Yohaane 14

Yeesu onaapepesa oohuseraawe

1Mirimasanyu sihikacamiheye. Munroromele Muluku, mukiroromeletho Miyo. 2Vaate wa Atithaka aakhala mapuro mancipale. Wahaakhanle hiiho, Miyo saano kooleenleeneni. Miyo kinkela woorehererelani nipuro. 3Ni Miyo kaarowaka ni koorehererelakani nipuro, kinoohokolowa ni nkookuxeni vamoha ni Miyo weera nyuwo mwakhale weiwo Miyo kineeraaka kakhalewo. 4Nyuwo moosuwela ephiro kineeraaka kirowe.”

Yeesu ti ephiro

5Tomaxi aamweerela: “Apwiya, khanisuwenle munkelaanyu, vano nnisuwele hai ephiro?” 6Yeesu aamwaakhula: “Miyo ti Ephiro, Ekhaikhai ni Okumi. Khaawo ongwa wa Atiithi, ohikhanle aviraka mwa Miyo. 7Nyuwo mwaakisuwenle Miyo vekhaikhai, mwaamwaasuwelatho Atithaka. Okhuma vaanaano nyuwo mohaasuwela ni moowoona.” 8Filipe aamweerela: “Apwiya munoonihere Atiithi ni eyo enoonikwana.” 9Yeesu aamwaakhula: “Miyo kanneetta ni nyuwo ehuhu yincipale ni orookhalaru hiiho nyuwo khamukisuwenle Miyo, Filipe? Yoowo onkoona Miyo, ongwoonatho Atithaka. Heeni nyuwo muneeraanyu: ‘Munoonihere Atiithi’? 10Nyuwo khamunroromela weera Miyo kiri mwa Atiithi ni Atiithi mwa Miyo? Masu kinooleelaakani khaahiyono awaka. Ohiyanawaya, ti Atiithi ankhala mwa Miyo ankwanihera mutekwaaya. 11Mukiroromele Miyo kooleelakani weera Miyo kiri mwa Atiithi ni Atiithi mwa Miyo. Hoye hoye mano muroromele niwoko na mitekosene seiye. 12Kinooleelani ekhaikhai weera yoole onkiroromela Miyo anaapaketho miteko Miyo kimpakaaka. Anaapake miteko soopwahaxa iya, niwoko Miyo kinkela wa Atiithi. 13Vano Miyo nkipake yeeyo nyuwo muneeraanyu mvekele mwa Nsinanaka weera Atiithi ekhale oovuwihiwa mwa Mwaana. 14Yeeyo nyuwo muneeraanyu mvekele mwa Nsinanaka, Miyo nkipake.”

Yeesu onroromeliha Munepa Wootteela

15Nyuwo mwakisivela Miyo, mmwiiwelele malamulowaaka. 16Miyo nkaavekele Atiithi ni Awo eniyoovaheeni Namalaka mukina weera akhale ni nyuwo mahuku ootheene, 17eyo tiiyo Munepa wa ekhaikhai. Amalapo khaangwera waakhela niwoko khaanoona, hata khaansuwela. Vaheera nyuwo moosuwela, niwoko Owo onkhala ni nyuwo ni onuukhale mwa nyuwo. 18Miyo nkirwa koohiyaani akwaasuni; nkoohokoleeleni. 19Vahoolo vakhaani amalapo kheerwa ekoonatho; vano nyuwo mmwikoone. Keenre Miyo kikhalaka ni okumi, nyuwotho mmwikhale ni okumi. 20Nihuku nenenenno nyuwo mmwiiwexexe weera Miyo kiri mwa Atithaka, nyuwo mwa Miyo ni Miyo mwa nyuwo. 21Yoowo okhalanne malamulowaaka ni oniiwelela, ti yoowo onkisivela. Yoowo onkisivela, anaasiveliwe ni Atithaka ni Miyotho nkimusivele ni nkiixoonihere wa yoowo.” 22Vano, Yudasi (omuhiya Iskariyoti) aamukoha: “Apwiya heeni muneeraanyu mwiixoonihere wa hiyo, ehikhanle amalapo?” 23Yeesu aamwaakhula: “Mukina akisivela Miyo, oniiwelela maswaaka. Atithaka eniimusivele ni hiyo nnirwe wa yoowo ni nnikhale mwa yoowo. 24Yoole ohinkisivela Miyo, khaniiwelela maswaaka. Masu ala nyuwo muniiwaanyu khaahiyono awaka; ari a Atithaka akiruminghe. 25Sootheene iyo kooleenlaakani Miyo nlelo kireene ni nyuwo. 26Namalakatho, Munepa Wootteela Atiithi eneeraaya erumihe mwa Nsinanaka, ngwooxuttiheni itthu sootheene ni onuuwuupuxereni sootheene kooleenlaakani. 27Kinoohiyerani murettele; murettelaaka kinimoovahani. Miyo nkinoovahani ntoko elapo ya vathi emvahaaya. Sihituthuwe mirimasanyu, hata muhoove. 28Nyuwo mookiiwa keeraka: ‘Kinoorowa, mene kinimoohokoleelani.’ Nyuwo mwaakisivela Miyo, mwaanghakalala niwoko kinkela wa Atiithi yeenre Atiithi ekipwahaka Miyo. 29Eyo Miyo kooleenlaakani ehinaaye weereiya, weera yeereiyaka, nyuwo muroromele. 30Miyo nkinooleelani vancipale niwoko mutokweene a elapo ya vathi aneera arwaaka. Owo khanono ikuru ni Miyo. 31Wa soothesene, elapo ya vathi entthuneya osuwela weera kinaasivela Atiithi ni kimpaka nnenesene yeeyo Atithaka akilamulenlaaya. Muvenye ni nrowe.

Currently Selected:

Yohaane 14: VMK2021

Highlight

Copy