Yirile 12
12
Sɔ̀lɔ-mí-yaʔali kéele
1 #
Lev 23:5; Cór 9:1-5; 28:16; Làlw 16:1-2 A Yawe gi joo Mowizi ní Aarɔn ma Ezyipiti tári ni níì jo: 2«Yégee gi nyɛ lè gee, koro gi yɛlɛ gi córo yele ma yɛ́ɛli sélimɛ, koro ki a pye yɛ́ɛli yéye yezelige yele ma. 3Ye gi joo Isirayɛli syɛ́ɛnmi myɛ ma, ye bi pye yégi naa canya kɛɛ wógi na, narigbaʔa o narigbaʔa n yɛlɛ bi bàpile wàlá kapile cò, gee bee n jo kpaʔa o kpaʔa ní gi yaweele. 4Narigbaagaa ga cɛ́rɛ yaweeli taana, narigbaagee gi nùuni narigbaagi bee wòolo na lè, ki n yɛlɛ be pínɛ ní narigbaagi bee ní pe wɔ́ɔ yaweele nibin na bi yɛlɛ ní be syɛ́ɛnbèle nyɔ́ɔ ní. Yele a yaweeli bee lɛɛ bi yɛlɛ ní be myɛ nibin nibin káaganma ní. 5Li a pye yɛɛlɛ nibin tɛɛlɛ fun bàpɔbile, wàlá yɛɛlɛ nibin tɛɛlɛ fun kapalipile. 6Ye li cò ye yaʔa fwɔɔ bi sa nan yégi bee canya kɛɛ ní sicɛrɛ wóʔo na. Isirayɛli syɛ́ɛnmi myɛ bìnɛ narigbaʔa o narigbaʔa a gi wolò kɔni cângwɔɔgi bee nyɔ́ɔ na. 7Kpáagee ni pe a li káa lè, pe a li sìsyaanwaa láa bi taʔa kɔ̀riteliyi siin na, si wàa taʔa kpaaweeli ǹjoʔo ma. 8Pe a káari bee fwɔ́ɔ si di pínɛ ní levé fun búru ní, n fàra nángwɔɔw wazororo na bi káa yébili-níjangi ni. 9Yele a kɔ́ li káari káa wobirire ní, wàlá bi di sɔʔɔ lɔ̀ʔɔ ni í. Kàjáa ti a pínɛ fwɔ́ɔ naà na, n fàra nyǔngi, ní tɔ́lɔyi, ní fúngi yárira myɛ na. 10Yele a kɔ́ kaaraa yaʔa di syɔ́ɔn í. Tàa si ga syɔ́ɔn, ye di sórigo naà ni nyǐngi nyɔ́ɔ na. 11Kánmee na yele a di káa lè, poro bi nyɛ bee naa, sɛntiiribèle a pye yele sárigèle ni, yele táʔalayi si pye tɔ́lɔyi na, yele kàgbeegèle si pye kɔ́yi ni, yé di káa kelekele. Loro li nyɛ Yawe Sɔ̀lɔ-mí-yaʔali.
12Yébiligi bee ni mii a Ezyipiti tári nyaari bi foro si nànbiiseligèle myɛ kpóo Ezyipiti tári ni bi séli syɛ́ɛnbèle wòʔolo na fwɔɔ bi sa nan yaweeri wòʔolo na. Mii a tɔ̀nɔ́ kútiiw kèlē cáan Ezyipiti kolocɔlɔbèle myɛ na. Mii wi nyɛ Yawe. 13Kpáayee ni yele a pye lè, sìsyaanw a pye yele ma fɛ̀ɛ yi na. Mii a sìsyaanw bee wéle si sɔ̀lɔ yele na. Lǎli ni mii ga ni Ezyipiti tári kpúmɔn lè, kálagili wɔʔɔgɔ a tée nan yele na í.
