Yirile 10

Wɔʔɔkɔrɔtaanri wógi: Kúdow kéele

1A Yawe gi joo Mowizi ma níì wi pye: «Da syée Faraɔnw ma, níì cán mii wi wi fúngi, ní wi falipyebèle fúnyo gbàn, koro ga pye bi mii fɛ̀ɛ́bèle kpéʔele pe níngi ni, 2jàngó mɔ í gbǎn kɔ́ ba ra gi nyuu da tèé mɔ piibèle, ní mɔ piibèle pìibēle na pe gi cán gee mii kpéʔele Ezyipiti ye na lè, ní fɛ̀ɛ́bèle mii kpéʔele be tári ni lè. Gee bee a gi kaan yele í gi cán bi cán mii wi nyɛ Yawe.»

3A Mowizi ní Aarɔn kári Faraɔnw ma n sáà wi pye: «Yawe wi lè Heburubèle Kolocɔlɔɔ, wi n jo: ‹Làlìí ni mɔ a láʔa nya mɔ céemi na? Mii syɛ́ɛnbèle yaʔa be kári be sa mii kpɔ̀ʔɔrɔ. 4Mɔ ga pye mɔ ga fɔ̀lɔ n mii syɛ́ɛnbèle yaʔa a be kári í, nyɛ̀ʔɛna mii a kúdo yaʔa wi jée mɔ tásaligi ni. 5Wi a ba tásaligi yɛ́ʔɛ tɔ́n, syɔɔn a ní gbǎn ra tári nyaagi í. Yáriree di kòro beè lè, dee zěsolomi yaʔa yele ma lè, wi a dee bee lìi. Tíiri di fíin yele ma sìnbirigi ni lè wi a dee bee myɛ lìi. 6Mɔ kpáayi, ní mɔ falipyebèle myɛ kpaaya, ní Ezyipiti ye myɛw kpaaya a nyìn wi na. Mɔ tóobèle, ní mɔ tóobèle tòōlo da kɔ́ɔ̀ gee bee félege nyaa í nlaa be pye beè lè tári na fwɔɔ n baa nan níjanʔa na.› »

A Mowizi núngo Faraɔnw tɛ́ʔɛ ni n kári. 7A Faraɔnw falipyebèlē wi pye: «Làlìí kánma nǎnw naa a pye wolo ma karinyanga? Ki n yɛlɛ mi syɛ́ɛnbèle bee yaʔa be kári be sa Yawe be Kolocɔlɔw kpɔ̀ʔɔrɔ. Mɔ ga sèʔé kɔ́ɔ̀ gi cán ncan Ezyipiti n kálagi n kwɔ́ɔ wii ì?»

8A be níì Mowizi ní Aarɔn yeri n pan Faraɔnw ma, a wi baa be pye: «Ki n yɛlɛ yaa syée ye sa Yawe yele Kolocɔlɔw kpɔ̀ʔɔrɔ. Bɛ̀lɛ́ si pe a kári yele ni?»

9A Mowizi wi yari: «Wolo a kári ní wolo nìgɔcaribèle, ní wolo wolɛɛbèle, ní wolo nànbiigèle, ní wolo calipiigèle ní n fàra wolo yaweeyiligèle, ní wolo yaweekpologèle na. Níì cán ki a sa pye wolo ma Yawe fɛ́tii.»

10A Faraɔnw be pye: «Ki n yɛlɛ Yawe í pye ní yele ní. Níì cán mii a yele ní yele pìíbèle yaʔa yaa syée. Ye gi cán kapeʔe yele caa! 11Gee bee a pye í! Yele nǎnbèle yaa syée ye sa Yawe kpɔ̀ʔɔrɔ. Níì cán koro yele nyɛ́ɛri.»

A pe be nɛnɛ n núngo Faraɔnw taana.

12Lǎli bee ni a Yawe gi joo Mowizi ma níì wi pye: «Mɔ kɔ́gi sánʔa Ezyipiti tári ǹjoʔo ni mi pan ní kúdow ní wi ba jée Ezyipiti tári ni jàngó wi tári nyàā myɛ lìi, ní dee myɛ zěsolomi yaʔa lè.»

