Luuka 8

Yoolikanyiha ya namwaala

1Vahoolowaya Yeesu anneetteetta musidadeni ni mmittettheni sikina, alaleiyaka masu ooreeraxa a omwene wa Muluku. Vano oohusera muloko neeli yaari ni Yoowo, 2nitho asithiyana akina yaalamihiwa ni minepa soonanara ni iretta. Aari Mariya iitthaniwa oMagadalene, mwa yoowo saakhumme minepa soonanara mithannamiili, 3Yohana, mwaariye Kuza, mutokweene a empa ya Herodi, Susana ni akina ancipale. Asithiyana ala yannaakhavihera yaawo ni sooreelasaya. 4Ethukumanaka atthu ancipale ni ewaaka wa Yeesu atthu a isidade soohiyanahiyana, Yeesu aahaathalihera yoolikanyiha ela: 5“Namwaala aavenya weera aale. Aalaka mmiso, mpatta mmoha waamorela mukerekhere wa ephiro. Waanyikaliwa, ni apalame a wiirimu yaahooca. 6Mpatta mukina waamorela vamalukuni, ni waamenlaaya, waahuuma niwoko khayaariwo maahi. 7Mpatta mukina waamorela vanyiiwani sunnungwe vamoha ni mmiso, ni mmiso ole waavuvuriwa. 8Mukinatho waamorela vatthayani yooreera, waahunnuwa ni waahiima soohepha sooreera imaara ncira opwaha waaliwe.” Aahimaawe yeeyo, Yeesu aakhuwela: “Yoowo orino maaru oowiiwa, iiweke!” 9Oohuseraawe yaamukoha etaphulelo ya yoolikanyiha ele. 10Owo aaweerela: “Wa nyuwo moovahiwa esuwelo ya ixiiri sa omwene wa Muluku, mene wa akina Miyo kinnaaleela ni soolikanyiha weera: “yoonaka, khaanoona, ni yiiwaka, khaaniiwexexa.” 11Etaphulelo ya yoolikanyiha ti ela: Mmiso ti nsu na Muluku. 12Mmiso waamorenle mukerekhere wa ephiro ti yaawo aniiwa. Vano, ongwa Diyabu* ni omvenxa nsu mmirimanimwaya, weera ehiroromele, hata ehivuluxiwe. 13Mmiso waamorenle vamalukuni ti yaawo yiiwaka masu anaakhelela ni ohakalala, mene khaanono mikwankhwaari. Anroromela ehuhu ya vakhaani, mene yaaphiyaka ehuhu yooweereriwa, anoohiya. 14Mmiso waamorenle vanyiiwani ti yaawo aniiwa, mene epwahereraka, anoovuvuriwa ni sooweeteteela, mihakhu, ni soohaawela sa okumi. Vano khaaniitthwa. 15Mmiso waamorenle vatthayani yooreera ti yaawo aniiwa nsu na Muluku ni murima wooreera ni wa nnene, ansunga nno mmirimanimwaya, ni anniima soowiima moovilelani.

Onyaari

16Khaawo ompattiha onyaari ni ompopheela ni elaata, hoye hoye oniikaathi vathi vabeettini. Ohiyanawaya, oniikaathi vanipuroni nootthuneya, weera yaawo amvolowa yooneke. 17Vano, itthu sootheene sa wiiphiini nsikhale soothupululiwa, nitho itthu soovithiwa nsikhale soosuwelihiwa ni soowiiheriwa ngwaarani. 18Tivawo, muupuwele nnenesene moota woowiiwa nyuwo. Owo orino, onoovahiwatho. Vaheera owo ohikhalanne, mpaka yeeyo onuupuwelaawe weera ookhalano, onimwaakhiwa.”

Amayawe ni axunneiye Yeesu

19Amayawe Yeesu ni axunneiye yaarowa weera emoone, mene yaahooceela omwaattamela niwoko na atthu ancipale. 20Vano mukina aamweerela Yeesu: “Amayinyu ni axunninyu ari vaate, ni antthuna wuuluma ni Nyuwo.” 21Yeesu aamwaakhula: “Amayaka ni axunnaka ti yaale aniiwa masu a Muluku ni aniiwelela yaawo.”

Yeesu ommaaliha ettheku

22Nihuku nimoha Yeesu aaweerela oohuseraawe: “Nrowe nilapuwele okhopela wa enyandya.” Awo yaavolowa munikulani ni yaapwaha. 23Yeettihaka nikula, Yeesu aakona. Vano, yaakhumelela weera ettheku yaakhuruwela vanyandyani moota wooweera naapacera osareya nikula maahi, ni awo yaavalavelaxa. 24Oohusera yaamvenxa Yeesu, ekhuwelaka: “Muhusiha, Muhusiha, nnooriheya!” Owo aavenya, anahiiha epheyo ni mitekuteku. Vano sootheene saamaala. 25Aahaakoha oohuseraawe: “Nroromelonanyu nri woowi?” Etuthuwaka ni etikhiniheiyeene, awo yaakohana yaworu: “Taani Ola? Mpaka onlamulela epheyo ni mitekuteku, ni seiye simmwiiwelela?”

