Yirile 14
14
Faraɔnw n yiri n taʔa Isirayɛli ye na ni nɛnɛ
1A Yawe gi joo Mowizi ma níì jo: 2«Ki joo Isirayɛli ye ma mí be pye be kolo pe sa be fànikpaayi kóri Pi-Hahirɔti yɛ́ʔɛ ma Migidɔli ní sólomi lɔ̀ʔɔ nínge ni, Baali-Sefɔn zǐnmi na. Tɛ́ɛgi bee ni yele a fànikpaayi kóri sólomi lɔ̀ʔɔ taana. 3Faraɔnw a gi joo Isirayɛli ye kéeli na si jo: ‹Pe n pùuni tári ni. Fìími tára n be lìi.› 4Mii a Faraɔnw fúngo gbàn. Wi a yiri taʔa be na da nɛnɛ. Mii si a kpɔʔɔrɔ taa Faraɔnw ní wi kapɛɛnkpumɔnbèle myɛ kéele na, koro ga pye Ezyipiti ye a gi cán bi cán mii wi nyɛ Yawe.» A Isirayɛli ye wɔ́ɔ̀ gi kpéʔele kánmi bee na.
5A pe gi joo Ezyipiti fànʔafɔw ma níì jo syɛ́ɛnbèle n yiri n fàn. A Faraɔnw sɔ̀ngurɔ, ní wi falipyebèle wóro kàri Isirayɛli ye kàbangi na. A be jo: «Nyàʔá na wolo gee naa kpéʔele níì Isirayɛli ye yaʔa a be kári, pe a ní fali pye wolo ma í?» 6A Faraɔnw wi wòtorow pwɔɔ níì wi sùlasiibèle kɔ́ri n pínɛ ní wiyɛɛ ní. 7A wi kapɛɛnkpumɔn-wòtoro-nyɛ́nɛ-wòlobēle saala taanri láa n fàra Ezyipiti kapɛɛnkpumɔn-wòtorosanbèle myɛ na. Kapɛɛnkpumɔn-kùndigibéle taanri-daanri si i nyɛ pe myɛ nibin nibin nyúnyo na. 8A Yawe Faraɔnw fúngo gbàn, Ezyipiti fànʔafɔw. A Faraɔnw yiri n taʔa Isirayɛli ye na ni nɛnɛ. Isirayɛli ye si maa yiri n kwɔ́ɔ n pye peyɛɛ ma. 9A Ezyipiti ye yiri n taʔa be na ní Faraɔnw syɔ́ɔnyɔ, ní wi kapɛɛnkpumɔn-wòtorobèle myɛ ní, n fàra wi syɔɔnfǎnbèle ní wi sùlasiibèle na n sáà be nɛnɛ n cò Pi-Hahirɔti taana, Baali-Sefɔn zǐnmi na, beè pe da be fànikpaayi kóri lè sólomi lɔ̀ʔɔ taana.
10Faraɔnw maa ni nùuní ni maa. A Isirayɛli ye ga yɛ́ɛyi yìrige n wéle n Ezyipiti ye nyaa pe i maa poro kurugo, a be fyáa gbanʔama ní i yákpogèle wáa Yawe kurugo. 11A be Mowizi yari: «Nyanya lé yi da fɔ̀n Ezyipiti ni, á mɔ wolo kɔ́ri n pan fìimɛ tári naa ma wolo í ba kùu? Nyàʔá mɔ pye gee wolo na àmɛɛ mɔ wolo kɔ́ri n yirige Ezyipiti ni lè? 12N wo yaʔa yaà Ezyipiti ni, gee naa ban wolo da ni nyuu mɔ ma ì níì mɔ pye: ‹Wolo yaʔa wolo í da báara Ezyipiti ye ma?› Níì cán wolo í da báara Ezyipiti ye ma, gee bee n pɔ́rɔ n sɔ̀lɔ sáni wolo í kùu fìími tára ni lè.» 13A Mowizi gi joo syɛ́ɛnbèle ma níì be pye: «Yele a kɔ́ ra fɛ̀ɛgí í. Ki n yɛlɛ ye yére sági, yele a gi nyaa kánmee na Yawe a yele syɔɔ lè níjanʔa. Níì cán Ezyipiti ye yele nyaagi lè bele níjanʔa, yele a ní be nyaa nyáana í. 14Yawe a kapɛɛnni kpúmɔn bi kaan yele ma. Yele si na, ki n yɛlɛ ye kòro pyèrio.»
Kolocɔlɔɔ n tɛɛsɔ̀lɔgɔ múgu sólomi lɔ́ʔɔ ni
15A Yawe gi joo Mowizi ma níì wi pye: «Nyàʔá na mɔ yákpoli wáa mii kurugo? Ki joo Isirayɛli ye ma mí be pye paa syée tánʔani kurugo. 16Mɔ si na, mɔ kagbeeli yìrige mi mɔ kɔ́gi sánʔa sólomi lɔ̀ʔɔ ǹjoʔo ni, mi gi tíla. Isirayɛli ye a tɔ̀nɔ́ jée foro sólomi lɔ̀ʔɔ nínge ni ní tɔ́lɔyi ní woweregiye ní. 17Mii si na, mii a Ezyipiti ye fúnyi gbàn jàngó pe jée be kurugo. Mii si a kpɔʔɔrɔ taa Faraɔnw ní wi kapɛɛnkpumɔnbèle myɛ, ní wi kapɛɛnkpumɔn-wòtorobèle, ní wi syɔɔnfǎnbèle kéele na. 18Lǎli ni mii ga kpɔʔɔrɔ taa lè Faraɔnw ní wi kapɛɛnkpumɔn-wòtorobèle, ní wi syɔɔnfǎnbèle kéele na lè, Ezyipiti ye a gi cán bi cán mii wi nyɛ Yawe.»