13A Mowizi wi kàgbeeli yìrige Ezyipiti tári ǹjoʔo ni. A Yawe káfalaga yaʔa a gi yìri canʔafolomɔ ma ni funu tári ni, cángi bee myɛ ni, ní yébiligi myɛ ni. A ki ga pye nyǐndaligi na, a canʔafolomɔ káfalagi pan ní kúdow ní. 14#Tɛ̀ɛn 9:1-3 A kúdow jée Ezyipiti tári myɛ ni, níì tìgi n tɛ́ɛn tásaligi myɛ na. Wi maa tɔ̀nɔ n pee gbanʔama. Kúdow bee félege da kɔ́ɔ̀ pan í. Wi felege si a ní wɔ́ɔ pan í. 15A wi tásaligi yɛ́ʔɛ myɛ tɔ́n, a tári myɛ pye yébilimɛ. A wi tári nyàā myɛ lìi, ní wɔ́ɔ̀ tíiri yasanra myɛ lìi, gee bee n jo dee myɛ ti da kòro zěsolomi kàdoʔo ma lè. Nyàákannaa, ní waganna faala da níì kòro Ezyipiti tári ni kúdow kàdoʔo ma í.

16A Faraɔnw fala n tun kelekele, a be sáà Mowizi ní Aarɔn yeri ní baa jo: «Mii n kapeele pye Yawe yele Kolocɔlɔw na, ní wɔ́ɔ̀ li pye yele na. 17Ki si n yɛlɛ mɔ í tɛ́nɛ mii kapeeli kùsulugo syɔɔ kátali naa na. Ye Yawe yele Kolocɔlɔw nyɛ́ɛri, koro ga pye wi tɔ́ɔ kùu kéeli naa láʔa mii na.»

18A Mowizi yiri Faraɔnw tɛ́ʔɛ ni, ní sáà Yawe nyɛ́ɛri. 19A Yawe káfalaga yìrige canʔajeemɛ ma, ki maa kpɔ́ʔɔ cama. A ki baa kúdow fàari n sáà sòʔo Nyɛ́nɛri Solomɔ Lɔ́ʔɔ ni. Alí kúdopile nibin ga níì kòro Ezyipiti tásaligi tɛ́ɛgaa faala ni í. 20Kàjáa Yawe maa Faraɔnw fúngo gbàn, wi ga Isirayɛli ye yaʔa be kári í.

Wɔʔɔkpanjɛrɛ wógi: Yébiliwɔɔli kéele

21A Yawe gi joo Mowizi ma níì wi pye: «Mɔ kɔ́gi yìrige ǹjogi ni jàngó yébiliwɔɔlɔ í pye Ezyipiti tári ni, li pye yébiliwɔɔlɔ, lee na syɔɔn a gbǎn tánga lè.»

22 # Ŋún 105:28; Tɛ̀ɛn 16:10 A Mowizi wi kɔ́gi yìrige ǹjogi ni, a yébiliwɔɔlɔ jée Ezyipiti tári myɛ ni, lee li sámaga n wɔ́ɔ lè. A yébiliwɔɔli bee kwɔ́ɔ canya taanri. 23Wàa da ni wàa nyaagi í. Wàa ga wɔ́ɔ̀ yìri wi tɛʔɛ ni n kári tɛɛgaa ni cányi taanri fúngo ni í. Kàjáa gbɛ̀ɛnmi maa pye Isirayɛli ye myɛ ma be tɛɛkòrogi ni. 24A Faraɔnw Mowizi yeri ní baa wi pye: «Yaa syée ye sa Yawe kpɔ̀ʔɔrɔ. Yele yaweeyiligèle ní yele yaweekpologèle yagana yele a yaʔa naa. Yele pìíbèle a gbǎn ra syée ní yele ní.» 25A Mowizi wi yari: «Mɔ tiimaa n yɛlɛ bi sárigaw ní sáriga-sórigow yaweegéle kaan wolo ma, koro ga pye wolo í sa di wòlo sáriga Yawe wolo Kolocɔlɔw ma. 26Wolo yaweeri a kári ní wolo ní, fèrige nibin a kòro naa wolo kàdoʔo ma í. Níì cán toro tàa wolo a sa cò bi Yawe wolo Kolocɔlɔw kpɔ̀ʔɔrɔ. Dee si wolo yɛlɛ bi sa wòlo lè sáriga Yawe wolo Kolocɔlɔw ma, wolo a gbǎn pye sìnnan ni yaà si dee bee cán í.»

27Kàjáa Yawe maa Faraɔnw fúngo gbàn. Wi ga fɔ̀lɔ n be yaʔa be kári í. 28A Faraɔnw gi joo Mowizi ma níì wi pye: «Sɔ̀lɔ mi yiri mii tɛ́ɛgi ni! Ki n yɛlɛ mi miyɛɛ cǒmi cán gbanʔama. Mɔ a tíi si ní kɔ́ mii yɛ́ɛgi nyaa í. Níì cán mɔ ga níì mii yɛ́ɛgi nyaa cángee na lè, a mɔ a kùu wii.» 29A Mowizi jo: «Amɛɛ mɔ gi joo lè, ànbée gi nyɛ, mii a ní mɔ yɛ́ɛgi nyaa í.»

Currently Selected:

Yirile 10: CB10

Highlight

Copy