Maariko 12

Abhatangati abha Ikiyahudi n-kya abharëmi abhaghogho

(Mataayo 21:33-46; Ruuka 20:9-19)

1Yëësu akasimya ökörëngërya abhatangati abha Abhayahudi bhayö igha, “Yaare-ho ömöntö uwöndë, ono yaarë na ömöghöndö ughwaye ghono yëëmëri-mo emezabhibhu. Akaghoghetera righöri, akatuka-mo ubhwina ubhwa okometera-mo sezabhibhu. Akahaghaasha-mo obhotaro ubhwa abharëndi ubhwa okorendera ömöghöndö. Akakoodisha ömöghöndö ghuyö ko-bharëmi, we akakora oroghendo, akaghya ikyaro ikyëndë ikya hare. 2Hano enkaagha iya ukutwa sezabhibhu yaahikirë, akatoma omoghorwa uwaaye ko-bharëmi bhayö, okore bhamohaane keno bhaaikererraini. 3Kasi abharëmi bhayö, bhakaghoota omoghorwa uyö, bhakamotema, kora bhakamukyörya mabhoko masa igho. 4Mwene möghöndö akatoma-yo ghwiki omoghorwa uwaaye uwöndë. Uyö wonswe bhakamotema sengoma ko-motwe, bhakamokorra bhoghogho. 5Ghwiki akatoma-yo omoghorwa uwöndë, bhakamwita. Akatoma abhaghorwa abhandë abhaaru, bhakabhatema, kora bhakaita abhandë. 6Mwene möghöndö uyö, akatighara na omoona uwaaye omoghonshe umwene igho, uwa okotoma-yo. Mbe, akatoma omoona uwaaye uyö, ko-bharëmi bhayö. Akaighambera mo-motwe ughwaye igha, ‘Mbaraasooke omoona uwaane.’

7“Kasi hano yaahikirë, abharëmi bhayö bhakakora ikiina igha, ‘Ono we umuri uwa umwandö ghono. Bhoono ni-igha tumwite, okore umwandö ghono ghobhe ughwëtö.’ 8Mbe, bhakamoghoota, bhakamwita, bhakamorekera kebhara iya ömöghöndö ughwa emezabhibhu ghuyö.

9“Bhoono mwene ömöghöndö uyö, iyakë araakore? Hano arikyora, nariita abharëmi bhayö, na ömöghöndö ghuyö, na-bhandë arekodishirya. 10Kasi, temwakasömirë Amaandeko Amahörëëru igha,

‘Reghena reno abhahaghaashi bhaangirë,

ndyo rebhaayë reghena rinene irya ko-koona iya umusingi ughwa inyumba.

11Omonene Waryobha we akörrë engʼana iyö,

engʼana iyö, nkötöröghöörya ërë.’#12:10-11 Maaha mo-ketabho ikya Zabhuri 118:22-23.”

12Abhanene abha abhasëngëri abha Waryobha, abhëëghya abha amaraghërryö agha Mosa na abhaghaaka, bhakamanya bhuuya igha, ëkërëngyö kiyö, mbo arëngëëyi. Bhakatuna igha bhamoghoote, kasi bhakoobhoha rikomo irya abhantö. Bhakamutigha hayö, bhakatanora.

Yëësu arabhööribhwa engʼana iya righööti

(Mataayo 22:15-22; Ruuka 20:20-26)

13Mbe, ku bhuyö abhanene abha Abhayahudi, bhakatoma Abhafarisaayo nyabhorebhe, na abhasoorani abha rikomo irya omokama Herode Antipa, okore bhaghashani Yëësu, okorengʼaana na amangʼana aghaaye umwene. 14Bhakaghya igho hano bhaahikirë, bhakatëëbhya Yëësu igha, “Umwëghya, ntomanyirë igha, uwe m-möntö uwa heene örë, amangʼana ghonswe igho ghano okoghamba, na-agha obhoheene. Uwe töötöniibhwi na obhonene ubhwa emeremo ighya ömöntö. Nkwëghya örë amangʼana agha enshera iya Waryobha, ko obhoheene. Bhoono, okohaka righööti ko-Kaisaari#12:14 Kaisaari. Kiyö ni-kyeo ikya omonene uwa Abharuumi kyaarë. Yaatonganga ibhyaro ibhyaru okohetera öbhökööröni. Omokama Herode Antipa yaashaaghööywë na Kaisaari abhe omotangati. Maaha mo-faharaasa. ne-ngʼana nshiiya? Ni-igha tohakenga, kasi totakaahaka?”

15Kasi Yëësu akangʼura ubhwihunaania ubhwabho bhuyö, akabhahonshora igha, “N-kwakë mukutuna igha mongashani? Munyöröki hano ritöngörö#12:15 Ritöngörö. Mu-Kiyunaani ni-igha, idinaari, n-ditöngörö irya Ikiruumi ryaarë. riyö ndemaahe.” 16Mbe, bhakamoherra. Akabhabhöörya igha, “Ekesosa na iriina irya ömöntö bheno bhërëngë ku-ritöngörö reno, ni-bhyawë?”