19Kolocɔlɔɔ nyɛ̀ʔɛni tunduɔn wi da kíni Isirayɛli ye yɛ́ɛgi na lè, a wi lúru n kàri be tɛɛkòrogi kàdoʔo ma, a fàfaangi wɔ́ɔ̀ núngo pe yɛʔɛ̀ ma n kàri be kàdoʔo ma. 20A gi jée Ezyipiti ye tɛɛkòrogi ní Isirayɛli ye tɛɛkòrogi nínge ni. A gi kàbangaa pye yébilimɛ, kàa si i nyɛ gbɛ̀ɛnmɛ. Ki maa ni gbɛ̀ɛ́nmi kaangi yébiligi ni. Pe ga téè nùuni peyɛɛ na í yébiligi myɛ ni.
21A Mowizi wi kɔ́gi sánʔa sólomi lɔ̀ʔɔ ǹjoʔo ni. A Yawe sólomi lɔ̀ʔɔ ŋɔrigɔ yébiligi bee myɛ ni ní káfalakpɔʔɔ ní, gee gi yìri canʔafolomɔ ma lè. A gi sólomi lɔ̀ʔɔ ceri n pye tɛɛwaʔa. 22#1Kor 10:1-2; Heb 11:29 A Isirayɛli ye jée n foro sólomi lɔ̀ʔɔ nínge ni ní tɔ́lɔyi ní woweregiye ní. A lǒgi yére n pye be ma gungo pe kàliige, ní be kàmɔnɔ ma. 23A Ezyipiti ye taʔa be na. A Faraɔnw syɔ́ɔnyɔ myɛ, ní wi kapɛɛnkpumɔn-wòtorobèle, ní wi syɔɔnfǎnbèle jée be kurugo sólomi lɔ̀ʔɔ nínge ni. 24A ki ga pye nyǐnjerigi na, n Yawe yaʔa náagi fàfaantɔnɔgɔ ni, a wi Ezyipiti ye kapɛɛnkpumɔnbèle kabiga wéle, níì gi nyáʔami. 25Wi maa be kapɛɛnkpumɔn-wòtorobèle sàkoyo kɔ́nɔgi n táriga, a be tánʔani kéele gbàn. Lǎli bee ni a Ezyipiti ye jo: «Ye tíi waa fé Isirayɛli ye na. Níì cán Yawe i kapɛɛnni kpúmɔn ní wolo Ezyipiti ye ní ni kaangi be ma.»
26A Yawe gi joo Mowizi ma níì wi pye: «Mɔ kɔ́gi sánʔa sólomi lɔ̀ʔɔ ǹjoʔo ni, lǒgi a lúru sogi bi Ezyipiti ye, ní be kapɛɛnkpumɔn-wòtorobèle, ní be syɔɔnfǎnbèle wáa.» 27A Mowizi wi kɔ́gi sánʔa sólomi lɔ̀ʔɔ ǹjoʔo ni nyǐnjerigi na, a sólomi lɔ̀ʔɔ lúru n pye gi tɛɛlɛɛgi ni. Ezyipiti ye maa ni fé gi na, a Yawe si be ŋɔrigɔ n wáa yaà gi níngi ni. 28A lǒgi lúru n sogi n kapɛɛnkpumɔn-wòtorobèle, ní syɔɔnfǎnbèle, ní Faraɔnw kapɛɛnkpumɔnbéle myɛ wáa, poro bele be tɛ́nɛ̀ jée lè sólomi lɔ̀ʔɔ ni n taʔa Isirayɛli ye na ni nɛnɛ. Pe wàa nibin ga syɔɔ í. 29Kàjáa Isirayɛli syɛ́ɛnbèle maa tánʔa n foro sólomi lɔ̀ʔɔ nínge ni ní tɔ́lɔyi ní woweregiye ní. A lǒgi yére n pye be ma gungo pe kàliige ní be kàmɔnɔ ma.
30Cángi bee na Yawe Isirayɛli ye yirige Ezyipiti ye kɔ́yi ni. A Isirayɛli ye Ezyipiti ye kúceri nyaa sólomi lɔ̀ʔɔ lógbê na. 31A Isirayɛli ye gi nyaa gee Yawe kpéʔele Ezyipiti ye na ní séew kɔ́lɔ ní lè. A syɛ́ɛnbèle fyáa Yawe na. A be tága Yawe na, ní wɔ́ɔ̀ tága wi falipyew Mowizi na.
Currently Selected:
Yirile 14: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
