Yirile 11

Wɔʔɔzangi kéele joo-mí-tɛ̀ɛnnɛ

1A Yawe gi joo Mowizi ma níì wi pye: «Mii a ní wɔʔɔgaa cáan Faraɔnw, ní Ezyipiti ye na, gee bee ki a pye wozangi. Koro kàdoʔo ma wi a yele yaʔa yele í kári. Alí wi a caa ba yele nɛnɛ bi yirige nɛɛ naa péw. 2Ki joo syɛ́ɛnbèle ma pe wálifiio ní tɛɛ̀ yárira nyɛ́ɛri, nàɔn o nàɔn í tàa nyɛ́ɛri wi tɛ́ɛnnyɛnnaɔn ma, cɔlɔɔ o cɔlɔɔ í tàa nyɛ́ɛri wi tɛ́ɛnnyɛnjaa ma.»

3A Yawe Isirayɛli ye kéeli yaʔa a li Ezyipiti ye dɛ́nɛ. Mowizi tiimaa si maa pye syɛɛnkpɔɔɔ Ezyipiti tári ni, Faraɔnw falipyebèlē, ní Ezyipiti syɛ́ɛnbèle ma.

4 # Yir 12:12,29 A Mowizi jo: «Gee Yawe joo lè, koro gi nyɛ gee naa, wi n jo: ‹Nyǐngi ga tíla lǎli ni lè, mii a jée Ezyipiti fúngi ni. 5Nànbiiseligèle myɛ a kùu Ezyipiti tári ni. Faraɔnw wi lè wodɛ́ɛɔn ní wi fàngoli na bi séli woro nànbiiselili na bi sa nan falipyecewee na wi tire tírege na lè, woro nànbiiselili na. Yaweeri pìiselibéle a wɔ́ɔ kùu. 6#Yir 12:30 Sùpiiwáara a tɔ̀nɔ́ pye Ezyipiti tári myɛ ni. Ki felege ga kɔ́ɔ̀ kpéʔele yaà í, ki felege si a ní wɔ́ɔ kpéʔele yaà nyáana í. 7Kàjáa gee gi Isirayɛli ye kéeli kwɔ́ɔ lè, pɔɔ̀n faala a tée kaana pe wàa na í, n yaweeri pínɛ syɛ́ɛnbèle ni.› Kánmi bee na yele a gi cán bi cán Kolocɔlɔɔ n wàlima kpéʔele Ezyipiti, ní Isirayɛli níngi ni. 8Lǎli bee ni mɔ falipyebèle myɛ a pan ba tìgi bi too cíbele mii yɛ́ʔɛ ma si mii pye: ‹Yiri maa syée, mɔ ní mɔ syɛ́ɛnbèle myɛ ní be taʔa mɔ na lè.› Koro kàdoʔo ma mii a yiri.» A Mowizi núngo Faraɔnw taana ní fundanʔara ní gbanʔama.

9A Yawe gi joo Mowizi ma níì wi pye: «Faraɔnw a tée lóʔo yele ma í, koro ga pye mii kakpoloyi í nɛʔɛ Ezyipiti tári ni.»

10Mowizi ní Aarɔn maa kakpoloyi bee myɛ kpéʔele Faraɔnw yɛ́ʔɛ ma. Kàjáa Yawe maa Faraɔnw fúngo gbàn. Wi ga fɔ̀lɔ n Isirayɛli ye yaʔa be yiri woro tári ni bi kári í.

Currently Selected:

Yirile 11: CB10

Highlight

Copy