Yirile 9

Wɔʔɔ kagunɔ wógi: Yaweeri kùulo kéele

1A Yawe gi joo Mowizi ma níì wi pye: «Da syée mi sa gi joo Faraɔnw ma mí wi pye: ‹Yawe wi lè Heburubèle Kolocɔlɔɔ, wi n jo: Mii syɛ́ɛnbèle yaʔa be kári be sa mii kpɔ̀ʔɔrɔ. 2Mɔ ga pye mɔ ga fɔ̀lɔ n be yaʔa be kári í ní sèʔê tan be na, 3wéle, Yawe a wi kɔ́gi taʔa mɔ yaweeri na di nyɛ lè sìnbirigi ni. Gee bee n jo syɔ́ɔnyi, ní jòfanibèle, ní falibaayi, ní nǐyi, ní yaweeyiligèle, yaweekuuli a tɔ̀nɔ́ pee di na. 4Yawe si a wàlima kpéʔele Isirayɛli ye yaweeri ní Ezyipiti ye yaweeri nínge ni. Isirayɛli ye yaweelaa nibin a tée kùu í.› » 5A Yawe lǎli tɛ̀ɛn níì jo: «Nyɛ̀ʔɛna mii Yawe a gee bee kpéʔele tári ni.»

6Ki nyǐndaligi na a Yawe gee bee kpéʔele. A Ezyipiti yaweeri myɛ kùu. Kàjáa Isirayɛli ye yaweelaa faala ga kùu í. 7A Faraɔnw tun a be sáà yíbege kpéʔele, a be gi nyaa àlí Isirayɛli syɛ́ɛnbèle yaweelaa nibin ga kùu í. A Faraɔnw fúngo si sèʔê gbàn. Wi ga fɔ̀lɔ n syɛ́ɛnbèle yaʔa be kári í.

Wɔʔɔkɔrɔni wógi: Fìniyi kéele

8A Yawe gi joo Mowizi ní Aarɔn ma níì be pye: «Ki n yɛlɛ ye sa cɔnʔɔ kɔbonyɛ̀nnɛ koli fúruwaa ni, Mowizi í ba gi wáa ǹjogi ni Faraɔnw nyɛ́nɛ na. 9Ki a pye cíbige Ezyipiti tári myɛ ni, si kàri fìniye, bi yiri màʔa syɛ́ɛnbèle ní yaweeri na Ezyipiti tári myɛ ni.»

10 # Tɛ̀ɛn 16:2 A be sáà fúruw cɔ́ɔngaa koli n sáà yére Faraɔnw yɛ́ʔɛ ma, á Mowizi cɔ́ɔngi wáa ǹjogi ni. A gi fìniye kpéʔele syɛ́ɛnbèle ní yaweeri na, yee yi da yiri n màʔa lè cepo. 11A fìniri nìnyɔʔɔnɔgi fɔ̀ɔlɔ kaan pe ga gbàn n yére Mowizi yɛ́ʔɛ ma í. Níì cán fìniri maa pye nìnyɔʔɔnɔgi fɔ̀ɔlɔ na àmɛɛ di wɔ́ɔ̀ pye Ezyipiti tári syɛɛnsanbèlē myɛ na lè. 12A Yawe Faraɔnw fúngo gbàn, wi ga lóʔo Mowizi ní Aarɔn ma í, n yɛlɛ ní gi ní àmɛɛ Yawe da gi joo Mowizi ma lè.

Wɔʔɔkɔrɔsiin wógi: Zěsolomi kéele

13Koro kàdoʔo ma a Yawe gi joo Mowizi ma níì wi pye: «Ki n yɛlɛ mi sɔ̀li mi yìri mi kári mi sa yére Faraɔnw yɛ́ʔɛ ma mí wi pye: ‹Yawe wi lè Heburubèle Kolocɔlɔɔ, wi n jo: Mii syɛ́ɛnbèle yaʔa be kári be sa mii kpɔ̀ʔɔrɔ. 14Níì cán kátali naa na mii a wɔʔɔyi féleye myɛ yaʔa yi nan mɔ tiimaw na n fàra mɔ falipyebèle, ní mɔ tári syɛ̀ɛnnɛ na, koro ga pye mɔ í gi cán mii félege o nyɛ tári tɛ́ɛgaa faala ni í. 15Tɔ́ɔliw ni kapye mii maa mii kɔ́gi sánʔa n mɔ ní mɔ tári syɛ̀ɛnnɛ kpúmɔn ní káfalagi yáama ní, mɔ a dée kwɔ́ɔ bi yiri yaà tári ni. 16#Wɔr 9:17 Kàjáa mii n mɔ yaʔa beè koro ga pye bi mii séew tɛ̀ɛn mɔ na, mii mɛ́ɛgi si kpɔ́ʔɔ bi yiri tári tɛ́ɛyɛ myɛ ni. 17Mɔ si sèʔé i miyɛɛ gbɔ́ʔɔgi mii syɛ́ɛnbèle na níì cée, mɔ ga fɔ̀lɔ n be yaʔa be kári í. 18Mii si a zěsolomɔ cáan nyɛ̀ʔɛna níbeena nyɔʔɔmɔ na. Pi a tɔ̀nɔ́ pee. Nlaa Ezyipiti sélimi na fwɔɔ n baa nan níjanʔa na, bi felege ga kɔ́ɔ̀ too wi ni í. 19Koro na tɔ́ɔliw ni ki n yɛlɛ mi tun pe mɔ yaweeri lége tɛɛlaraga ni n fàra mɔ yáriree myɛ na di nyɛ sìnbirigi ni lè. Syɛ́ɛnbèle myɛ ní yaweeri myɛ ti ga kòro sìnbirigi ni lè ti ga kpóʔoro n jée kpaaya ni í, zěsolomi a too dee bee na bi di kpóo.› »

