Luuka 9

Yeesu onaarumiha 12

1Awiitthanaka Yeesu oohusera muloko neeli, Owo aahaavaha ikuru ni owera woomola minepa soonanara ni olamiha iretta. 2Aahaarumiha weera elaleiye omwene wa Muluku ni yaalamihe aretta, 3eeraka: “Muhikuxe naari etthu mphironi: hata ttootto, hata nrupa, hata yooca, hata musurukhu, naari mukaandyo mukina. 4Empa muneeraanyu mwavolowe, mwakhale mwemmo mpaka opwaha. 5Yakhala akina eneera ehiwaakheleni, mwavenye esidade ele, mwatathe ntthupi na inaawosanyu ntoko eneneero ya nthorihelonaya.” 6Hiiho awo yaavenya ni yaarowa mmittettheni, elaleiyaka masu ooreeraxa ni elamihaka mweelaponi yootheene. 7Herodi tetrarkha* aahiiwa suulummwaka sa itthu sootheene seereiye ni aatikhina, niwoko akina yeera weera Yohaane oovenyerera mookhwaani. 8Akina yeera weera Eliya aahiixoonihera, ni akinatho weera mmoha a maprofeeti a khalayi aahokoleela mookumini. 9Heroditho aaheera: “Miyo koomuhita Yohaane. Vano, taani Ola mwa Yoowo kiniiwaaka itthu iya?” Ni aamwaasaasa weera amoone.

Yeesu onaandyeerera ipaawu

10Ehokolowaka, arummwa yaamuthalihera yeeyo yaapankaaya. Vano Yeesu aahaarowano arummwa meekhaayaru ni yaarowa esidade yiitthaniwa Betsayida. 11Atthu ancipaletho yaahoonelela nipuronawe ni yaamutthara. Vano Owo aawaakhelela ni aahaaleela mwaha wa omwene wa Muluku, ni aahaalamiha yaawo yaatthuna olama. 12Wooxekuwani, oohusera muloko neeli yaamwaattamela Yoowo ni yaamweerela: “Mwaaleele atthu ancipale weera ettimule erowe mmamattani ni mmittettheni soowaattamana, weera yaphwanye yooca ni mapuro ookona, niwoko va nri nipuro noothowa itthu.” 13Wa soothesene, Owo aawaakhula: “Mwaavahe nyuwo etthu weera ece.” Awo yaamweerela: “Nrino va ipaawu ithanu ni ihopa piili paahi, ohikhanle weera nirowe naathumele sooca atthu ancipale ala.” 14Vano, yaari iwe waattamela macira miloko mithanu asilopwanaru. Vano Owo aaweerela oohuseraawe: “Mwaalamule weera ekilaathi wa mapuro-mapuro a miloko mithanu mithanu.” 15Oohusera yaapaka yeeyo, ni ootheene yaakilaathi. 16Akuxaka ipaawu ithanu ni ihopa piili ni awehaka osulu, aareeliha ni aameyanyiha. Vahoolowaya aahaavaherera oohusera weera yaakawele atthu ancipale. 17Ootheene yaahooca ni yaavona. Oohusera yaathukumanyiha mipapara muloko ni miili soosareya ni mivithe.

Ohima wa Pedru

18Emaara emoha Yeesu eera avekelaka meekhaawe. Vano, oohuseraawe yaari ni Yoowo, ni aahaakoha: “Atthu ankeerela Miyo taani?” 19Awo yaamwaakhula: “Akina aneera Yohaane mpatisa, akina Eliya ni akinatho weera mmoha a maprofeeti a khalayi oovenyerera.” 20“Ankha nyuwo,” aahaakoha, “Munkeerela Miyo taani?” Pedru aamwaakhula: “Kristu a Muluku.” 21Yeesu aawoopereraxa oohuseraawe weera ehaaleele akina yeeyo. 22Aaweerela: “Ontthuneya weera Mwaana a mutthu ahaawe itthu sincipale, akhoottiwe ni asitokweene a muloko, ahooleli a asaserdoti* ni anamawera a nlamulo*, akhwe ni avenyerere nihuku nanaararu.” 23Yeesu aaweerela ootheene: “Akhala mukina ontthuna okitthara Miyo, iikhootte muneenaawe, akuxe muttandaawe khula nihuku ni akitthare. 24Vano, yoowo ontthuna ovuluxa okumaawe, anaayeleele, mene yoowo ongyeleela okumaawe niwoko na Miyo, anaavuluxe. 25Yooreera heeni ophwanya elapo ya vathi yootheene, aphwataka hoye hoye ayeleelaka muneenaawe? 26Akhala mukina aneera uuliwe muru niwoko na Miyo ni maswaaka, Mwaana a mutthu anuuliwetho muru wa yoowo aawaaka moovuwanimwawe ni moovuwani mwa Atithawe ni mwa andyelo ootteela. 27Miyo kinoororomelihani weera akina ari va kheerwa ekhwa ehinaaye woona omwene wa Muluku.”

