Luuka 10

Yeesu onaarumiha oohusera 72

1Vahoolowaya, Yeesu aahaathanla oohusera miloko mithannamiili neeli ni aahaarumiha eeli-eeli vahoolowawe wa isidade sootheene ni mapuro ootheene Owo aatthunaawe orowa, 2aweerelaka: “Soohepha siri sincipale, mene anamiteko ari vakhaani. Tivawo, mwaavekele Apwiya a soohepha weera Awo yaarumihe anamiteko akinatho wa soohephasaya. 3Murowe! Miyo kinoorumihani ntoko ikhondoolo variyari wa miici. 4Muhikuxe nihottha, hata murupa, hata ikwakwaatta, ni muhimuulumihe mutthu mphironi. 5Mwaavolowaka mpaani, mweerele toko: ‘Murettele wa empa ela.’ 6Akhala iwo mulopwana a murettele, murettelaanyu onuukhale ni yoowo; aahikhala, murettelaanyu ngwoohokoleeleni. 7Mwakhale mpaani mmo, mucaaka ni muwuraka yeeyo eneeraaya yoovaheni, niwoko namuteko omphwanela nlivonawe. Muhaakakhanyihe empa ni empa. 8Mwaavolowaka esidade emoha ni mwaakheliwaka nnenesene, mwaceeke yeeyo eneeraaya yawiikaathereni ohoolowanyu. 9Mwaalamihe aretta ari weiwo ni mwaaleele yaawo: ‘Omwene wa Muluku wohookhuveelani.’ 10Mwaavolowaka esidade emoha ni mwaahaakheliwaka nnenesene, mwakhumele mmisewenimwaya ni mweere: 11‘Mpaka ntthupi na esidadaanyu nri nnaawonimwahu, nootatha ntoko yoowootheriwaanyu. Musuwele nnenesene yeela: omwene wa Muluku wookhuveela.’ 12Miyo kinooleelani: Wa nihuku nno na othorihiwa nnikhale nootepaxa esidadeene yeeyo opwaha oSodoma. 13Ii! Onoohaawa weyo, Korasini, Ii! Onoohaawa weyo, Betsayida, niwoko sootikhiniha sipakiwe mwa weyo saapakiwe oTiro ni oSidoni, saano khalayi isidade iye sirukunxaleene murima, siwanreene isaakho ni siihenleene ettuura! 14Wa nihuku na othorihiwa onuukhale woovileleya wa oTiro ni oSidoni opwaha wa weyo. 15Ni weyo Kafarnawu, onuuwelihiwe wiirimu? Hoye! Weyo onuukhuruwele oHadesi*. 16Yoole ongwiiwelelani, onkiiwelelatho Miyo. Yoole onookhoottani, onkikhoottatho Miyo. Vano, yoole onkikhootta, onimukhootta Yoowo okiruminghe.” 17Oohusera miloko mithannamiili neeli yaahokolowa ni ohakalalaxa yeeraka: “Apwiya, mpaka minepa soonanara sinniiwelela hiyo mwa Nsinananyu.” 18Owo aahaakhula: “Miyo koomoona Satana amoraka wiirimu ntoko overinya. 19Kohoovahani ikuru weera munyikaleke inowa ni awalisi, aani, ikuru soopwaha sa sootheene seiyo sa amwiittana. Awo kheerwa yoonanarihani. 20Wa soothesene, muhihakalale niwoko minepa soonanara sinoowiiwelelani, mene muhakalale niwoko masinaanyu aalempwa wiirimu.” 21Ehuhuweene yeele, Yeesu ahakalalaxaka mwa Munepa Wootteela aaheera: “Miyo kinoottottopelani Nyuwo, Atiithi, Apwiya a wiirimu ni vathi, niwoko moovitha itthu iya wa asuweli ni anamiruku, ni mohaathupululela iya asikhaani. Aani Atiithi, eyo yohoosivelihani. 22Atithaka aakivaha itthu sootheene. Khaawo onsuwela weera Mwaana taani, ehikhanle Atiithi, ni khaawo onsuwela weera Atiithi taani, ahikhanle Mwaana ni yaale Mwaana ontthunaawe waathupululela.” 23Vano Owo aahaarukunuwela oohuseraawe ni aaweerela meekhaayaru: “Ooreelihiwa ti maitho anoona yeeyo munoonaanyu. 24Vano, Miyo kinooleelani weera maprofeeti ni mamwene mancipale yaatthunaxa woona yeeyo nyuwo munoonaanyu, mene khayoonne, ni wiiwa yeeyo muniiwaanyu, mene khayiiwale.”

