Yohaane 16

1Kinooleelani sootheene iya weera nyuwo muhikwattuliwe. 2Nyuwo mmoomoliwe muSinagogani*. Vekhaikhai, eniiphiye ehuhu yaawo eneera ewiiveeni, eniyuupuwele weera animurumeela Muluku epakaka yeeyo. 3Eniipake itthu iyo niwoko khayaasuwenle Atiithi, hata Miyo. 4Kinooleelani yeeyo weera, yaphiya ehuhu, muupuwelele yeeyo Miyo kooleenlaakani. Nkooleenleni yeeyo ompacereroni niwoko kaari ni nyuwo.

Miteko sa Munepa Wootteela

5Vano, kinrowaaka wa Yaale akiruminghe, khaawo mmoha a nyuwo onkikoha: ‘Munkela woowi?’ 6Niwoko kuulumale itthu iya, mirimasanyu soosareya othanana. 7Vano Miyo kinooleelani ekhaikhai weera ti wa mpuhaanyu Miyo kinrowaaka. Miyo kaahirowa, Namalaka kharwa ooweelani. Vano Miyo karowa, nkoorumiheleni Namalaka. 8Owo aarwaaka, anaaviriyele elapo ya vathi mwaha wa soottheka, moota woowaakhuleliwa ni Muluku ni wa nthorihelo. 9Wa soottheka niwoko atthu khaankiroromela Miyo; 10wa moota woowaakhuleliwa ni Muluku niwoko Miyo kinrowa wa Atiithi ni nyuwo khamurwa mukoonatho; 11ni wa nthorihelo niwoko mutokweene a elapo ya vathi ela oothorihiwa. 12Kookhalano sincipale sowooleelani, mene vaanaano vaava khamungwera ovilela seiyo. 13Vano, waarwaaka Munepa wa ekhaikhai, Owo onuuweettiheni mweekhaikhaiyini yootheene. Khoorwa wuuluma yawayaru, oniwuulume paahi yeeyo oneeraaya wiiwe ni oniwoolaleereni seiyo sineera sirwe. 14Owo onuukivuwihe niwoko oniwaakhele yeeyo eri yawaka ni oniwoosuweliheni yeeyo. 15Sootheene siri sa Atiithi, siritho sawaka. Tivawo keenraaka weera Munepa oniwaakhele yeeyo eri yawaka ni oniwoosuweliheni. 16Ehuhu vakhaani ni khamurwa mukoona, ni vahoolotho vakhaani mmwikoonetho.”

Othanana wa oohusera onuutatuxiwe ohakalala

17Akina a oohuseraawe yaaheerelana: “Eheeni yeeyo Owo oneeraawe: ‘Ehuhu vakhaani ni khamurwa mukoona’ ni ‘vahoolowaya vakhaani mmwiikoonetho’ ni ‘niwoko kinrowaaka wa Atiithi?’” 18Vano yannakohana: “Eheeni yeeyo oneeraawe: ‘vahoolowaya vakhaani’? Khanniiwexexa yeeyo Owo onghimaawe.” 19Yeesu aasuwela weera yaahaawela omukohakoha mwaha wa yeeyo. Vano aaweerela: “Nyuwo munkohana mukina ni mukhwaawe yeeyo kaatthunaaka ohima kuulumaka: ‘Ehuhu vakhaani ni khamurwa mukoona, ni vahoolowaya vakhaani mmwikoonetho?’ 20Kinooleelani vekhaikhai weera nyuwo mmwiinle ni mmwilalamike elapo ya vathitho eniihakalale. Nyuwo mmwithanane, mene othananawanyu onuutatuxiwe ohakalala. 21Muthiyana aayaraka, onimoona ovoreiya niwoko ehuhuwaawe yoophiya, mene mwanawe ayariwa, owo onoottiwala ohaawa niwoko na ohakalala wa oyariwa mwaana mweelaponi ya vathi. 22Enkhumelela hiihotho ni nyuwo: vano eri ehuhu yoothanana wa nyuwo, mene Miyo nkiwooneeni emaara ekina, ni nyuwo mmwihakalale ni khaawo aneera avenxe ohakalala iwo. 23Nihuku nenenenno, nyuwo khamurwa mukikohatho naari etthu. Miyo kinoororomelihani weera Atithaka eniyoovaheeni sootheene muneeraanyu muvekele mwa Nsinanaka. 24Mpaka vano nlelo khamunaaye ovekela etthu mwa Nsinanaka. Muvekele ni mmwaakhele weera ohakalalawanyu okhale wookwanela. 25Kiri mweeraru kuulumaleene ni maphwanaphwaniho, enimoowa ehuhu Miyo kineeraaka kihuulume mooteene yoowo, mene nkuulume nnenesene mwaha wa Atithaka. 26Nihuku nenenenno nyuwo mmwaavekele Atiithi mwa Nsinanaka. Nkinghima weera Miyo nkaavekele Atiithi mwaha wa nyuwo, 27niwoko Atiithi aneenaaya animoosivelani, mweenre nyuwo mukisivelaka ni muroromela weera Miyo kirweenle wa Muluku. 28Miyo kaarwiiye wa Atiithi, kinavolowa elapo ya vathi; vano kinoohiya elapo ya vathi ni kinoohokoleela wa Atiithi.” 29Oohuseraawe yaamweerela: “Vano munuuluma nnenesene, ohikhanle ni maphwanaphwaniho. 30Vano ninoowera woona weera moosuwela itthu soothesene ni khoontthuneya weera nookohakoheni etthu. Tivawo ninroromelaahu weera Nyuwo murwiiye wa Muluku.” 31Yeesu aawaakhula: “Vano nyuwo munoororomela? 32Enkhuveela ehuhu, aani yoophiya, nyuwo muneeraanyu mmwaramwareiye khula mutthu wa owannyawe. Nyuwo mmwikihiye meekhaaka. Wa soothesene, Miyo nkikhanle meekhaaka niwoko Atithaka ari ni Miyo. 33Miyo kooleenleni itthu iya weera mukhalane murettele mwa Miyo. Mweelaponimu mmwikhaleno soohooxa, wa soothesene, mulipihere murima. Miyo koowina elapo ya vathi.”

Currently Selected:

Yohaane 16: VMK2021

Highlight

Copy