Yohaane 17

Yeesu onimwiivekelela ni wa oohuseraawe

1Ahimaka yeeyo, Yeesu aaweha osulu ni aavekela: “Tiithi, ehuhu yoophiya. Mumvuwihe Mwaninyu weera Mwaninyu oovuwiheni. 2Vano mwaamvaha Mwaana ikuru soolamula omutthu wootheene weera aavahe okumi woohimala ootheene Nyuwo mumvanghaanyu. 3Okumi woohimala ti ola: weera awo yoosuweleni Nyuwo, Muluku mmoharu a ekhaikhai, ni emusuwele Yeesu Kristu mwaamurumihalaanyu. 4Miyo kihoovuwihani mweelaponi ya vathi, kikwaniheraka muteko mwaakivanghaanyu opaka. 5Vano Atiithi, mukivuwihe vamoha ni Nyuwo ni ovuwa iwe kaaraakano khalayi ni Nyuwo ehinaaye okhala elapo ya vathi. 6Miyo kohaathupululela Nsinananyu yaale mukivanghaanyu mweelaponi ya vathi. Awo yaari awinyu ni mookivaha ni awo yaahiiwelela maswaanyu. 7Vano awo ansuwela weera sootheene mukivanghaanyu singwa wa Nyuwo. 8Miyo kohaaleela masu mukivanghaanyu ni awo ahaakhulela. Mwa yeeyo awo ansuwela vekhaikhai weera Miyo kirwiiye wa Nyuwo, ni yaaroromela weera mwaakiruma. 9Miyo kinnadyoonttelela wa yaawo. Nkindyoonttelela wa amalapo, mene wa yaale mwaakivanghaanyu niwoko ti awinyu. 10Ootheene kiraakano ti awinyu, ni ootheene muraanyuno ti awaka. Miyo kimvuwihiwa mwaha wa yaawo. 11Miyo nkirwa kikhalatho mweelaponi, mene awo nlelo ari mweelaponi ni, Miyo kinrowa wa Nyuwo. Tiithi Ootteela, ngwaakihe awo mwa Nsinananyu, Nsina nno mwaakivanghaanyu weera ekhale mmoha ntoko Hiyo nraahu mmoha. 12Kaaraaka ni yaawo, kaawaakiha ni kaahaalipelela mwa Nsina mwaakivanghaanyu. Khaawo mmoha a yaawo oriheiye, ahikhanle yoole mwaana a oriheya weera ekwaniheriwe Yoolempwa*. 13Vano kinrowa wa Nyuwo, mene kinghima itthu iya Miyo nlelo kireene mweelaponi weera awo ekhalane ohakalalawaka woowaatta. 14Kaahaavaha maswaanyu, ni amalapo yaahaathanya, niwoko awo khaahiyono a elapo ya vathi ntoko Miyo kihikhanlaakatho. 15Nkindyoonttelela weera mwaavenxe mweelaponi ya vathi, mene weera ngwaakihe wa namatakhala. 16Awo khaahiyono a mweelaponi ntoko Miyo kihikhanlaakatho. 17Mwaatteelihe mwa ekhaikhai; maswaanyu ti ekhaikhai. 18Ntoko mwaakiruminghaanyu mweelaponi, hiihotho Miyo kohaarumiha mweelaponi. 19Miyo kinimwiitteeliha niwoko na yaawo, weera awotho ekhale ootteelihiwa mwa ekhaikhai.

Yeesu onaavekelela aKristu ootheene

20Nivekelonaka khanihiyono paahi wa yaawo. Kindyoonttelelatho wa yaale eniikiroromele niwoko na mutthengaaya 21weera ootheene ekhale mmoha, Tiithi, ntoko Nyuwo muraanyu mwa Miyo ni Miyo mwa Nyuwo, ni weera awo ekhaletho mwa Hiyo. Hiiho amalapo eniiroromele weera Nyuwo mwaakirumiha. 22Kohaavaha ovuwa mwaakivanghaanyu weera awo ekhale mmoha ntoko Hiyo nraahu mmoha: 23Miyo mwa yaawo ni Nyuwo mwa Miyo. Kimvekela weera omoharuwaaya okhale wookwanela weera amalapo esuwele weera Nyuwo mwaakirumiha ni mwaahaasivela, hiiho ntoko mwaakisivenlaanyu. 24Tiithi, kintthuna weera awo mwaakivanghaanyu ekhale vamoha ni Miyo weiwo kiraakawo, ni weera yoone ovuwawaka, ovuwa mwaakivanghaanyu, niwoko mwaakisivela ehinaaye ephattuwelo ya elapo ya vathi. 25Tiithi oororomeleya, orookhalaru weera amalapo khayoosuwenleni, Miyo kohoosuwelani, ni yaawo ari awaka aansuwela weera mwaakirumiha. 26Miyo kohaasuweliha Nsinananyu, ni nkipwaherere opaka yeeyo weera osivelawene weiwo mwaakisivenlaanyu, okhale mwa yaawo ni Miyotho kikhale mwa yaawo.”

Currently Selected:

Yohaane 17: VMK2021

Highlight

Copy