùu lè.» A Tamari kári n sáà kòro wi tóow kpaʔa ma.

12A canyaa saʔa ga kwɔ́ɔ, Zyuda céw wi da pye lè Syuwa pìíw, a wi kùu. Lǎli ni Zyuda fúngi baa tìgi lè a wi kári Timina ma bele kurugo pe da pye ni wi yaweeyiligèle síire cɛnɛ yaà lè. Woro ní wi tàannyɛnw Hira wi pye lè Adulami ye wów, poro pe da pínɛ n kári. 13A ki baa joo Tamari ma níì jo: «Mɔ nanw tóo wi lúru wee Timina ma sa wi yaweeyiligèle síire cɛnɛ,» 14lǎli bee ni a Tamari fala n wi lɔgu-búroyi wòlo, níì nyùndɔn-fàniwaa tɛ́ʔɛ n wi nyǔngi tɔ́n, woro wee wi tɛ́ʔɛ n wiyɛɛ mígi lè níì kári n sáà tɛ́ɛn Enayimi kpàánweeli na Timina kólogi nyɔ́ɔ na. Níì cán wi maa gi cán ncan Syela n lɛɛ n nan cɔlɔɔ láama na, pe si ga woro kaan wi ma í. 15A Zyuda wi nyaa, ní i wi córo nànjaacewaa, níì cán wi maa wi yɛ́ɛgi tɔ́n. 16A wi sɛ̀ʔɛrɛ wi ma kólogi nyɔ́ɔ na ní sáà wi pye: «Ki yaʔa mii í pye ní mɔ ní.» Wi da gi cán ncan woro pìíw cɔ́ɔ wii í. A céw wi yari: «Nyàʔá mɔ a kaan mii ma koro ga pye mɔ si pye ní mii ní?» 17A wi céw yari: «Mii a sa kapiige cò mii yaweeyiligèle ni bi tórigo naa mɔ ma.» A céw jo: «Yarigaa si mɔ a kaan bi yaʔa naa sáni mɔ í gi tórigo naa lè.» 18A Zyuda céw yari: «Nyàʔá si mɔ caa mii í kaan bi yaʔa naa?» A céw jo: «Mɔ mɛ́ɛgi fɛ̀ɛ yáriga, ní gi mɛ́ɛnni, n fàra kàgbeeli na li nyɛ mɔ kɔ́gi ni lè.»

A Zyuda yáriri bee yaʔa wi ma níì pye ní wi ní. A céw yére fícɛnnɛ na, wi wolò. 19A céw yìri n kári wi tɛʔɛ̀ ma ní sáà nyùndɔn-fàniw láʔa wiyɛɛ na níì wi lɔgu-búroyi láa n le. 20A Zyuda baa kapiigi kaan Adulami ye nǎnw ma, wi pye lè woro tàannyɛnw, a wi kári, koro ga pye wi sa woro yáriri syɔɔ céw ma, dee woro da kaan n yaʔa yaà lè. Kàjáa wi ga sáà wi nyaa í. 21A wi tɛ́ɛgi bee syɛ̀ɛnnɛ yíbe níì jo: «Nànjaacew wi pye naa Enayimi ni lè wodɛ́ɛɔn ní kólogi nyɔ́ɔ na, sán wi nyɛ?» A bele bee jo: «Nànjaacɔɔ̀ ga kɔ́ɔ̀ pye nɛɛ naa nyáana í.»

22A wi lúru n kári Zyuda ma n sáà wi pye: «Mii ga sáà wi nyaa í, àlí tɛ́ɛgi bee syɛ̀ɛnnɛ n caà gi joo níì jo: ‹Nànjaacɔɔ̀ o nyɛ nɛɛ naa í.› »

23A Zyuda jo: «Wi kòro yaà ní yáriri bee ní dee di yaà wi ma lè, wolo a kɔ́ faʔara wáa woyɛɛ na í. Gee gi cán lè, mii n kapiigi naa tórigo wi ma, kàjáa mɔ ga sáà wi nyaa í.»

24A yeye taanri félege ga kwɔ́ɔ a pe baa gi joo Zyuda ma níì jo: «Mɔ piiw cɔ́ɔ Tamari n nànjaara kpéʔele, àlí wi n caà fícɛnnɛ taa nànjaari bee fúngo ni.» Lǎli bee ni a Zyuda jo: «Ye wi yirige pe wi sórigo.»

25Lǎli ni be yirigi ní wi ní lè, a wi tundunro tun wi nǎnw tóo ma n gi joo wi ma níì jo: «Nǎnwee má mii fícɛnni taa lè, woro wóro di nyɛ yáriri naa. Mii i mɔ nyɛ́ɛri, ki n yɛlɛ mi mɛ́ɛgi naa fɛ̀ɛ yáriga, ní mɛ́ɛngèle naa, ní kàgbeeli naa wéle bi gi cán wee wóro di lè.» 26A Zyuda di wéle n cán níì jo: «Woro wi sín n sɔ̀lɔ mii na. Níì cán mii ga wi kaan mii pìíw Syela ma í.» Zyuda ga níì pye ní wi ní í.

27Lǎli ni wi làrizeeli baa nan lè, a be gi cán ncan ŋǎnbéle be nyɛ wi fícɛnni ni. 28#1Cán 2:4 Lǎli ni fícɛnni baa wi yìrige lè, a pìiwaa nibin kɔgaa yirige, a fícaricow mɛɛnnyɛɛnnɛ pwɔɔ gi na níì jo: «Wee naa wi yiri wozeliw.» 29Kàjáa a pìíw níì wi kɔ́gi lúrugo n lége, á wi ŋǎnnyɛnw sélì yiri. A fícaricow fala n yákpoli wáa níì jo: «Mɔ si n weʔe fùru n kaan miyɛɛ ma!» A be i wi yiri Perɛsi#38:29 Perɛsi: Mɛ́ɛgi naa kɔ́rɔ i nyɛ weʔe fùru.. 30A wi ŋǎnnyɛnw náà yiri ní mɛɛnnyɛɛnni ní kɔ́gi na, a be woro mɛ́ɛgi le ni wi yiri Zera#38:30 Zera: Mɛ́ɛgi naa kɔ́rɔ i nyɛ darigala wàlá nyɛ́nɛgɛmɛ..

Currently Selected:

Sélimɛ 38: CB10

Highlight

Copy