Otatuxiwa wa Yeesu

28Eviraka mahuku mathannamararu vahoolo woohima itthu iye, Yeesu aamurowano Pedru, Yakobe ni Yohaane ni aawela vamwaakoni weera avekele. 29Avekelaka hiihaale, ekhalelo ya ekhovaawe yaathatuwa, ni ikuwosawe saakhala sootteela ntoko waara wa overinya. 30Atthu eeli, Moisesi ni Eliya, yaahiixoonihera ni yaapacera wuuluma ni Yeesu. 31Yaahiixoonihera moovuwani ni yaahuuluma mwaha wa ovenyawawe Owo eeraawe akwanihere oYerusaleemu. 32Pedru ni asikhwaawe yaamooseela, ni evenyaka, yaahoona ovuwa wa Yeesu ni atthu eeli yaari ni Yoowo. 33Atthu eeli ale yeeraka epwahe, Pedru aamweerela Yeesu: “Muhusiha, ti wooreera okhala vaava hiyo. Nrowe nipake mikottha miraru: mmoha wa Nyuwo, mukina wa Moisesi ni mukina wa Eliya.” Owo khaasuwenle yeeyo aahimmaawe. 34Owo uulumaawe, naahoowa nihutte ni naahaakhuneela, ni awo evolowaka munihutteni, yaahoova. 35Naakhuma munihutteni nsu neenre: “Ola ti Mwanaka Oothanliwa, mmwiiwe Yoola!” 36Emalihaka wiiwa nsu, oohusera yaahoona weera aahanle Yeesu paahi. Awo yaathokorora yeeyo mmurimanimwaya. Wa mahuku ale khayaathalihera akina yeeyo yoonnaaya.

Olamihiwa wa mmiravo aarino munepa woonanara

37Oxaawaya, ekhuruwaka vamwaakoni, atthu ancipale yaahoowa okumana ni Yeesu. 38Mulopwana mmoha variyari wa atthu ancipale aakhuwela: “Muhusiha, kinoodyoonttelelani weera mungwehe mwanaka, niwoko ori mmoharu kirinaaka. 39Munepa onnamvara ni woowaakuveya onnakhuwela. Vano munepa onnamutatha ni onnamukhumiha nipheru. Munepa mahuku ootheene onnalekela omuhiya ni onnamuhaaxa. 40Kohaadyoonttelela oohuseraanyu weera yoomole, mene khayaawenre.” 41Yeesu aamwaakhula: “Ekhapira yoohiroromela ni yoonanara! Mpaka yaakhani kineeraaka kikhale ni koovileleni? Mukiwiihere va mwaninyu.” 42Mmiravo awaaka, munepa waamvonyera vatthayani omthukumelihaka. Yeesutho aahiiha munepa woonanara, anamulamiha mmiravo, anamvaherera wa atithawe. 43Ootheene yaatikhina niwoko na otokweenaawe Muluku. Ereene ootheene ootikhina mwaha wa sootheene Yeesu aapakaawe, Owo aaweerela oohuseraawe: 44“Mwiiwe nnenesene itthu kineeraaka kooleeleni: Mwaana a mutthu anaavarihiwe mmatatani mwa alopwana.” 45Vaheera awo khayiiwexenxe etaphuleloweene yeele. Yaahiipithihiwa wa yaawo weera ehiiwexexe. Awo yaahoova omukoha mwaha wa yeeyo.

Mutokweene taani?

46Oohusera yaapacera waakhulana mwaha wa mutokweene taani. 47Yeesu, asuwelaka soowuupuwelasaya, aamukuxa mwaana ni aamweemexa mukhwipimwawe. 48Vano aaweerela: “Mutthu ommwaakhela mwaana ola mwa Nsinanaka, onkaakhelatho Miyo. Ni yoowo onkaakhela Miyo, ommwaakhelatho Yoole okiruminghe. Vano, yoole oyevanxe variyariwanyu, anaakhale mutokweene.” 49Yohaane aamweerela: “Muhusiha, naamoona mulopwana oomolaka minepa soonanara mwa Nsinananyu ni naamooceeliha, niwoko owo khahiyono awihu.” 50Yeesu aamweerela: “Muhimooceelihe, niwoko yoole ohiinanne ni nyuwo, anaakhale ni nyuwo.”

Amwiittana a oSamariya

51Ekhuveelaka ehuhu Yeesu eeraawe awelihiwe wiirimu, Owo aalakela ni murima wootheene orowa oYerusaleemu. 52Aahaarumiha arumeiyi ohoolowawe. Arumeiyi yaarowa mmuttettheni wa oSamariya weera yamurehererele. 53Mulokotho wa atthu ale, yoonaka weera Yeesu aatthuna orowa oYerusaleemu, khayaatthunne omwaakhela. 54Yoonaka yeeyo, Yakobe ni Yohaane yaamukoha: “Apwiya, muntthuna weera hiyo niitthane mooro wa wiirimu weera waananarihe?” 55Yeesutho aarukunuwa anaahiiha, 56anarowa mmuttettheni mukina.

Omutthara Yeesu ti woorika!

57Yeettaka mphironi, mutthu mmoha aamweerela: “Miyo kinimoottharani mapuro ootheene Nyuwo muntthunaanyu orowa.” 58Yeesu aamwaakhula: “Akhwatte aakhalano inyattasaya, ni apalame a wiirimu aakhalano ipuurusaya, mene Mwaana a mutthu khanono nipuro noowiiyaathi muru.” 59Aamweerela mukina: “Mukitthare.” Mene mulopwana aamwaakhula: “Apwiya, mukihiye toko kaavithe atithaka.” 60Yeesu aamweerela: “Mwaahiye akhwiiye evithaneke yaaworu. Wa soothesene, nyuwo murowe ni mwalaleiye omwene wa Muluku.” 61Mukinatho aamweerela: “Kinimoottharani, Apwiya, mene mukihiye kihokolowe ni karaxele toko emusaaka.” 62Yeesu aamwaakhula: “Yoole omvara ehipa awehaka ottuli, khamphwanela omwene wa Muluku.”

Currently Selected:

Luuka 9: VMK2021

Highlight

Copy