Yoolikanyiha ya muSamariya ooreera

25Emaara emoha namawera a nlamulo* aaheemela weera amweerere Yeesu, ni aamukoha: “Muhusiha, kipake eheeni weera kiphwanye okumi woohimala?” 26Yeesu aamwaakhula: “Eheeni elempwale munlamuloni? Munsoma hai?” 27Owo aamwaakhula: “Mwaasivele Apwiya Mulukwaanyu ni murimaanyu wootheene, okumaanyu wootheene, ikurusanyu sootheene ni muupuwelowaanyu wootheene,” nitho “munsivele mukhwiinyu ntoko muniisivelaanyu muneenaanyu.” 28Yeesu aamwaakhula: “Mohaakhula nnene. Mpake yeeyo, ni munookhala ni okumi.” 29Vano owo, atthunaka wiitaphula, aamukoha Yeesu: “Taani mukhwaaka?” 30Yeesu aamwaakhula: “Mulopwana mmoha aarowa oYerusaleemu mpaka oYeriko. Mphironi aavariwa ni anamwiiya. Awo yaamurula ikuwosawe, enammana, enapwaha emuhiyaka owo ahanleene vakhaani okhwa. 31Yaaheereiyatho weera aavira mphironi mmwe musaserdoti*. Amoonaka mulopwana ole, musaserdoti* aavira mpatta mukina. 32Hiihotho muLeevi, aphiyaka vanipuroni nne ni amoonaka, aavira mpatta mukina. 33Vano, muSamariya, areene ni mukwahaawe, aaphiya weiwe aamphwannyaawe mulopwana. Amoonaka, aammorela ikharari. 34Aamwaattamela anamutthuka makhwatta, ahelaka eviinyu ni makhura. Aamwiikaathi mulopwana vasulu wa enamaawe, anamurongha wa empa ya aletto, anamwiikaathi nnenesene. 35Wa oxaawaya, aakhumiha idinaariyu* piili ni aamvaha mwaneene a empa ya aletto amweerelaka: ‘Munkosoope. Kaahokolowaka, kinimoolivani sootheene muneeraanyu munanarihe.’ 36Munuupuwela hai? Taani a atthu araru ale aari mukhwaawe mulopwana aavariwe ni anamwiiya?” 37“Yoole aammorenle ikharari mulopwana ole,” aamwaakhula namawera a nlamulo*. Yeesu aamweerela: “Murowe ni mwapake mooteene yoowo.”

Vaate wa Marta ni Mariya

38Eettaka Yeesu ni oohuseraawe, yaaphiya mmuttettheni, weiwo muthiyana mmoha, iitthaniwa Marta, aamwaakhenlaawe owannyawe. 39Mariya, munneiye Marta, aakilaathi vanaawoni sa Apwiya iiwaka masu a Yeesu. 40Wa soothesene, Marta aari ni miteko sincipale saatthuneya oreherera. Owo, amwaattamelaka Yeesu, aamukoha: “Apwiya, khamumpwattha weera munnaka ookihiya meekhaaka ni miteko? Munleele weera akikhavihere!” 41Apwiya yaamwaakhula: “Marta, Marta, munimweeteteya ni munoocecewuka ni itthu sincipale. 42Vanonto, entthuneya etthu emoha paahi. Mariya oothanla mpatta wooreera, ni owo khoowa ovenxiwa wa yoowo.”

Currently Selected:

Luuka 10: VMK2021

Highlight

Copy