Luuka 6

Apwiya a eSaabadu

1eSaabadu emoha, Yeesu aviraka imatta sa etrigu, oohuseraawe yaapacera ovurula ni ohupula makala ekhuuraka inukusaya. 2aFarisi* akina yaahaakoha: “Heeni mumpakaanyu yeeyo ehintthuniheriwa eSaabadu?” 3Yeesu aawaakhula: “Khamunasome yeeyo aapankaawe Davide, owo ni asikhwaawe yaaraaya ni etala? 4Owo aavolowa Mpaani mwa Muluku, ni akuxaka ipaawu sootteelihiwa, aahooca seiyo saatthuniheriwa ociwa ni asaserdoti* paahi. Aahaavahatho asikhwaawe.” 5Vano aaweerela: “Mwaana a mutthu ti Apwiya a eSaabadu.” 6eSaabadu ekina aavolowa muSinagogani* ni aapacera oxuttiha. Aakhala mwemmwe mulopwana a ntatanawe na moono mulopwana noorakala. 7aFarisi* ni anamawera a nlamulo* yannaasaasa nthowa weera emoothere Yeesu. Tivawo yaamuwehawehanxaaya weera yoone Owo aariki amulamihe eSaabadu. 8Yeesutho aasuwela yeeyo yuupuwenlaaya, ni aamweerela mutthu a ntata noorakala: “Muvenye ni ngwe variyari va.” Owo aavenya ni aarowa. 9Yeesu aaweerela: “Miyo kinookohani: eheeni entthuneya opaka eSaabadu: yooreera, hoye hoye yoonanara, ovuluxa okumi, hoye hoye onanariha okumi?” 10Vano aahaawehaweha atthu ootheene yamurukureenre, anamweerela mutthu: “Mookole ntatananyu.” Owo aahookola, ni ntata naalamihiwa. 11Vaheera awosa yaanyoonyiwaxa ni yaapacera ovaanela yaaworu weera epake eheeni ni Yeesu.

Othanliwa wa arummwa 12

12Wa nihuku nimoha Yeesu aavenya arowaka omwaako weera avekele, ni aamvekela Muluku ohiyu wootheene. 13Oxaaka, aawiitthana oohuseraawe ni aahaathanla muloko neeli a yaawo, mwa yaawo aakhalinghaawetho ntoko arummwa. 14Simeyoni aamvanghaawe nsina na Pedru, munneiye Andreiya, Yakobe, Yohaane, Filipe, Bartomlomeyo, 15Matheyo, Tomaxi, Yakobe mwaana a Alfeyu, Simeyoni iitthaniwa Zeloti*, 16Yudasi mwaana a Yakobe, ni Yudasi Iskariyoti aathatungwe namavariha.

Sooreelihiwa ni sootakhalihiwa

17Yeesu aakhuruwa vamoha ni yaawo ni aaheemela vanipuroni noothatawala. Yaakhala weiwe oohuseraawe ancipale, ni atthu ancipalexa yaarweenle wa elapo yootheene ya oYudeiya, oYerusaleemu ni wa elapo ya ophareiya ya oTiro ni oSidoni. 18Yaahoowa weera emwiiwe ni elamihiwe ni irettasaya. Awo yaahasuliwa ni minepa soonanara yaalamihiwa. 19Ootheene yanneerera weera emutave, niwoko ikuru saakhuma wa Yoowo saalamihaka ootheene. 20Aawehaka oohuseraawe, Owo aaheera: “Ooreelihiwa nyuwo oohaawa, niwoko omwene wa Muluku ti wawinyu. 21Ooreelihiwa nyuwo vaanaano mumvoliwa etala niwoko mmwivone. Ooreelihiwa nyuwo vaanaano muniinla, niwoko mmwitheiye. 22Ooreelihiwa nyuwo atthu yoothanyani, yawoomolani, yooruwanani ni yanyohola nsinananyu ntoko nsina noonanara niwoko na Mwaana a mutthu. 23Mutteeliwe nihuku nenno ni mutuphe ni ohakalala, niwoko ntthuvelonanyu ti ntokotoko wiirimu. Vano, makholowaaya yaapakenle maprofeeti mooteene yoowo. 24Ii! Munoohaawa nyuwo, anamapuha, niwoko mohaakhela opepesiwawanyu. 25Ii! Munoohaawa nyuwo mumvona vaanaano vaava, niwoko mmwivoliwe etala. Ii! Munoohaawa nyuwo muntheiya vaanaano vaava, niwoko mmwiilalamikele ni mmwiinle. 26Ii! Munoohaawa nyuwo ootheene yawuulumelani yooreera, niwoko makholowaaya yaahaapakela mooteene yoowo maprofeeti oolokottha.

