Luuka 7

Nroromelo na kenturiyoni* mmoha

1Amalihaka oleela sootheene iye muloko wa atthu, Yeesu aavolowa oKafarnawu. 2Weiwe aamvoreiwa murumeiyi a kenturiyoni* mmoha, ahalaka vakhaani okhwa. Vano, apwiyaawe yaamusivela vancipale. 3Owo aahiiwa suulummwaka sa Yeesu ni aahaarumiha asitokweene a aYuda, emvekelaka weera amulamihe murumeiyaawe. 4Ephiyaka wa Yeesu, yaamudyoonttelela ni ovilela: “Mulopwana owo omphwanela weera Nyuwo mumpakele yeeyo, 5niwoko owo onnasivela mulokwaahu ni aateka eSinagogaahu*.” 6Yeesu aarowa ni yaawo. Ekhuveelaka vaate, kenturiyoni* aahaarumiha akhwaawe weera yaamuleele Yeesu: “Apwiya, muheeteteiye, niwoko nkiphwanenle owaakhelelani vathi wa nipathonaka. 7Hiihotho nkinuupuwela weera koophwanela woociceerani. Muulume nsu nimoha paahi, ni murimeiyaaka anaalamihiwe. 8Vano, miyo kookhalanotho asitokweenaaka kimphwanelaaka owiiwelela, ni anakhotto ankiiwelela miyo. Kimmweerela mukina : ‘Orowe!’ ni onoorowa; ni mukina: ‘Owe!’ ni onimoowa. Kimmweerela murumeiyaaka: ‘Opake ela!’ ni onoopaka.” 9Woowiiwa seiye, Yeesu aatikhina ni yoowo, ni aarukunuwelaka atthu ancipale yaamutthara, aaweerela: “Miyo kinooleelani weera nkiphwannye hata oYixrayeli nroromelo ntoko nna.” 10Vano alopwana yaarumihiwe yaahokoleela owaani ni yaamphwanya murumeiyi alamihiweene.

Yeesu onimvenyereriha mwaana a naamukhweli

11Vahoolowaya Yeesu aarowa wa esidade yiitthaniwa Nayimi ni oohuseraawe, nitho atthu ancipale yaarowa vamoha ni Yoowo. 12Ekhuveelaka mulako wa esidade, eera ateexiwaka mutthu ookhwa, mwanawe mmoharu naamukhweli. Atthu ancipale a esidade yaari ni naamukhweli ole. 13Emoonaka, Apwiya yaammorela ikharari ni yaamweerela: “Muhiinle!” 14Vano aawaattamela ni aatava edyaneesa ya muttembo, ni yaawo yaateenxe yaaheemela. Yeesu aamweerela: “Mmiravo, Miyo kinooleela: ovenye!” 15Yoowo aakhwiiye aakilaathi ni aapacera otthekula, ni Yeesu aahaavaherera amayawe. 16Ootheene yaasareya ni woova ni yaamuttottopela Muluku. Awo yaaheera: “Mprofeeti Mutokweene oonikhumelela variyariwahu. Muluku aaxekura muloko wa atthwaawe.” 17Ihaali iye sa Yeesu saamwaramwareiya mweelaponi yootheene ya oYudeiya ni mweelaponi soowaattamanano.