Bhakamohonshora igha, “Ni-ibhya Kaisaari.”

17Yëësu akabhatëëbhya igha, “Ibhya Kaisaari, mohaanenga Kaisaari umwene, na ibhya Waryobha, mohaanenga Waryobha.” Bhonswe igho bhakaroghoora bhököngʼu.

Yëësu arashumaashera amangʼana agha ukuryoka ukwa abhaku

(Mataayo 22:23-33; Ruuka 20:27-40)

18Ryaare-ho rikomo irya Abhayahudi reno rekobherekerwa igha Abhasadukaayo.#12:18 Abhasadukaayo. Bhaarë rikomo irya abhantö abha ikyaro ikya Isiraëri. Bhaaghöötirë amaraghërryö agha Mosa ghano ghaarë ko-Maandeko Amahörëëru, kasi bho tebhaaghöötirë amëëghyö agha abhaghaaka abha kare. Ghwiki, tebhaikërryanga igha ukuryoka mo-bhaku hökörë. Maaha mo-faharaasa. Bho bhaaghambanga igha, ukuryoka ukwa abhaku tekooho hë. Urusikö nyabhorebhe bharikyabho, bhakaghya ku-Yëësu, bhakamöbhöörya igha, 19“Umwëghya, omanyirë Mosa yaatoraghërrëëyi mo-maraghërryö igha, hano umushaasha akuurë atighirë mokaaye, kasi tiyebhora-ko omoona kora ömwë hë, ni-igha mura uwaabho atwenerwe omokari uyö, okore akorre mura uwaabho uyö yaakwa umughi.#12:19 Maaha mo-ketabho ikya Eheetoko iya Etoraati 25:5-10. 20Mbe, bhaare-ho abhamura muhungatë. Uwa mbere yaatëtirë omokari, kasi akakwa igho ataibhööyë nawe omoona kora ömwë. 21Uwa kabhërë akatwenerwa omokari uyö, kasi umwene wonswe akakwa igho ataibhööyë nawe omoona kora ömwë. Kora na uwa katatö wonswe, ekabha ighoigho. 22Bhonswe igho muhungatë bhano bhaarë na omokari uyö, bhakakwa igho bhataibhööyë-ko omoona kora ömwë. Omokari uyö wonswe, akakamba akakwa. 23Bhoono mbe tötëëbhi, nyoore m-maheene igha ukuryoka kooho, m-mokaa wë arebha urusikö urwa ukuryoka? Ko bhoora m-mokaa abhashaasha muhungatë bhonswe igho bhayö yaarë.”

24Yëësu akabhahonshora igha, “Nkusira mörë, ko bhono motamanyirë bhono Amaandeko Amahörëëru ghakoghamba, na kya igho obhotoro ubhwa Waryobha bhörë. 25Hano abhaku bhariryoka, tebhareteta handë okotetwa hë. Kasi mbarebha kya abhamaraika abha mu-ryobha. 26M-maheene igha abhaku nkuryoka bharë, kasi temwakasömirë mo-ketabho ikya Mosa, kya bhono Waryobha yaaghambirë hano ekesaka kyookanga omorro? Waryobha yaatëëbhëri Mosa igha, ‘Nö-öni Waryobha uwa Ibhurahimu, Isaaka na Yaakobho.’#12:26 Maaha mo-ketabho ikya Ukurishoka 3:6. 27Waryobha nu-uwa abhahöru, tu-wa abhaku hë.#12:27 Waryobha nu-uwa abhahöru, tu-wa abhaku hë. Ensonga iyaamo ni-igha, hayö Waryobha nkwörökya arë igha, abhaku bhayö ko-we, m-bahöru nkoheeshera bharë. Ku bhuyö bhëënyu nkusira mörë ko okoghamba igha ukuryoka ukwa abhaku tekooho hë. Bhëënyu nkusira mörë.”

Umughiro umurito okokera ghyonswe igho

(Mataayo 22:34-40; Ruuka 10:25-28)

28Hano Yëësu yaanyeerananga senkaani na Abhasadukaayo, umwëghya uwa amaraghërryö agha Mosa akahika-ho, akaighwa keno bhaanyeerananga senkaani. Hano yaaighuurë bhono Yëësu yaabhahönshööyë bhuuya, akamöbhöörya igha, “M-mughiro kë omonene okokera ghyonswe igho?”

29Yëësu akamohonshora igha, “Umughiro omonene nkoghamba ghörë igha, ‘Mwitegherre bharë Abhaisiraëri! Omonene Waryobha uwëëtö, we Omonene umwene igho. 30Ohanshe Omonene Waryobha uwaaho, kwa enkoro iyaaho yonswe igho, ko amaitegherro aghaaho ghonswe igho, ko sehakëri isyaho syonswe igho, na singuru isyaho syonswe igho.’#12:30 Maaha mo-ketabho ikya Eheetoko iya Etoraati 6:4-5. 31Na umughiro ughwa kabhërë ni-igha, ‘Ohanshe murikyaho, kya bhono wihanshirë uwe umwene.’#12:31 Maaha mo-ketabho ikya Amangʼana agha Abharaawi 19:18. Teghooho umughiro omonene okokera ghiyö hë.”

