Luuka 5

Yeesu ongwiitthana oohusera oopacera

1Nihuku nimoha Yeesu aari vakhiviru wa enyandya ya oGenesarete. Atthu ancipale yaahaamaana emurukureenreene weera yiiwe masu a Muluku. 2Aahoona mukerekhere wa enyandya makula meeli ehiiweene vale, ni anamakoka erapihaka itthavisaya. 3Aavolowa munikulani nimoha naari na Simeyoni, ni aamvekela weera asuse vakhaani wa mukerekhere. Vano, akilaantheene munikulani, aaxuttiha muloko wa atthu. 4Amalihaka wuuluma, Yeesu aamweerela Simeyoni: “Murowe mpaka weiwo wiixalaaya, ni mwavonyere itthavi weera mvare ihopa.” 5Simeyoni aamwaakhula: “Muhusiha noheerera vancipale ohiyu wootheene ni khanivanre etthu. Woonakatho weera ti Nyuwo munghima yeeyo, miyo kinkela ovonyera itthavi.” 6Apakaka yeeyo, yaavara ihopa sincipale, moota wooweera itthavi saapacera waahuwa. 7Vano awo yaawoonihera ni ineneero asikhwaaya yaari munikulani nikina weera ewe ni yaakhavihere. Yaahoowa ni yaasariha makula oomeeli mpaka yaahanle vakhaani ottatta. 8Oonaka yeeyo, Simeyoni Pedru aakokhorela inaawo sa Yeesu anamweerela: “Mususe wa miyo, Apwiya, niwoko miyo namattheka!” 9Vano owo ni asikhwaawe ootheene yaatikhina ni ihopa sincipale yaavanraaya. 10Eeli a yaawo yaatikhinne yaari Yakobe ni Yohaane, anamwane a Zebedeyo, ni asikhwaawe Simeyoni. Vano Yeesu aamweerela Simeyoni: “Muhoove, okhuma olelo vaava mpaka ohoolo, mmwikhale namakoka a atthu.” 11Hiiho yaapurulela mukerekhere makula, enahiya sootheene enamutthara.

Olamihiwa wa namakokho

12Yeesu areene esidade emoha, aahoowa namakokho oosareya makokho. Amoonaka Yeesu, aahuuramihela ekhovaawe vathi, anamudyoonttelela: “Apwiya, mwatthuna, munoowera okilamiha.” 13Yeesu aahookola moono anamwiiyaathera, eeraka: “Kinootthuna. Mukhale oolamihiwa.” Woowaakuveya makokho yaamuhiya. 14Vano Yeesu aamulamulela: “Muhaaleele akina, murowetho ni mwiixoonihere wa musaserdoti*, ni mwavahe sooveleela mwaha wa orapihiwawanyu, seiye Moisesi aalamulenlaawe, weera iyo sikhale eneneero wa atthu.” 15Wa soothesene, ihaali mwaha wa Yoowo saatepaxa omwaramwareiya, moota wooweera atthu ancipale yaahoowa weera emwiiwe ni elamihiwe irettasaya. 16Yeesutho aarowa wa mapuro a meekhaawe anavekela.