14 #
Yir 23:15; 34:18; Lev 23:6-8; Cór 28:17-25; Làlw 16:3-8 Cángi bee a kòro yele ma sɔ̀ngudaara canʔa. Yele a gi yaʔa Yawe ma fɛ́tii. Gee bee a kòro yele yirigèle myɛ syɛ̀ɛnnɛ ma bàngwɔɔ làlwa.
Levé fun búruw fɛ́tii sélimɛ
15«Ki n yɛlɛ yele í levé fun búruw lìi canya kɔrɔsiin fúngo ni. Cânzeligi bee tiimaa na, yele a levéw myɛ yirige yele kpáayi ni. Bi séli cányi bee kɔrɔsiin cânzelige na bi sa nan kɔrɔsiin wógi na, syɔ́ɔnwee wi ga levé búru lìi lè cányi bee kàa ni, wee bee a kwɔ́ɔ yirige Isirayɛli ye níngi ni. 16Cânzeligi na yele a yeyɛɛ gbóʔoro kpóʔorojànna na. Canya kɔrɔsiin wógi na bi wɔ́ɔ yeyɛɛ gbóʔoro kpóʔorojànna na. Faliwaa faala ga yɛlɛ bi kpéʔele cányi bee ni í, fwɔɔ syɔɔn o syɔɔn yaliire sámagala fáli yagana kéele.
17Ki n yɛlɛ yaa levé fun búruw fɛ́tii kpéʔele, níì cán cángi bee tiimaa na mii a yele syɛ́ɛnbèle kabiya yirige Ezyipiti tári ni. Gee bee na yele ní yele yòdaʔayi n yɛlɛ bi cángi bee yaʔa gi kòro bàā syée bàngwɔɔ làlwa kéele yele yìrigèle myɛ syɛ̀ɛnnɛ ma. 18Yɛ́ɛli yézelige canya kɛɛ ní sicɛrɛ wógi cângwɔʔɔ nyɔ́ɔ na, yele a levé fun búruw lìile séli bi taa sa nan canya toko ní nibin wógi cângwɔʔɔ nyɔ́ɔ na. 19Levé ga yɛlɛ wi nyaa yele kpáayi ni canya kɔrɔsiin fúngo ni í. Syɔ́ɔnwee faala wi ga levé búru lìi lè, a wi i nyɛ nibɔɔn tári ni yoo, kànaɔn yoo, wee bee a kwɔ́ɔ yirige Isirayɛli syɛ́ɛnmi ni. 20Yele a kɔ́ levé búru faala lìi í. Tɛʔɛ̀ o tɛʔɛ̀ ni yele ga pye lè yaa levé fun búruw líi nɛɛ bee.»
Sɔ̀lɔ-mí-yaʔali lìile sámagala
21Lǎli bee ni a Mowizi Isirayɛli wolɛɛbèle myɛ yeri ní baa be pye: «Yaa syée ye sa yaweeyiligèle cò yele narigbaayi kéele na, yé ge kɔnɔgi Sɔ̀lɔ-mí-yaʔali kéele na. 22Yé hizɔpi wára kúun yaa nii sìsyaanw ni wi a pye lè yalegi ni, ye wàa taʔa kpaaweeli ǹjoʔo ma tɛɛpariga na, ní kɔ̀riteliyi siin na. Yele wàa faala ga yɛlɛ wi yiri wi kpaʔa ni í, bi taa ba nan nyǐngi nyɔ́ɔ na. 23#Heb 11:28 Lǎli ni Yawe a ba sɔ̀lɔ́ màʔa bi Ezyipiti ye kpúmɔn kpóo lè, wi ga baa sìsyaanw nyaa kpaaweeli ǹjoʔo ma tɛɛpariga na, ní kɔ̀riteliyi siin na, wi a sɔ̀lɔ kpaaweeli bee na. Wi a fɔ̀lɔ gàlagipyew í jée yele kpáayi ni bi yele kpúmɔn kpóo í. 24Gee bee a kòro làlwa yele ní yele pìíbèle ma bàā syée yaà làla o làla kwɔ́ɔmɔ fun. 25Táree Yawe a kaan yele ma lè n yɛlɛ ní wi syɛ́ɛnri ní, lǎli ni yele ga sáà jée di ni lè, yaa kalɛɛli bee kpéʔele. 