32Umwëghya uwa amaraghërryö agha Mosa uyö, akatëëbhya Yëësu igha, “Ore umwëghya, m-buuya oghambirë igha, Omonene Waryobha uwëëtö, we Omonene umwene igho, uwöndë taaho hë. 33Ghwiki, nemanyirë igha, ni-igha ömöntö ahanshe Waryobha kwa enkoro iyaaye yonswe igho, ko sehakëri isyaye syonswe igho na singuru isyaye syonswe igho, na ahanshe murikyaye kya bhono aihanshirë umwene. Iyö yo engʼana indito bhököngʼu, okokera ibhimwenso ibhisikibhwa bheena ibhimwenso ibhyëndë bhyonswe igho.”

34Hano Yëësu yaarööshë igha ömöntö uyö m-buuya ahönshööyë, akamötëëbhya igha, “Uwe te-hare örë na Obhokama ubhwa Waryobha.” Kukurwa hayö, tiyaare-ho ömöntö kora ömwë ono yaakarëhirë ghwiki ököbhöörya Yëësu engʼana iya ukumushaashya.

Yëësu we umwebhorwa Daudighwiki m-Monene uwa bhonswe igho

(Mataayo 22:41-46; Ruuka 20:41-44)

35Hano Yëësu yëëghyanga abhantö mu-risengerro irya Waryobha, akabhöörya igha, “N-kwakë abhëëghya abha amaraghërryö agha Mosa bhakoghamba igha Kiristo nu-mwebhorwa Daudi? 36Daudi umwene hano yaatangatirwë na Umwika Ömöhörëëru, yaaghambirë igha,

‘Omonene Waryobha yaatëëbhëri Omonene uwaane#12:36a Omonene uwaane. Hano nkwörökya ërë Yëësu Kiristo. igha,

“Ikara bhoryo ubhwane hano, ahasë hano hakosookwa bhököngʼu,

okohekera hano ndekokora, otashere hansë abhabhisa abhaaho.”’#12:36b Maaha mo-ketabho ikya Zabhuri 110:1.

37“Hano Daudi akobherekera Kiristo igha m-Monene uwaaye, bhoono iyakë araakore ghwiki Kiristo uyö abhe umwebhorwa uwaaye?”

Rikomo rinene irya abhantö ndyaamwitegherranga rishömëëywë.

Yëësu aratëëbhya abhantö bhaibhashe abhëëghya abha amaraghërryö agha Mosa

(Mataayo 23:1-36; Ruuka 20:45-47)

38Mbe, hano Yëësu yëëghyanga rikomo riyö, yaarëtëëbhëri igha, “Mwiyangarre na abhëëghya abha amaraghërryö agha Mosa. Abhantö bhayö bhahanshirë okoghenda ko-nshera bhatöörrë sengansho isyabho sentambë, na ökökëëribhwa mo-meteera kwa okosookwa. 39Ghwiki mbahanshirë ukwikara ku-bhitumbë ibhya abhanene mu-sinyumba isya esango iya Abhayahudi. Na hano bharaarekwa inyangi, bhahanshirë ukwikara ahasë aha abhatangati. 40Amangʼana aghaabho m-maaru hano bhasaasaama Waryobha mo-bhantö. Nkokora bharë igho, okore abhantö bhakanye igha, m-bantö abha heene. Bhaana eteemo iya ököngʼënërrya abhasinö, bhabhatuhe ëbhëntö. Abhantö bhayö, Waryobha narebhashibhya bhököngʼu!”

Umusinö ono yaaruusiri bhuuya esadaaka

(Ruuka 21:1-4)

41Yëësu akaikara mu-risengerro irya Waryobha, haangʼë na ëkëntö ikya okotoora-mo esadaaka. Yaamaherranga bhono abhantö abhaaru bhaatooranga sesadaaka mö-këntö kiyö. Abhaamë abhaaru bhaaruusyanga seehera sinsharu. 42Mbe, akaasha-ho umusinö ömötöbhu, akaruusya amatöngörö amake, abhërë igho, akatoora-mo. 43Hano Yëësu yaarööshë ghayö, akabherekera abheegha abhaaye, akabhatëëbhya igha, “No-bhoheene nkobhatëëbhya igha, umusinö ömötöbhu ono, aruusiri ekerengere ekenene okokera abhandë bhayö bhonswe igho. 44Nengambirë igho, ko bhoora abhandë bhayö bhonswe igho, ni-kitweno ikya omoharrökyö ughwa ëbhëntö bheno bhaanabhyo ngwo bharuusiri. Kasi umusinö ömötöbhu ono, naruusiri bhyonswe igho bheno aanabhyo.”

Currently Selected:

Maariko 12: ssc

Highlight

Copy