Yohaane 15

Evideira* ni mirai

1Miyo kiri Evideira* ya ekhaikhai ni Atithaka ti Namalima. 2Murai wootheene oreene mwa Miyo ohiimaka, Atiithi anoothikila ni wootheene oniima, Awo anooreherera weera wiimaxeke. 3Nyuwo mootteelihiwa niwoko na masu kooleelaakani. 4Mukhale mwa Miyo ni nkikhale mwa nyuwo. Khoowowo murai ongwera wiima mwaneenaayaru, ohikhanle muvideirani*. Nyuwotho khamungwera wiima, muhikhanle mwa Miyo. 5Miyo ti Evideira*; nyuwo muri mirai. Akhala mukina onkhala mwa Miyo ni Miyo mwa yoowo, owo onimwiimaxa, niwoko kihikhanle Miyo, nyuwo khamungwera opaka naari etthu. 6Akhala mukina ohinkhala mwa Miyo, anaakhale ntoko murai omvonyeriwa okerekhere ni onuuma. Miraisene seiyo sinoottottiwa, sivonyeriweke mmooroni ni sinoohisiwa. 7Nyuwo mwakhala mwa Miyo ni maswaaka mwa nyuwo, mmwivekele yeeyo muntthunaanyu ni mmwivahiwe. 8Atithaka amvuwihiwa nyuwo mwiimaxa, mooniheraka hiiho weera ti oohuseraaka. 9Ntoko Atiithi akisivenlaaya, Miyotho kohoosivelani. Mukhale moosivelanimwaka. 10Nyuwo mwiiwelela malamulowaaka, munookhala moosivelanimwaka ntoko Miyo kiniiwelelaaka malamulo a Atithaka ni kinkhala moosivelanimwaya. 11Miyo kooleenleni yeeyo weera ohakalalawaka okhale mwa nyuwo ni weera ohakalalawanyu okhale wookwanela. 12Nlamulonaka ti nna: musivelane ntoko koosivenlaakani. 13Khaawo orino osivelaxa ompwaha yoowo onaavaherera okumaawe asinthamwenaawe. 14Nyuwo mmwikhale asinthamwenaaka mwapaka yeeyo Miyo kinoolamulelaakani. 15Nkingwiitthanani arumeiyi niwoko murumeiyi khansuwela yeeyo Apwiyaawe ampakaaya. Ohiyanawaya, Miyo kingwiitthanani asinthamwenaaka, niwoko sootheene kiiwalaaka wa Atithaka, Miyo kohoosuwelihani. 16Nyuwo khamukithanlale Miyo, mene Miyo kohoothanlani nyuwo weera murowe ni mwiime soowiima soohimala weera Atiithi yoovaheeni yeeyo muneeraanyu muvekele mwa Nsinanaka. 17Nlamulonaka ti nna: musivelane mukina ni mukhwaawe.

Amalapo anaathanya oohusera

18Amalapo yoothanyani, muupuwelele weera ehinaaye woothanyani, akipacenre toko Miyo. 19Mwaari a amalapo, awo saano yoosivenleeneni ntoko awaya. Wa soothesene, khamuhiyono a amalapo, mene Miyo kohoothanlani koovenxakani wa amalapo. Tivawo amalapo anoothanyaayani. 20Muupuwelele masu kooleenlaakani: kheewowo epottha yoowaapwaha apwiyaaya. Awo yaakittharatthanre Miyo, animoottharattharanitho. Yiiwelenle maswaaka, eniyiiweleletho maswaanyu. 21Eniyoopakeleni hiiho niwoko na Nsinanaka yeenre ehaasuwelaka Yaawo akiruminghe. 22Miyo kahaawiiye kuulumaka ni yaawo, awo saano ehikhanle ni milattu. Vanonto, awo aakhalano milattu sa sootthekasaya. 23Yoole onkithanya, onaathanyatho Atithaka. 24Miyo kahaapaka variyariwaya miteko mukina ohitonkwaawe owera, awo saano ehikhanle ni milattu. Vanonto, awo yaahoona miteko iye ni yaakithanya Miyo nitho Atithaka. 25Eyo yeereenle weera ekwaniheriwe yeeyo elempwale munlamulonimwaya: ‘Yaakithanya kihikhalanne nthowa.’ 26Namalaka awa, mwa Yoowo kineeraaka koorumiheleni wa Atiithi, Munepa wa ekhaikhai onrweela wa Atiithi, Owo onuukikhalele onamoona Miyo. 27Ni nyuwotho mmwikhalele onamoona niwoko okhuma ompacereroni mpaka vano muri ni Miyo.

Currently Selected:

Yohaane 15: VMK2021

Highlight

Copy