Yirile 13

Kajoogèle kèle Sɔ̀lɔ-mí-yaʔali kéele na

1A Yawe gi joo Mowizi ma níì wi pye: 2#Cór 3:12; Luk 2:23 «Nànbiiseligèle myɛ yaʔa mii ma kɔlɔ̀ na, n syɛ́ɛnbèle nànbiiseligéle pínɛ yaweeri wòʔolo ni, ke lè Isirayɛli ye ma. Ke i nyɛ mii wòʔolo.»

3A Mowizi gi joo Isirayɛli syɛ́ɛnmi ma níì bi pye: «Yaa sɔ̀ngí yaa taagi cángi naa na, gee ni yele yiri lè gee níjanʔa Ezyipiti ni, púlori kpaʔa ni. Níì cán Yawe kɔ́gi séekpɔɔɔ wi yele yirige di ni. Yele ga ni cángi naa sɔ̀ngudaara kpéʔele, ki ga yɛlɛ yele í levé búru lìi í. 4Yele ye yirigi bele níjanʔa Abiibi yégi ni. 5Táree nyɔ́ɔ Yawe da fàli yele tóolɛɛbèle ma ní kàliga ní lè níì jo woro a di kaan yele ma, ti lè Kanaan ye, ní Hɛti ye, ní Amɔri ye, ní Hɛvi ye, ní Yebusi ye tári, dee di nyìn nɔ́nɔw ní sárigi na ni fóo lè, lǎli ni Yawe ga sáà yele lége di ni lè, yaa fɛ́tiiw naa kpéʔele yégi naa wonijanga ni. 6Yele a ra levé fun búruw líi canya kɔrɔsiin fúngo ni. Canya kɔrɔsiin wógi si pye fɛ́tii Yawe kpɔ̀ʔɔrɔli kéele na. 7Levé fun búruw yele a ra líi cányi kɔrɔsiin fúngo ni. Levé búru ga yɛlɛ wi nyaa yele wàa ma í. Levé ga yɛlɛ wi nyaa yele tásaligi tɛ́ɛgaa faala ni í. 8Ki joo mɔ piiw ma cángi bee na mí wi pye: ‹Gee Yawe kpéʔele mii ma lǎli ni mii yiri Ezyipiti tári ni lè, koro kéeli na mii gee naa kpéʔele.› 9Gee bee a pye mɔ ma fɛ̀ɛ mɔ kɔ́gi na, ní sɔ̀ngudaara yáriga mɔ nyapiigèle lariga ni, koro ga pye Yawe làlwaw í pye mɔ nyɔ́ɔgi na. Níì cán Yawe n mɔ yirige Ezyipiti ni ní wi séekpɔɔw kɔ́lɔ ní. 10Yaa làlwa kéeli naa kpéʔele li lǎli ni yɛɛlɛ o yɛɛlɛ.

11Lǎli ni Yawe ga sáà mɔ lége lè Kanaan ye tári ni n yɛlɛ ní kàligi ní wi kpéʔele mɔ ní mɔ tóolɛɛbèle ma lè, wi ga sáà di kaan mɔ ma, 12#Yir 34:19-20; Luk 2:23 mɔ a ra nànbiiseligèle myɛ kaangi Yawe ma, àlí yaweeri wòʔolo myɛ ke a pye mɔ ma lè. Nànbiiseligèle myɛ i nyɛ Yawe wòʔolo. 13Ki si ga pye jòfani pìiselio, bàpile mɔ a tɛ́ʔɛ bi wi nyúngi syɔɔ. Mɔ si ga pye mɔ o caa bi jòfani pìiseliwee nyúngo syɔɔ lè í, mi wi yátiiveʔew kabi. Mɔ piibèle ni, mɔ a wɔ́ɔ ra syɔɔn nànbiiseligèle nyùnzyɔɔrɔ kpéʔele. 14Mɔ piiw ga kɔ́ baa mɔ yíbe nyɛ̀ʔɛna níì jo: ‹Nyàʔá gi nyɛ gee bee pyele kɔ́rɔ?› Mɔ a wi yari: ‹Yawe n wolo yirige púlori kpaʔa ni, Ezyipiti ni, ní wi séew kɔ́lɔ ní. 15Amɛɛ si Faraɔnw da cée lè ní fungbanga ní, wi ga fɔ̀lɔ bi wolo yaʔa wolo í kári í, a Yawe si nànbiiseligèle myɛ kpóo Ezyipiti tári ni n séli syɛ́ɛnbèle nànbiiseligéle na n sáà nan yaweeri wòʔolo na. Koro na mii yaweeri nànbiiseligéle myɛ kpéʔele sáriga Yawe ma, ní si i mii tiimaa nànbiiseligèle nyùnzyɔɔrɔ kpéʔele.› 16Gee bee a pye fɛ̀ɛ mɔ kɔ́gi na, ní sápabēle mɔ nyapiigèle lariga ni. Níì cán Yawe n wolo yirige Ezyipiti ni, ní wi séew kɔ́lɔ ní.»

Kolocɔlɔɔ n kíni wi syɛ́ɛnbèle yɛ́ʔɛ na

17Lǎli ni Faraɔnw syɛ́ɛnbèle yaʔa be kári lè, Kolocɔlɔɔ ga be yaʔa be sɔ̀lɔ Filisitini ye tári kólogo ni í, àlí bi gi taa koro ki da kpere. Níì cán Kolocɔlɔɔ maa jo: «Ki fanʔa i nyɛ syɛ́ɛnbèle í sa kapɛɛnnɛ nyaa yaà, si be fúnyi kàriga bi kolo lúru kári Ezyipiti ma.» 18A Kolocɔlɔɔ si syɛ́ɛnbèle yaʔa a be kolo n sɔ̀lɔ fìími tára kólogo ni Nyɛnɛri solomɔ lɔ́ʔɔ kàbaan na. Isirayɛli ye maa yiri Ezyipiti tári ni wozamaga-yaʔabéle ní. 19#Sél 50:25; Zyoz 24:32 A Mowizi Zyozɛfu kaceleyi láa n kári. Níì cán Zyozɛfu maa Isirayɛli yòdaʔayi kɔ́ri a yi kàli woro ma. Wi maa be pye: «Kolocɔlɔɔ a tɔ̀nɔ́ pan ba yele wéle, yele si n yɛlɛ ye kɔ mii kaceleyi láa nɛɛ naa yaa syée.»

20A be yiri Sukɔti ni n sáà be fànikpaayi kóri Etami ni, fìími tára nyɔ́ɔ na. 21Ki ga pye cángi làla ni, Yawe n kíni pe yɛ́ɛgi na fàfaan-tɔ́nɔgɔ ni ni kólogi tèé be na. Ki si ga pye yébiligi ni, wi n pye naà fàfaantɔnɔgɔ ni ni gbɛ̀ɛnmɛ yirigi be ma, koro ga pye paa táanri canʔa ní yébilige. 22Fàfaantɔnɔgi da ni núngu syɛ́ɛnbèle yɛ́ʔɛ ma cángi làla ni í wàlá náagi fàfaantɔnɔgɔ yébiligi làla ni í.

Currently Selected:

Yirile 13: CB10

Highlight

Copy