26Lǎli ni yele pìíbèle ga kɔ́ baa yele yíbe lè níì jo: ‹Nyàʔá gi nyɛ kalɛɛli naa kɔ́rɔ yele ma?› 27Ye be yari: ‹Sɔ̀lɔ-mí-yaʔali sáriga wii Yawe kpɔ̀ʔɔrɔli kéele na àmɛɛ wi da sɔ̀lɔ Isirayɛli ye kpáayi na lè Ezyipiti ni, lǎli ni wi Ezyipiti ye kpúmɔn n kpóo lè, níì wolo kpáayi wòolo yaʔa.› »
Lǎli bee ni a syɛ́ɛnbèle tìgi n kpùmɔnɔ níì too n yɛ́ɛyi cíbele n kpɔ̀ʔɔrɔli kpéʔele. 28Gee Yawe joo n gbàn Mowizi ní Aarɔn ma lè, a Isirayɛli ye kári n sáà gi kpéʔele kélemi n yɛlɛ ní gee bee ní.
Wɔʔɔzangi: Ezyipiti ye nànbiiseligèle kùu kéele
29 #
Yir 4:22-23
Lǎli ni nyǐngi baa tíla lè, a Yawe nànbiiseligèle myɛ kpóo Ezyipiti tári ni, Faraɔnw wi tɛ́ɛn wi fàngoli na lè, n séli woro nànbiiselili na fwɔɔ n sáà nan púlowee wi nyɛ lè wi kàsow ni woro nànbiiselili na. Ní wɔ́ɔ̀ yaweeri pìiselibéle myɛ kpóo. 30A Faraɔnw yìri yébiligi ni, woro ní wi falipyebèle ní, n fàra Ezyipiti ye myɛw na. A sùpiiwáara tɔ̀nɔ n pye Ezyipiti tári ni gbanʔama. Níì cán kpaagaa faala da kòro kpóō fun í. 31A Faraɔnw Mowizi ní Aarɔn yeri yébiligi bee tiimaa ni n baa gi joo be ma níì be pye: «Ye yìri ye yiri mii syɛ́ɛnbèle nínge ni, yele ní Isirayɛli ye myɛw. Yaa syée ye sa Yawe kpɔ̀ʔɔrɔ bi yɛlɛ ní gi ní àmɛɛ yele gi joo lè. 32Yé wɔ́ɔ yaa syée ní yele yaweeyiligèle, ní yele yaweekpologèle ní, bi yɛlɛ ní gi ní àmɛɛ yele gi joo lè. Yé wɔ́ɔ ye dùba kpéʔele mii ma.»
33A Ezyipiti ye syɛ́ɛnbèle wáriga n láa. Pe maa fúnyi wáriga bi be yaʔa pe yiri tári ni. Níì cán pe maa ni gi nyuu peyɛɛ ma níì jo: «Wolo myɛ a kùu wii.» 34A syɛ́ɛnbèle pe míibirigegi láa, n gi yaʔa sìnyìri ni, níì be búrumii-bírige-yaleyi pwɔɔ pe fànibèle ni n taʔa be pɔ́yi na.
35 #
Yir 3:21-22
Isirayɛli ye maa wálifiio yárira, ní tɛɛ̀ yárira ní yalere nyɛ́ɛri Ezyipiti ye ma n yɛlɛ ní gee ní Mowizi da joo lè. 36A Yawe gi yaʔa a Isirayɛli ye kéeli kpɔ́ʔɔ Ezyipiti ye ma. Pe ga yárigee faala nyɛ́ɛri lè, Ezyipiti ye n gi kaan be ma. Kánmi bee na Isirayɛli ye Ezyipiti ye fuguri.
