Yohaane 13

Yeesu onrapiha inaawo sa oohuseraawe

1Yaahanle ehuhu vakhaani ahinaaye mPaska*. Yeesu aasuwela weera yoophiya ehuhu eeraawe ahiyeke elapo ya vathi ni arowe wa Atiithi. Owo aahaasivela awawe yaari mweelaponi, aani aahaasivela mpaka ommaleloni. 2Yeera ereene vameesa ecaaka, ni Diyabu* aamusesera Yudasi Iskariyoti, mwaana a Simeyoni weera amvarihe Yeesu. 3Yeesu aasuwela weera Atiithi yaahiikaathi itthu sootheene vathi wa ikurusawe ni weera aarwiiye wa Muluku ni anaamuhokoleeletho Yoowo. 4Hiiho Yeesu aavenya vameesa, aakuxa mukaandyowaawe ni aahiitthukela etuwaaliya muyuununi. 5Vahoolowaya aahela maahi mbasiyani, anapacera orapiha inaawo sa oohuseraawe uukutthaka ni etuwaaliya yaari muyuununi. 6Aaphiya wa Simeyoni Pedru aamweerenle: “Apwiya mmwirapihe inaawosaka?” 7Yeesu aamwaakhula: “Nyuwo khamuniiwexexa vano yeeyo kingweerelaakani, mene ohoolowaya, mmwiiwexexe.” 8Pedru aaheera: “Hoye! Khamurwa murapiha inaawosaka!” Yeesu aamwaakhula: “Miyo kaahirapiha, nyuwo khamunkhala mpattaaka.” 9Simeyoni Pedru aamwaakhula: “Vano Apwiya, khasihiyono paahi inaawosaka, menetho matataaka nitho muruwaaka.” 10Yeesu aamwaakhula: “Yoowo orampe, ontthuneya paahi orapiha inaawo. Erutthwaawe yootheene yooreera. Nyuwo muri oorapeene khamuhiyonotho ootheene. 11Vano, Owo aasuwela nnenesene taani eera amvarihe ni tivawo eenraawe weera khaahiyono ootheene arampe. 12Amalihaka orapiha inaawosaya, Yeesu aawara mukaandyowaawe ni aahokoleela vanipuroniwawe. Vano aahaakoha: “Nyuwo mohiiwexexa yeeyo Miyo koopakenlaakani? 13Nyuwo munkiitthana ‘Muhusiha’ ni ‘Apwiya’ ni vekhaikhai ti Yoomi. 14Vano, Miyo kireene Apwiyaanyu ni Muhusihaanyu kohoorapihani inaawosanyu, ontthuneya weera nyuwotho murapihaneke inaawosanyu. 15Miyo koowooniheraani ethoonyero weera mupake ntoko Miyo koopakenlaakani. 16Miyo kinooleelani vekhaikhai weera kheewowo epottha enaapwaha Apwiyaaya ntokotho khaawo namutthenga onimpwaha yoole omurumihale. 17Hapo nyuwo moosuwela itthu iya, mmwireelihiwe mwapaka seiya.

Yeesu onghima weera anaavarihiwe

18Nkinoohimani nyuwo ootheene. Kohaasuwela yaawo kaathanlalaaka. Yeeyotho eneereiya weera ekwaniheriwe Yoolempwa*: ‘Yoole onca epaawaaka, ookivaha munyeethaawe.’ 19Kinooleelani ehinaaye weereiya weera, yeereiya, nyuwo muroromele weera Miyo ti Yoowo. 20Miyo kinoororomelihani: yoowo ommwaakhela yoole Miyo kinimurumihaaka, anaakaakhele Miyo, ni yoowo onkaakhela Miyo, ongwaakhela Yaawo akiruminghe. 21Uulumaka hiiho, Yeesu aathananaxa mmunepani ni aahima: “Kinooleelani weera vekhaikhai mmoha a nyuwo anaakivarihe.” 22Oohuseraawe yaawehana ehimusuwelaka taani Owo aamuhimaawe. 23Mmoha a yaawo, oohusera Yeesu aamusivelaawe, eera akilaantheene mukhwipimwawe. 24Simeyoni Pedru aamwiinihera muru yoowo weera amukohe Yeesu mulopwana heeni Owo aamuhimaawe. 25Amususeerelaka Yeesu, aamukoha: “Apwiya, taani?” 26Yeesu aamwaakhula: “Yoole kineeraaka kimvahe epaawu ela yoomeyanyiwa eruweiweene musasaanini.” Vano, aruweyaka epaawu, aamvaha Yudasi Iskariyoti, mwaana a Simeyoni. 27Acaakaru Yudasi epaawu, Satana aavolowa mmurimanimwawe. Vanonto Yeesu aamweerela: “Etthu muntthunaanyu opaka, mpake woowaakuveya.” 28Khaawotho vameesa yiiwexenxe heeni Yeesu amweerenlaawe hiiho. 29Woonaka weera Yudasi aari namalipelela a musurukhu, akina yuupuwela weera Yeesu aamweerela athume yeeyo entthuneya ofestani, hoye hoye aavahe etthu oohaawa. 30Yudasi aahooca epaawu ni aavenya. Vano waari ohiyu.

Yeesu onghima weera Pedro anaamurune

31Avenyakaru, Yeesu aaweerela: “Vano Mwaana a mutthu oovuwihiwa, ni Muluku oovuwihiwa mwa Yoowo. 32Muluku avuwihiwa mwa Yoowo, Mulukutho anaamvuwihe Mwaana muneenaawe ni anaamvuwihe woowaakuveya. 33Axinamwanaaka, kinookhala nlelo ehuhu vakhaani paahi ni nyuwo. Nyuwo mmwikaasaase ni ntoko kaaleenlaaka aYuda, Miyo kinooleelani nyuwotho: weiwo kinrowaakawo, khamungwera orowawo. 34Kinoovahani nlamulo nnyowani: weera musivelaneke. Ntoko Miyo koosivelaakani nyuwo, ontthuneya weera mooteene yoowo nyuwotho musivelaneke. 35Hiiho ootheene eniisuwele weera nyuwo muri oohuseraaka: nyuwo mwasivelana mukina ni mukhwaawe.” 36Simeyoni Pedru aamukoha: “Apwiya, munrowa woowi?” Yeesu aamwaakhula: “Weiwo kineeraaka kirowe, nyuwo khamungwera okitthara vaanaano va, mene mmwikitthare vahoolo.” 37Pedru aamukoha: “Apwiya, heeni miyo kihingweraaka woottharani Nyuwo vaanaano vaava? Kinimoovahererani okumaaka!” 38Vano Yeesu aamwaakhula: “Nyuwo mmwikivaherere okumaanyu? Kinoororomelihani weera, ohinaaye wiipa muthupi, mmwikirune imaara tthaaru!”

Currently Selected:

Yohaane 13: VMK2021

Highlight

Copy