Yeesu ni Yohaane mpatisa

18Oohuseraawe Yohaane yaamuleela itthu sootheene iye. Awiitthanaka eeli a yaawo, 19aahaarumihela Apwiya weera yaakohe: “Nyuwo ti Yoole eera awe, hoye hoye ningweherereke mukina?” 20Erowaka wa Yeesu, alopwana ale yaamweerela: “Yohaane mpatisa oonirumiha weera nookoheeni: ‘Nyuwo ti Yoole eera awe, hoye hoye ningweherereke mukina?’” 21Ehuhuweene yeele Yeesu eera aalamihaka atthu ancipale yaarino ikwerere, iretta sitokotoko ni minepa soonanara, nitho awoonihaka oohoona ancipale. 22Vano Owo aawaakhula arummwa: “Muhokolowe ni mwamuleele Yohaane yeeyo moonnaanyu ni mwiiwalaanyu: oohoona annoona; oorakala anneetta; anamakokho annalamihiwa; oohiiwa anniiwa; akhwiiye annavenyererihiwa, ni masu ooreeraxa annalaleeriwa oohaawa; 23nitho ooreelihiwa ti yoowo ohinkihovela Miyo.” 24Evenyaka oohuseraawe Yohaane, Yeesu aapacera wuuluma ni atthu ancipale mwaha wa Yohaane eeraka: “Eheeni mwaarongwaanyu woona munikareni? Ettheere entannyiwaka ni epheyo? 25Apaale mwaarongwe woona eheeni? Mulopwana awanreene ikuwo sooreeraxa? Moone, yaawo angwara ikuwo sooreeraxa ni antthara mihakhu, ankhala mpaani sitokotoko sa mamwene. 26Vatthuva, mwaarongwe woona eheeni? Mprofeeti? Aani, Miyo kinooleelani, ompwahatho mprofeeti. 27Owo ti yoole mwaha wa yoowo elempwe: “Miyo nkimurumihe murummwaaka ohoolowanyu; owo anaareherere ephirowaanyu ohoolowanyu.” 28Miyo kinooleelani weera khaawo ongyariwa ni muthiyana ompwaha Yohaane mpatisa. Wa soothesene, ooyevaxa moomweneni wa Muluku ti mutokweene ompwaha yoowo.” 29Muloko wa atthu wootheene mpaka anamaliviha a musoko, yiiwaka masu a Yeesu, yaahaakhulela weera ephiro ya Muluku ti ya ekhaikhai, niwoko yaapatisiwa ni Yohaane. 30Vaheera aFarisi* vamoha ni anamawera a nlamulo* yaakhootta otthuna Muluku aakhalannaawe ni yaawo, niwoko khayaapatisiwe ni Yohaane. 31Yeesu aapwaherera wuuluma: “Vano, ni eheeni kineeraaka kilikanxe ekhapira ela? Eri ntoko eheeni? 32Eri ntoko anamwane ekilaantheene omerekadu, ekhuwelelanaka akina ni akwaaya yeeraka: ‘Hiyo noowiipelani mpetta, mene khamwiinale; naahiipa ecipo yoolalamika, mene khamwiinlale.’ 33Vano, aahoowa Yohaane mpatisa ahicaaka epaawu, hata ahiwuraka eviinyu, ni muneera: ‘Owo ookhalano munepa woonanara.’ 34Aahoowa Mwaana a mutthu acaaka ni awuraka, ni muneera: ‘Ori vawo Namaca ni Namawura, Nthamwenaaya anamaliviha a musoko ni anamattheka.’ 35Miruku sinooniheriwa ntoko ekhaikhai ni anamwanaaya ootheene!”

Yeesu onttikittheliwa ni namattheka

36Iitthaniwaka Yeesu ni muFarisi* mmoha weera ace ni yoowo, Yeesu aarowa owannyawe ni aakilaathi vameesa. 37Asuwelaka weera Yeesu eera acaaka vaate wa muFarisi*, muthiyana mukina a esidade yeele, namattheka mmoha, aaruuha mukoomba wa alabastre ni makhura oowunkhelaxa ni 38aaheemela ottuli wa Yeesu vanaawoni. Iinlaka, aapacera onaaniha inaawo sa Yeesu ni maithoraawe. Vahoolowaya aahuukuttha ni mayihaawe inaawo sa Yeesu, anabeeca inaawo iye anattikitthela ni makhura oowunkhelaxa. 39Oonaka yeeyo, muFarisi* aamwiitthanne Yeesu aahiixeerela: “Mulopwana Ola aari mprofeeti, aamusuwela taani onimutava ni muthiyana heeni yoola: namattheka!” 40Yeesu aamwaakhula: “Simeyoni, kintthuna wooleelani etthu.” Owo aamwaakhula: “Mukileele, Muhusiha.” 41Yeesu aamweerela; “Atthu eeli yaamukopela namakopiha. Mmoha aamukopela idinaariyu* macira mathanu, ni mukina idinaariyu* miloko mithanu. 42Khaawo ooweeli yaawera oliva, tivawo namakopiha aalevelenlaawe ooweeli ikoongorisaya. Taani a yaawo eeli aneera amusivele namakopiha ompwaha mukina?” 43Simeyoni aamwaakhula: “Kinuupuwela weera ti yoole oleveleliwe idinaariyu* macira mathanu.” Yeesu aaheera: “Ti hiiho paahi.” 44Vahoolowaya, aamurukunuwela muthiyana ni aamweerela Simeyoni: “Moomoona muthiyana ola? Miyo koovolowa mpaanimwanyu, mene nyuwo khamukivanghe maahi weera kirapihe inaawosaka. Olatho oonaaniha inaawosaka ni maithoraawe ni ohuukuttha ni mayihaawe. 45Nyuwo khamukuuluminghe ni ebeecu, mene muthiyana ola, kivolowakaru va, khahiyerenre obeeca inaawosaka. 46Nyuwo khamukittikitthenle muruwaaka ni makhura, mene owo ohiitthela makhura oowunkhelaxa vanaawoniwaka. 47Tivawo, Miyo kinooleelani: sootthekasawe sincipale sooleveleliwa, niwoko owo oosivela vancipale. Yooletho onleveleliwa vakhaani, onsivela vakhaanitho.” 48Vano Yeesu aamweerela muthiyana: “Sootthekasanyu sooleveleliwa.” 49Oolattuliwa akina yaapacera weerelana yaworu: “Ola taani mpaka onlevelela soottheka?” 50Yeesu aamweerela muthiyana: “Nroromelonanyu nohoovuluxani. Murowe mmuretteleni.”

Currently Selected:

Luuka 7: VMK2021

Highlight

Copy