37A Isirayɛli ye yiri Aramisɛsi ni ni syée Sukɔti ma tɔlɔyɔ na. Nǎnbèle nyɔ́ɔ n pye sirakamayɛ toko ní kpɔrigɔ félege. Pìíbèle ga córo yaà í. 38Syɛɛnfeleye saʔa syɛɛnnɛʔɛmɛ maa yiri n pínɛ n kári ní be ní. Pe maa wɔ́ɔ̀ kári ní yaweenɛʔɛrɛ ní, gee bee n jo yaweeyiligēle, ní yaweekpologèlē. 39Míibirigegi pe da láa n yiri Ezyipiti ni lè, a be gee bee sámaga búrupiigéle n fwɔ́ɔ ki ní sìnyìri ni. Ki maa kòro sìnyìri ni, níì cán pe da be nɛnɛ n yirige Ezyipiti ni wii. Pe da gbàn n yére n mɔn í, pe ga kôdanʔa lìile sámaga peyɛɛ ma í.
40 #
Sél 15:13; Gal 3:17 Lǎlee Isirayɛli ye kwɔ́ɔ Ezyipiti ni lè, li n pye yɛ̀ʔɛlɛ saala siin ní toko ní kpɔrigɔ. 41Yɛ́ɛgèle saala siin ní toko ní kpɔrigɔ kwɔ́ɔlɔ kadoʔo ma, cángi bee tiimaa na Yawe Isirayɛli syɛ́ɛnmi kabiya yirige Ezyipiti tári ni. 42Cángi bee yébilige a kòro sìnŋunɔmɔ wóʔo Yawe kpɔ̀ʔɔrɔli kéele na, níì cán koro ni wi be yirige Ezyipiti tári ni. Ki n kòro Isirayɛli ye myɛ yìrigèle syɛ̀ɛnnɛ ma sìnŋunɔmɔ yébilige Yawe kpɔ̀ʔɔrɔli kéele na.
Sɔ̀lɔ́-mí-yaʔali lìile kajoogéle
43A Yawe gi joo Mowizi ní Aarɔn ma níì be pye: «Lee naa li nyɛ Sɔ̀lɔ-mí-yaʔali làlwa kéele. Nibɔɔn faala a lìi li na í. 44Púlowee wi syɔɔ wáli na lè, mɔ a wi kɛ́nɛ, wí náa gbǎn lìi li na. 45Nibɔndɛ́ɛɔn wàlá sàra-na-falipyeo a gbǎn lìi li na í. 46#Cór 9:12; Zyan 19:36 Kpaʔa ni yele yɛlɛ bi lìíli lìi, yele a kɔ́ yiri ní kaaraa ní kàfugi na í. Yele a kɔ́ kacelegaa faala kabi í. 47Isirayɛli syɛ́ɛnmi myɛ n yɛlɛ bàā Sɔ̀lɔ-mí-yaʔali kpéʔele. 48Nibɔndɛ́ɛɔn ga pye ní yele ní, ní i caa bàā li kpéʔele Yawe kpɔ̀ʔɔrɔli kéele na, nǎnbèle myɛ be nyɛ wi tɛ́ɛgi ni lè, pe n yɛlɛ bi kɛ́nɛw kpéʔele. Koro kàdoʔo ma wi a náa gbǎn ra maa li tɛɛ̀kpéʔelegi ni. Wi ní tári syɛ̀ɛnnɛ a córo sèjira. Sìngɛ́nɛɔ faala ga yɛlɛ wi lìi li na í. 49Làlwanijaɔn wi a pye kànanbèle ní nibɔnbèle na pe baa tɛ́ɛn ní yele ní lè.»
50A Isirayɛli ye myɛ gi kpéʔele kélemi n yɛlɛ ní gi ní àmɛɛ Yawe da gi joo n gbàn Mowizi ní Aarɔn ma lè. 51Cángi bee tiimaa na Yawe Isirayɛli ye yirige Ezyipiti tári ni kabiya kabiya.
Currently Selected:
Yirile 12: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