Yeesu onimulamiha mutthu ooheetta

17Nihuku nimoha Yeesu eera axuttihaka, yaakilaathi vaavaale aFarisi* ni anamawera a nlamulo* akina yaaweenle mittetthe sootheene sa oGalileiya, oYudeiya ni soowaattamana oYerusaleemu. Vano, ikuru sa Apwiya saari ni Yoowo weera aalamihe. 18Yaahoowa atthu akina engwiiheraka Yoowo mutthu ooheetta munrepani. Yaaheerera ovolowa mpaani weera emwiikaathi ohoolo wa Yeesu. 19Ehiweraka ophwanya moota woovolowa niwoko na atthu ancipale, yaawela vanipathoni, ni emvirihaka variyari vanlakani, yaamukuruxa munrepani mpaka eriyari ya atthu ancipale ohooloxa wa Yeesu. 20Oonaka Yeesu nroromelonaya, aamweerela ooheetta: “Mulopwana, sootthekasanyu sooleveleliwa.” 21aFarisi* ni anamawera a nlamulo* yaapacera wuupuwela asineenaaya moota ola: “Taani Ola omveiha? Taani ongwera olevelela soottheka, ahikhanle Muluku paahi?” 22Asuwelaka yeeyo awo yuupuwenlaaya, Yeesu aahaakoha: “Heeni muupuwenlaanyu hiiho? 23Yookhweiya eheeni weera: ‘Sootthekasanyu sooleveleliwa,’ hoye hoye ‘Muvenye ni mweette’? 24Weeratho musuwele weera Mwaana a mutthu ookhalano mweelaponimu ikuru weera alevelele soottheka” – vano aamweerela mutthu ooheetta: “Miyo kinooleelani: muvenye, mukuxe nrepananyu ni muroweke owaani.” 25Woowaakuveya owo aavenya vahoolowaya, aakuxa nrepa mwa nenno aataleliwaawe, ni aarowa owannyawe amuttottopelaka Muluku. 26Ootheene yaatikhinaxa ni yaamvuwiha Muluku, ni esareiyeene woova, yaaheera: “Olelo nohoona itthu sootikhiniheiya.”

Wiitthaniwa wa Leevi

27Vahoolowaya Yeesu aavenya ni aamoona namaliviha a musoko iitthaniwa Leevi, akilaantheene vanipuroni naalivihiwa musoko, ni aamweerela: “Mukitthare!” 28Leevi aavenya, anahiya sootheene anamutthara. 29Vano, Leevi aamwiitthanela Yeesu efesta etokotoko owannyawe. Yaakhala atthu ancipale ecaaka vamoha ni yaawo: anamaliviha a musoko ni atthu akina. 30Vano aFarisi* ni anamawera a nlamulo* yaari a aFarisi*tho yaahaattaandawula oohuseraawe Yeesu yeeraka: “Heeni muncaanyu ni mungwuraanyu vamoha ni anamaliviha a musoko ni anamattheka?” 31Yeesu aawaakhula: “Khaahiyono yaale arino okumi animuhaawela meediku, mene aani oovoreiwa. 32Miyo nkaaweenle owiitthana oororomeleya, mene aani anamattheka weera erukunxe murima.”

Yeesu onkohakohiwa mwaha wa otthuka

33Awo yaamweerela: “Oohusera a Yohaane annatthuka ni annavekela imaara sincipale ntokotho, oohusera a aFarisi*, vano oohuseraanyu annaca ni annawura.” 34Yeesu aawaakhula: “Nyuwo munoowera waanyeserera otthuka oolattuliwa a namatthomera owo areene nlelo ni yaawo? 35Eniiwetho mahuku namatthomera aneeraawe avenxiwe wa yaawo. Mahuku awo eniitthuke oolattuliwa.” 36Vano aahaathalihera yoolikanyiha ela: “Khaawo onaahula nipareyo na ekuwo enyowani ni onghela mukuwoni ya khalayi. Apaka yeeyo, onoonanariha ekuwo enyowani nitho nipareyo na ekuwo enyowani khaninkhala nnene mukuwoni ya khalayi. 37Ni khaawo onghela eviinyu enyowani munrupani wa exapala ya khalayi. Apaka yeeyo, eviinyu enyowani enoophula murupa wa exapala, enoorihiwa, ni murupa onoonanariheya. 38Ohiyanawaya, entthuneya weera eviinyu enyowani eheliwe munrupani munyowani. 39Khaawo oneera amaliha owura eviinyu ya khalayi ontthunatho eviinyu enyowani. Vano oneera: Fataari eviinyu ya khalayi!”

Currently Selected:

Luuka 5: VMK2021

Highlight

Copy