Sélimɛ 37

ZYOZƐFU KEELI

Zyozɛfu ŋúnɔyi kéele

1A Zyakɔbi tɛ́ɛn Kanaan tári ni, beè wi tóow da pye lè wodɛ́ɛɔn ní. 2Zyakɔbi jáabèle kèlē ge nyɛ gele naa: Lǎli ni Zyozɛfu taa lè yɛ̀ʔɛlɛ kɛɛ ní kɔrɔsiin, wi ní wi yɛʔɛfɔbèle maa pínɛ ni yaweeyiligèle nàʔá. N wi yaʔa nìgɔcaripile wi maa pye ní Biiliha pìíbèle, ní Zilipa pìíbèle ní, Biiliha ní Zilipa be pye lè wi tóow cébèle pèle. A Zyozɛfu ba ni wi yɛʔɛfɔbèle nàʔabeemɛ kéele nyuu be tóow ma. 3Zyozɛfu kéeli maa Isirayɛli dɛ́nɛ n sɔ̀lɔ wi jáabèle bele wozanbèlē myɛ wólo na. Níì cán wi maa wi see wi lɛɛgwɔɔri làla ni. A wi kɔyɔ búrodɔnɔgɔ jɔli n kaan wi ma. 4A wi yɛʔɛfɔbèle gi nyaa ncan wi kéeli n poro tóow dɛ́nɛ n sɔ̀lɔ poro myɛ wóli na, a be fala n wi para. Pe da níì gbàn ni nyuu ní wi ní ní tàmaga ní í.

5A Zyozɛfu baa ŋúnɔ ní ŋúnɔgɔ ní, a wi gi joo n tɛ̀ɛn wi yɛʔɛfɔbèle na. A koro níì kàa fàra be ma wi paragi na. 6Wi maa be pye: «Ŋúnɔgee ní mii ŋúnɔ lè, ki n yɛlɛ ye gi lóʔo. 7Wo maa pínɛ n pye ségi ni ni yaliire pwoo pwɔ̀ɔgēle. Wéle, a mii mii yaliipwɔɔli nyaa a li yìri n yére, á yele wógèle pan n baa li màʔa níì tìgi n too li taana.» 8A wi yɛʔɛfɔbèle wi pye: «A mɔ si i gi sɔ̀ngi lé mɔ a ba tɛ́ɛn wolo nyúngi na bi pye wolo fànʔafɔlɔ, wàlá bi pye wolo kàfɔlɔ?» A be níì wi para n sɔ̀lɔ tɔzeligi na wi ŋúnɔgi ní wi syɛ́ɛnri kéele na.

9A wi níì ŋúnɔ ní ŋúnɔgaa ní, a wi gi joo n tɛ̀ɛn wi yɛʔɛfɔbèle na níì be pye: «Mii n níì ŋúnɔ ní ŋúnɔgaa ní n gi nyaa a cángi, ní yégi, ní ŋɔripiigèlē kɛɛ ní nibin baa tìgi n too mii yɛ́ʔɛ ma.» 10Wi maa ŋúnɔgi joo wi tóow ní wi yɛʔɛfɔbèle ma. A wi tóow si fúlo wi na níì wi pye: «Ŋúnɔgi bee ní mɔ ŋúnɔ lè nyàʔá gi nyɛ gi kɔ́rɔw? Mɔ i gi sɔ̀ngí lé n jo mii, ní mɔ nɔ́ɔw, ní mɔ yɛʔɛfɔbèle a ba tìgí kpùmɔnɔ tári na mɔ yɛ́ʔɛ ma?» 11#Kap 7:9 A wi nyabɛɛnni pye wi yɛʔɛfɔbèle na, kàjáa wi tóow maa kòro ni sɔ̀ngí ni taagi ŋúnɔyi bee kèlē na làla o làla.

Zyozɛfu yɛʔɛfɔbèle n wi pára

12Zyozɛfu yɛʔɛfɔbèle si maa baa kári Sisyɛmi ma sa ra be tóow yaweeyiligēle nàʔá yaà beè. 13A Isirayɛli kɔ́ɔ̀ gi joo Zyozɛfu ma níì wi pye: «Mɔ yɛʔɛfɔbèle o yaà bele ni yaweeri nàʔá Sisyɛmi ma ì? Da maa, mii i caa bi mɔ tun be ma.» A Zyozɛfu baa wi pye: «Mii wi wee.» 14A Isirayɛli wi pye: «Da syée mi sa mɔ yɛʔɛfɔbèle wéle, kapye pe n cólogo yaà, á yaweeyiligèle wɔ́ɔ̀ cólogo, mi ba koro joo mii ma.»