20Faraɔnw falipyebèle bele pe da ni fɛ̀ɛgí Yawe syɛ́ɛnri na lè, a poro be falipyebèle ní be yaweeri yaʔa a di fàn kelekele n sáà jée kpaaya ni. 21Bele si be nyɛ lè pe ga Yawe syɛ́ɛnri yaʔa a di wári be na be fúnyi ni í, a poro be falipyebèle, ní be yaweeri yaʔa yaà sìnbirigi ni.

22A Yawe gi joo Mowizi ma níì wi pye: «Mɔ kɔ́gi yìrige ǹjogi ni koro ga pye zěsolomi í too Ezyipiti tári myɛ ni, syɛ́ɛnbèle, ní yaweeri, ní yáriri myɛ na di fíin lè séyi ni, Ezyipiti tári ni.»

23A Mowizi wi kàgbeeli yìrige ǹjogi ni, a Yawe nyɛ̀ʔɛvōloli ní zěsolomi sánʔa n yaʔa, a náagi tìgi n too tári na. A Yawe zěsolomi cáan Ezyipiti tári myɛ na. 24#Tɛ̀ɛn 8:7; 16:21 Zěsolomi n pye yaà, á náagi nyáʔami bi ni. Pi maa tɔ̀nɔ n pee n sɔ̀lɔ. Pi felege da kɔ́ɔ̀ too Ezyipiti tári tɛ́ɛgaa faala ni í, nlaa di pye lè beè syɛɛnfelege. 25Yáriree myɛ di pye lè sìnbirigi ni, n séli syɛ́ɛnbèle na n sáà nan yaweeri na a zěsolomi dee bee kpúmɔn Ezyipiti tári myɛ ni. Yáriri myɛ di fíin lè séyi ni, a zěsolomi wɔ́ɔ̀ dee bee kpúmɔn, níì sìnbirigi tíire myɛ kabagi n wo. 26Gosyɛn tɛ́nɛmi yagana pi da syɔɔ, zěsolomɔ ga nan yaà í, beè Isirayɛli ye da pye lè. 27A Faraɔn tun a be sáà Mowizi ní Aarɔn yeri, ní baa be pye: «Kátali naa na, mii n kapeele pye. Yawe wi sín, á mii ní mii tári syɛ̀ɛnnɛ kolo. 28Ki n yɛlɛ mi Yawe nyɛ́ɛri jàngó wi nyɛ̀ʔɛvōloli ní zěsolomi yaʔa bi yére nya. Mii a yele yaʔa yele í kári, wàa a ní yele yérige nɛɛ naa í.»

29A Mowizi wi yari: «Mii ga yiri kěgi ni, mii a mii kɔ́yi yìrige Yawe ma. Nyɛ̀ʔɛni fololo a yére, zěsolomɔ a ní wɔ́ɔ pye í, koro ga pye mɔ í gi cán bi cán tári myɛ i nyɛ Yawe wóro. 30Mɔ si na, mii n gi cán mɔ ní mɔ falipyebèle ní, yele ga kɔ́ɔ̀ nan bi fyáa gbɛnʔɛnɛ Yawe Kolocɔlɔɔ na í.»

31A lɛnw ní orizyew kálagi, níì cán orizyew maa puru n kwɔ́ɔ, á lɛnw fyɛ́ɛn n kwɔ́ɔ. 32Kàjáa bilew, ní epotiriw da kálagi í, níì cán toro i leegi kàdoʔo ma.

33A Mowizi yiri Faraɔnw tɛ́ʔɛ ni, ní wɔ́ɔ̀ yiri kěgi ni n sáà wi kɔ́yi yìrige Yawe ma, a nyɛ̀ʔɛvōloli ní zěsolomi yére, zěgi ga níì too tári na í.

34A Faraɔnw ga gi nyaa a zěgi, ní zěsolomi ní nyɛ̀ʔɛvōloli yére, a wi taʔa n fala wi kapeeli kurugo n wi fúngi gbàn, woro ní wi falipyebèle ní. 35A Faraɔnw tɔ̀nɔ n wi fúngi gbàn, wi ga fɔ̀lɔ n Isirayɛli ye yaʔa be kári í, n yɛlɛ ní gee ní Yawe da joo Mowizi ma a wi joo lè.

Currently Selected:

Yirile 9: CB10

Highlight

Copy