Waasivela amwiittana

27Vano Miyo kinooleelani nyuwo munkiiwa: mwaasivele amwiittanaanyu, ni mwaapakele yooreera yaale anoothanyani. 28Mwaareelihe yaawo anoolaphani, ni mwaavekelele yaale anoohasulani. 29Mukina oomanani nrama nimoha, mumvaheketho nrama nikina. Mukina oorulani malayaanyu, muhimukhoottihere yoowo onoorulanitho mukaandyo. 30Mwaavahe ootheene anoovekelani, ni mukina oneera akuxe yeeyo eri yawinyu, muhinnyeserere woohokoloxerani. 31Mwaapakele akina yeeyo nyuwo muntthunaanyu weera yoopakeleni. 32Ntthuvelo heeni muneeraanyu mwaakhele mwaasivela yaawo anoosivelani? Mpaka anamattheka anaasivela yaawo anaasivela. 33Ntthuvelo heeni muneeraanyu mwaakhele mwaapakela yooreera yaale anoopakani yooreera? Mpaka anamattheka ampaka hiiho. 34Ntthuvelo heeni muneeraanyu mwaakhele mwawooliha yaale munaaroromelaanyu woohokoloxeranitho? Mpaka anamattheka anoowooliha anamattheka akina eroromelaka waakhelatho yootheene. 35Mwaasivele amwiittanaanyu, mwaapakele yooreera ni ngwoolihe yaawo muhiwehereraka waakhela naari etthu yoohokoloxeriwa. Vano, ntthuvelonanyu nnikhale ntokotoko, ni mmwikhale anamwane a Musulusulu niwoko Owo ti ooreera murima wa yaale oohitthapela ni oonanara. 36Mmoriwe ikharari ntoko Atithinyu ammoriwaaya ikharari.

Omthoriha mukhwiinyu

37Muhithorihe, ni khamurwa muthorihiwa. Muhithoriheleke mmooroni, ni khamurwa muthoriheleliwa mmooroni. Mulevelele, ni mmwileveleliwe. 38Muvahe, ni mmwivahiwe. Aani, muringo wooreera: wookhitteleiya, woosareyaxa mpaka oyeeheiya. Vano, muringo munringelaanyu, mmwiringeliwetho.” 39Yeesu aahaaleelatho yoolikanyiha ela: “Mutthu oohoona onoowera omweettiha mutthu oohoona mukina? Khaanrowa omorela ooweeli mulittini? 40Oohusera khahiyono oottittimeheiya ompwaha muhusihaawe. Ootheenetho yaale eneera erehereriwe nnenesene eniikhale ntoko muhusihaaya. 41Heeni munaasaanyu ekokhola eri muniithoni na munninyu, muhoonaka etthaabwa eri muniithonimwanyu? 42Ongwereya hai nyuwo omweerela munninyu: ‘Munnaka, muhiyeke kivenxe ekokhola eri muniithonimwanyu,’ nyuwo muhiweraka woona etthaabwa eri muniithonimwanyu? Namwiixeera! Muvenxe toko etthaabwa eri muniithonimwanyu, ni vahoolowaya munimoona nnenesene weera muvenxe ekokhola eri muniithoni na munninyu.

Mwiri ni soowiimasaya

43Khoowowo mwiri wooreera oniima soowiima soonanara, ni khoowowo woonanara oniima soowiima sooreera. 44Nyiri sootheene sinsuwanyeya ni soowiimasaya. Khaawo anrukula ifiigu sa nyiiwa, hata iwuuva* sa nyiri sa nyiiwa. 45Mutthu ooreera onkhumiha itthu sooreera siri mmuhakhuni wooreera ori mmurimanimwawe, ni mutthu oonanara onkhumiha itthu soonanara siri mmuhakhuni woonanara ori mmurimanimwawe. Vano, eyanowaawe enuuluma yeeyo esareiye mmurimanimwawe.

Namateka a miruku ni namateka oohikhala ni miruku

46Heeni munkiitthanaanyu Apwiya, Apwiya, muhipakaka yeeyo kinghimaaka? 47Miyo kinoowooniherani olikannaaweno yoole ongwa wa Miyo, oniiwa maswaaka ni ontthariha. 48Owo onlikana mulopwana atekaka empa, aathipa woowiixa ni aapaka mathipelo vamwala. Siwaaka mirupi, mooloko waakusakula empa, khawaawenretho ottikinya empa ele, niwoko yaalipa. 49Yooletho oniiwa maswaaka, ahiiwelelaka kinoomulikanxa ni mulopwana aatenke empa vatthayani yoohikhalano mathipelo. Okusakulakaru mooloko empa ele, yaapittuwa ni ophwateiyawaya waahaatta.”

Currently Selected:

Luuka 6: VMK2021

Highlight

Copy