Kánmi bee na wi wi yìrige Heburɔn jǐnlɔgi ni n tórigo. A Zyozɛfu kári Sisyɛmi ma. 15A nànwaa Zyozɛfu fàra n nyaa wi i curugu ni máari sìnbirigi ni. A nǎnw bee wi yíbe níì jo: «Nyàʔá mɔ caa?» 16A Zyozɛfu wi yari: «Mii yɛʔɛfɔbèle mii caa. Mii i mɔ nyɛ́ɛri, pe yaweenaʔa-tɛ́ɛgi tɛ̀ɛn mii na.» 17A nǎnw bee wi yari: «Pe n núngo nɛɛ naa n kári. Mii si maa gi lóʔo be ma a be jo: ‹Ye boo kári Dotan ma.› »

A Zyozɛfu i syée wi yɛʔɛfɔbèle túlugo ni n wɔ́ɔ sáà be nyaa Dotan ma. 18A pe ga wi wéle n nyaa yaà léelige sáni wi nùuni be na lè a be nyɔɔ kúun wi na bi wi kpóo. 19Pe maa gi joo peyɛɛ ma níì jo: «Ŋúnɔyi fɔ́lɔ wi maa yaà wee. 20Yaa maa tɔ́ɔliw ni wo ba wi kpóo wo wáa weegaa ni, wó sa gi joo wó jo yacobeegaa ki baa wi cò n káa. Kánmee na wi ŋúnɔyi a pye lè, wó gee bee kàdoʔo wéle.»

21 # Sél 42:22 A Wurubɛn ga syɛ́ɛnri bee lóʔo, a wi wi syɔɔ be ma níì jo: «Ki ga yɛlɛ wolo í wi kpóo í.» 22A Wurubɛn níì be pye: «Yele a kɔ́ sìsyaan wo í. Ye wi cáan kɔ̀lɔ́ wéegi naa ni nɛɛ naa fìími tára ni. Yele wàa kɔ́lɔ ga yɛlɛ bi nan wi na í.» Wi maa toro joo jàngó woro í gbǎn wi taa syɔɔ be ma bi lúrugo tórigo wi tóow ma.

23Lǎli ni Zyozɛfu baa nan wi yɛʔɛfɔbèle na lè, a be wi cò níì wi burodɔnɔgi wòlo wi na, kɔyɔ búrodɔnɔgi ki da pye wi na lè, 24níì wi cáan wéegi ni. Wéegi bee si maa pye wowaʔa ní, lɔ̀ʔɔ da pye gi ni í. 25Koro kàdoʔo ma a be tɛ́ɛn bi lìi. Ní kɔ́ɔ̀ be yɛ́ɛyi yìrige n wéle n Isimayɛli ye jàgiwáabéle kabiga nyaa gee ki da yìri Galaadi tári ma ni maa lè. Ezyipiti má pe da ni sɔ̀lɔ́ ni syée. Pe maa nùndaanna yárira tugo pe falibaayi na ni syée, ti lè aromati, ní céyaa-sǐnmi, ní míiri. 26A Zyuda gi joo wi senyɛnbèle ma níì jo: «Wolo ga wolo cɔnɔw kpóo níì wi kpóoli kéele làriga, tɔ̀nɔwìí félege wolo a taa gee bee ni? 27Ye tíi wo wi pára Isimayɛli ye ma. Wolo a kɔ́ kɔlɔ̀ taʔa wi na í, níì cán wolo senyɛnnɛ wii. Wi ní wolo i nyɛ cenijanra.» A Zyuda senyɛnzanbèle wi syɛ́ɛnri lóʔo.

28 # Ŋún 105:17 A Madyan ye jàgiwáabèle ga ba ni sɔ̀lɔ́, a Zyozɛfu yɛʔɛfɔbèle si Zyozɛfu kíle n yirige wéegi ni n pára Isimayɛli ye ma, wálifiio toko na. A poro kári ní Zyozɛfu ní Ezyipiti ma. 29Lǎli ni Wurubɛn lúru n pan wéegi ma lè, koro n gi taa Zyozɛfu da níì pye yaà gi ni í, a wi wiyɛɛ búroyi sulugu. 30Wi lúru n pan wi senyɛnbèle ma lè a wi baa be pye: «Pìíw ní o naa í. Sán si mii a jée?»

31A be Zyozɛfu búrodɔnɔgi láa níì sikepɔwaa kɔni níì gi cáan n yoro sìsyaanw ni. 32Koro kàdoʔo ma a be kɔyɔ búrodɔnɔgi tórigo be tóow ma níì jo: «Wolo n gee naa nyaa. Ki sámaga mi wéle kapye mɔ piiw búrodɔnɔgɔ gii, wàlá koro ban í.» 33A Zyakɔbi gi wéle n cán níì jo: «Mii jáaw búrodɔnɔgɔ gii! Yacobeegaa gi wi cò n káa! Pe n Zyozɛfu cò n sulugu sulugu.»

34Lǎli bee ni a Zyakɔbi wi búroyi sulugu níì gɔ̀nvaʔaga tɛ́ʔɛ n wiyɛɛ bwɔɔ sárigèle ni ní i wi jáaw kùugo nyɛnigɛ kpéʔele n canya saʔa kwɔ́ɔ. 35Wi pìíbèle myɛ be lè nǎnbèle ní cébèle, a poro yìri n jo poro a wi kpɛʔɛlɛ. Kàjáa a wi kpɛʔɛlɛli myɛ cée. Wi maa jo: «Mii a pye kùu káyaʔa na fwɔɔ bi taa sa jée mii pìíw kurugo kúbèle tɛɛkòrogo ni.» A wi kòro ni nyaan wi pìíw kéele na.

36A Madyan ye sáà Zyozɛfu pára Ezyipiti tári ni Faraɔnw syɛɛnkpɔɔwaa ma pe yiri lè Potifari wi pye lè Faraɔnw gáridibéle kundigi.

Currently Selected:

Sélimɛ 37: CB10

Highlight

Copy