Yeesu onimulamiha mutthu ni munepa woonanara

26Yaaheettiha erowaka mweelaponi ya oGeraseno, yaari okhopela wa oGalileiya. 27Akhuruwakaru Yeesu, aamukumanano Yoowo mutthu a esidade aarino minepa soonanara. Okhuma khalayi owo khaawara, hata khaakhala vaate, mene variyari wa mahiye. 28Amoonaka Yeesu, aakhuwela, anuuwela vanaawoni sa Yeesu, anamweerela akhuwelaka vancipale: “Muntthuna eheeni ni miyo, Yeesu, Mwaana a Muluku Musulusulu? Kinoodyoonttelelani weera muhikittaruxe.” 29Vano, Yeesu ahinaaye aalamulela weera munepa woonanara okhume wa mulopwana ole. Imaara sincipale munepa ole wannamvara. Hata ni inaawo ni matata ootthukiwa ni onyooro ni innyereriweene wa anamalipelela, owo annapasa onyooro ni annaronghiwa ni munepa woonanara vanipuroni na meekhaawe. 30Yeesu aakoha: “Nsinanawo taani?” Munepa waamwaakhula: “Elexawu*.” Minepa soonanara sincipale saavolowa mwa mulopwana ole. 31Minepa soonanara iye saamdyoonttelela Yeesu weera ahilamulele vanipuroni noowiixeraxa. 32Nakupa mutokotoko a ikhumba eera acaaka vanttumuxani nne. Minepa soonanara saamdyoonttelela Yeesu weera atthunihere ovolowa munakupani mmwe, ni Yeesu aatthunihera. 33Sikhumaka mwa mulopwana, minepa iye saavolowa munakupani mmwe, ni nakupa ootheene aatthimaka arowaka oxepani mpatta wa ephareiya, ni aamireiyamo. 34Yoonaka itthu seereiye, awo yaakukhula ikhumba yaatthawa ni yaathaliha itthu iye musidadeni ni mmawaani, 35ni muloko wa atthu waarowa weera woone yeeyo yeereiye. Omwaattamelaka Yeesu, waamoona mulopwana mwa yoowo saakhumme minepa soonanara, akilaantheene vanaawoni sa Yeesu, awanreene ni uupuwelaka nnenesene. Vano awo yaahoova. 36Yaawo yoonne eyo yaathalihera muloko wa atthu moota mulopwana ole aalamihiwaawe. 37Vano muloko wa atthu wootheene a elapo ya oGeraseno waamudyoonttelela Yeesu weera apwahe, niwoko waasareya woova. Owo aavolowa munikulani, anahokolowa. 38Mulopwana mwa yoowo saakhumme minepa soonanara aamudyoonttelela Yeesu weera amutthunihere orowa ni Yoowo. Yeesutho aamulaxera, amweerelaka: 39“Muhokoleele owaani ni mwaathalihere atthu yeeyo Muluku oopakenlaaweni.” Hiiho mulopwana aarowa ni aahaathalihera atthu ootheene a esidade yeeyo Yeesu ampakenlaawe yoowo.

Ikuru sa Yeesu ni iretta ni okhwa

40Aahokolowaawe Yeesu, atthu ancipale yaamwaakhelela, niwoko ootheene yaamungweherera. 41Vano mulopwana iithaniwa Yairu, muhooleli a eSinagoga*, aahoowa ni aahuuramela vanaawoni sa Yeesu, amudyoonttelelaka weera arowe owannyawe, 42niwoko mwanawe, muthiyana mmoharu, aahanle vakhaani okhwa. Mwaana ole aari wookwanaka iyaakha muloko ni piili. Yeesu areene mphironi, atthu ancipale yaamwaameleliha. 43Vanonto, aari vaavaawo muthiyana mmoha aahaawa iyaakha muloko ni piili ni eretta ya okhuma ephome. Aamaliha muhakhwaawe wootheene ni mameediku, mene khaawo yaawera omulamiha. 44Owo aaheemela ottuli wa Yeesu, aatava nleembe na soowarasawe, ni woowaakuveya ephome yaamaala okhuma. 45Yeesu aahaakoha: “Taani okitamve?” Vano, ekhoottaka ootheene, Pedru aamweerela: “Muhusiha, atthu ancipale ala ammaraana variyariwanyu ni angwaamelelihani.” 46Yeesutho aaheera: “Ookhala okitamve. Koosuwela weera wa Miyo sookhuma ikuru.” 47Muthiyana ole, oonaka weera khaawera opwaha akina ehinaaye omusuwela, aahoowa athukumelaka ni aahuuramela vanaawoniwawe. Vamaithoni wa ootheene, aamuthalihera Yeesu heeni aamutamvaawe, nitho weera aalamihiwa woowaakuveya. 48Yeesu aamweerela: “Mwaana, nroromelonawo nohoolamiha. Orowe mmuretteleni.” 49Yeesu nlelo uulumaka, aaphiya mukina a owannyawe Yairu, muhooleli a eSinagoga*, ni aamweerela: “Mwaninyu ohookhwa. Muhimuxupetho Muhusiha.” 50Iiwalaawe yeeyo, Yeesu aamweerela Yairu: “Muhoove, muroromele paahi, ni owo onoolamihiwa.” 51Aphiyaka owannyawe Yairu, Owo khaamutthuninghe ovolowa mutthu mukina ni Yoowo, ahikhanle Pedru, Yohaane, Yakobe ni atithawe ni amayawe mwaana. 52Ehuhu emoha yeeyo, muloko wootheene weera olalamikaka ni omwiinlelaka mwaana. Yeesu aaheerela: “Muhiinle, owo khakhwiiye, mene onookona.” 53Awo yaamutheiya, esuwelaka weera ohookhwa. 54Vano Owo aamvara ntata, anamweerela: “Mwaamwali, ovenye!” 55Munepaawe waahokolowa ni aavenya woowaakuveya. Vano Yeesu aahaalamulela weera emvahe yooca. 56Asinaangolowaawe yaatikhinaxa, mene Yeesu aahaalamulela weera ehaaleele akina yeeyo yeereiye.

Currently Selected:

Luuka 8: VMK2021

Highlight

Copy